أخيرا يا جماعة ظهر الحق.. ووجدنا الإجابة التي كنا نبحث عنها في الفترة الأخيرة، ونعرف من الذي يقلد الآخر؟ جورجينا التي تقلد ياسمين صبري أم العكس؟ سنكشف في التقرير التالي الحقيقة الكاملة.
بعد فترة طويلة من الجدل والأسئلة اللي ملهاش إجابات حوالين تقليد ياسمين صبري للموديل جورجينا رودريجيز.. وإنها دايما بتتصور زيها.. وفي نفس الأماكن اللي بتروحها.. وبتلبس نفس البراندات.. ده حتى يا جماعة نفس الإكسسوارات والساعات والمجوهرات.. معقولة الصدف دي؟
ياسمين صبري عندها دايما حالة كده من الإنكار لأي حاجة .. عايشة في ملكوت لوحدها.. ما بين القطط والجيم وجلسات اليوجا.. ويوم ما بتخرج بره الكومفورت زوون.. بنلاقيها مسافرة بقى.. في أماكن من اللي بنشوفها على خلفية الديسك توب دي.
وفعلا اعترفت ياسمين صبري إنها بتحب تروح الجزر.. وتعيش أجواء روحانية في العالم.. بعيدة عن ضخب المدينة.. والحاجات اللي بنشوفها هنا.. عشان كده دايما هتلاقوا كل صورها في أماكن رايقة وشجر وورد وعصافير بتطير وحاجة آخر مزاج
كل ده بتعمله جورجينا برضه.
بتزيد عليها بس إنها عمالة تخلف عيال وتلبس رونالدو إنه يتجوزها.. واتحولت من مجرد بياعة في محل براندات شهيرة.. لحبيبة أشهر لاعب كرة قدم في العالم.. وأغلى وأبرز موديل في عالم الموضة والجمال والأزياء
العلاقة اللي بين رونالدو وأحمد أبو هشيمة طليق ياسمين صبري زودت في الربط ما بين اللي بتبلبسه وبتعمله.. وما بين حياة جورجينا.
وإنها بتحاول تقلدها.. وطبعا ياسمين عمرها ما طلعت علقت على الموضوع ده.. ماهي الصور بتتكلم يا جماعة مش محتاجين
لكن المرة في تصريحات تلفزيونية لأول مرة قررت ترد.. وكان ردها صادم الحقيقة.. إنها مبتركزش أصلا الناس بتقول عليها ايه.. وبيقارنوا بينها وبين مين.
ورجعتنا ياسمين صبري بالذاكرة لأيام ما كانوا بيقولوا عليها بتقلد كيم كارداشيان.. أيوه والله زي ما بقولك كده.. مش عارفة ازاي.. وايه اللي جمع بينهم.. بس في صور بتقول إن ياسمين في وقت من الأوقات كانت بتقلد أشهر مقدمة برنامج واقعي وموديل عالمية.. وسيدة أعمال من الطراز الأول.
لكن ياسمين ضربت عصفورين بحجر واحد.. وقالت إنها عمرها ما ردت ولا ركزت.. سواء لما قالوا بتقلد كيم كارداشيان أو حتى بتلقد جورجينا.. وكان باين عليها إنها متعصبة من الموضوع ده حبتين.
واللي يأكد ده إنها قالت بشكل واضح.. والله المشكلة مش من عندي.. أنا عايشة حياتي زي ما بحب مش بقلد حد.. وإن احنا كمجتمع عربي عندنا مشكلة إن دايما بنشوف الحاجة الأجنبية قيمتها أعلى وأغلى من العربية ولا المصرية.. وإننا مبنشوفش نفسنا صح.
كلام ياسمين صبري كان حاسم جدا.. ماهو الست متبقاش عاملة فيلم ناجح ومكسر الدنيا في العيد مع أمير كرارة وهو “البعبع”.. وتلف معاه وفريق العمل كله على الدول العربية عشان تحضر العرض مع الجمهور.. ده غير إنها بتحضر فيلمين تانيين منهم أبو نسب مع محمد إمام.. وتشغل نفسها مين بيقول عليها ايه.
ياسمين شايفة إنها ولا قدوة ولا مثل ولا أي حاجة من الكلام ده.. لكنها فخورة إنها بتمثل بلدها مصر بشكل مشرف في الحاجات العالمية اللي بتشارك فيها زي الحملات الدعائية لبراندات شهيرة.
ماهو لو انتوا ناسيين نحب نفكركم إن ياسمين صبري مش بس ممثلة مصرية محبوبة من ناس كتير.. لا دي ليها أهمية تانية متقلش عن كونها ممثلة.. وهي إنها موديل إعلانات ووجه إعلاني لبراندات مشهورة.
كمان ياسمين صبري ليها نشاطات مختلفة في عالم الموضة.. ودايما بنشوفها بتحضر عروض أزياء من اللي مبيروحهاش غير الممثلين الأجانب المعروفين أوي يعني.. وكتير اتصورت مع ناس من نجوم هوليوود.. يعني بالعربي كده بتقولكم أنا مش أقل منهم.. ناقص تقول “يا ناس يا شر.. كفاية قر”.
بس طبعا كلام ياسمين مش هيقدر ينسي الناس المقارنات اللي دايرة عنها وعن جوروجينا.. حتى لو الموضوع مش حقيقي أوي ومفتعل زيادة حبتين.. بس هي لعبة لذيذة.. ده وصلت بجمهور السوشيال ميديا إنهم بيجيبوا صورهم جنب بعض ويقعدوا يقارنوا تسريحة الشعر والماكياج وبراند اللبس.. وبراند المجوهرات.. وطبعا الشنط حدث ولا حرج.. أللي كل واحدة فيهم ماشية وشايلة في إيديها شنطة بتمن ميزانية دول بحالها.
يلا مضطرين نصدق إنها متقصدش.. ونتفرج على الصور اللي بتنزلها كل شوية من سفرياتها ومن الجيم ومن الديسك توب.. ونقول ربنا ينولهالنا.. اقعدوا بالعافية بقى
