“وصلنا بحمدالله وسلامته الى مدينة العلمين”.. خبر مفاجئ أعلنه الملياردير الاماراتي خلف الحبتور، وهذا بعد ساعات من انتشار اخبار عن نيته لشراء نادي الزمالك.
فياتري ايه سبب حضور الحبتور لمصر في التوقيت ده؟ وليه نزل في مدينة العلمين بالذات؟ ومين كان في استقباله؟ وقال ايه عن الساحل الشمالي؟
اسم الملياردير الإماراتي خلف الحبتور بقى تريند دايم في مصر، والمرة دي السبب هو الفيديو اللي نزله على صفحته بالفيسبوك وكتب عليها:
“وصلنا بحمدالله وسلامته الى مدينة العلمين في الساحل الشمالي لجمهورية مصر العربية العزيزة على قلبي تلبية لدعوة كريمة من أخي وصديقي العزيز المهندس حمدي سليمان وعائلته الفاضلة الكريمة”.
ده كمان اتكلم عن مدينة العلمين ودعا العالم لزيارتها وقال عنها منطقة جميلة جداً تتميز بشواطئها الرائعة تضاهي أنقى واجمل الشواطيء في العالم، وبدعي كل من يعشق الهدوء و البحر و الشمس الدافئة انه يزور الساحل الشمالي في مصر فهو يستحق الزيارة.
وطبعا ظهور خلف الحبتور في مصر بعد ساعات من تدوال اخبار عن تقديمه عرض رسمي لشراء نادي الزمالك، مع وعود ببناء مدينة رياضية كبيرة وستاد عالمي لنادي الزمالك، وكمان شراء صفقات قوية.
ولو اتوافق على العرض، الزمالك هيبقى ملكية خاصة مثل مانشيستر سيتي وباريس سان جيرمان وبيراميدز في مصر، وده نقلا عن موقع فوتبول الرياضي.
من هو خلف الحبتور؟
بص ياسيدي، الحبتور من كبار رحال الأعمال في الامارلت ان مكانش الوطن العربي كله، وعنده مجموعك اقتصادية بدأت شغلها في العقارات، ودلوقتي ليها وجود قوي في مجالات الضيافة والسيارات والعقارات والتعليم.
والمجموعة عندها 14 فندق في عدة دول، 7 منها في دولة الإمارات و7 في الخارج في دول النمسا والمملكة المتحدة ولبنان والولايات المتحدة والمجر.
وسبق واتكلم الحبتور عن خططه للاستثمار في مصر، وكشف عن رؤيته لتطوير منطقة صلاح سالم، بحيث انها تتحول لمشروع استثماري ضخم يسدد ديون مصر وكمان يغنينا عن القروض!
وقبل كده برضه اتكلم عن انشاء مجمع جوة مصر، زي الحبتور سيتي كده عشان يضم فنادق وابراج سكنية وتجارية وملاعب، وده باستثمارات 8.5 مليار دولار..
بس لغاية دلوقتي مفيش حاجة من اللي اتقالت حصلت على أرض الواقع، رغم ان الحبتور قعد أكتر من مرة مع مسؤلين كبار في البلد، بس واضح ان الأولويات مختلفة وده حسب كلامه في حوار سابق مع احمد موسى.
ولغاية دلوقتي مش واضح هل زيارة الحبتور لمصر من باب الترفيه وبس ولا فعلا هيبقى في كلام على استثمارات جديدة هتدخل البلد؟
وعلى فكرة دي مش اول دعوة من رجل الأعمال حمدي سليمان للملياردير الإماراتي خلف الخبتور عشان يزور مصر.
وفعلا سبق وزار الحبتور مزرعة خيول تابعة لرجل الأعمال حمدي سليمان، وظهر معاه قبل كده في أكتر من فيديو من داخل مصر.
ودلوقتي بقى قوللنا هل تتوقع دخول خلف الحبتور في استثمارات جوة مصر قريب؟
