تحدث الفنان شادي شامل، عن تفاصيل طلاقه، وخضوعه لحقن مادة البوتكس في وجهه، وتفاصيل المواصفات التي يتمنى تواجدها في زوجته المستقبلية.
وقال شادي شامل، في تصريحات تليفزيونية: صوري على السوشيال ميديا إيه العيب اللي فيها؟ دي حياتي الطبيعية والمهم إن شكلها حلو، وأنا فاتح شركة في دبي بقالي فترة ومرتاح ماديًا.
وأضاف: أنا واثق من نفسي وده مش غرور ولا تكبر، أنا معجب بشكلي وجسمي، وبصحى الصبح أبص لنفسي في المراية وأدلع نفسي، وأنا عملت بوتكس وكل فنانين مصر بيعملوا بوتكس، ومش عيب إن الراجل يهتم بنفسه ولازم يبقى شكلي كويس قدام الستات.
وتابع: كنت متجوز وأنا عندي 23 سنة، ست فاضلة جدًا ومحترمة وبنت ناس وكل المواصفات الحلوة فيها، وهي كانت أول حب حقيقي في حياتي، وخلفت منها ولدين، حبيتها، هي كانت مثالية في كل حاجة وأنا كنت بتاع بنات وصايع، وقولت معقول دي بنت مؤدبة أوي وشاطرة وجميلة، اتجوزنا مدة طويلة والانفصال جه من عند ربنا وعلاقتنا جميلة لغاية دلوقتي والولاد قاعدين ما بينا، فيه احترام وده المهم جدًا، وأنا عمري ما اختلفت مع أي بني آدم ومكنش فيه بينا احترام.
وأكمل: أكيد حبيت تاني بعد انفصالي، وبفكر في الارتباط تاني إيه المشكلة، أنا بحب الست الهادية اللي أقولها إني مش عايز اتكلم دلوقتي يبقى مش عايز اتكلم، ولما أخد جنب تسيبني آخد جنب، أنا عصبي جدًا.
واستطرد: أنا بحب الست لما تبقى ذكية وعاملة غبية، ولكن متكونش ذكية أوي، ولازم يكون شكلها حلو وده مهم جدًا بالنسبة ليا، وأحب الست اللي تختارني، لأن الست هي اللي بتختار الراجل.
وعن علاقته بالفنان أحمد الفيشاوي، قال: أعرف أحمد الفيشاوي من زمان ووالده فاروق الفيشاوي، وأحمد طيب جدًا ومبيهمهوش حد وده اللي عاجبني فيه.
مقالات أخرى قد تهمك
بحب أدلع نفسي قدام المراية.. تصريحات مثيرة للفنان شادي شامل تثير ضجة