هل سيرفعوا سعر الفائدة أم أنهم سيثبتوها؟ هذا هو السؤال الذي ينتشر دائما في الشارع المصري قبل اجتماع لجنة السياسة النقدية لكي تحدد مصير سعر الفائدة.
بس ياترى البنك المركزي هيثبتها ولا هيرفعها؟ وكان إيه توقعات خبراء الاقتصاد؟ ولو هيرفعها ممكن يرفعها قد إيه؟
كلها أيام وتجتمع لجنة السياسة النقدية في البنك المركزي عشان تحسم مصير سعر الفايدة، وطبعا قبل الاجتماع ده بيكون في قلق كتير وبتنتشر إشاعات بشكل كبير جدا عن ارتفاع او تثبيت سعر الفايدة
بس يا ترى هو إيه مصير الفايدة في الاجتماع؟
بص يا سيدي، حسب تصريحات محمد عبد العال الخبير المصرفي لموقع مصراوي، رفع البنك المركزي لسعر الفايدة خلال الاجتماع الجاي في 3 أغسطس هيكون قرار ليه تداعيات سلبية كتير اوي وكمان مش هيكون ليه جدوى اقتصادية
عشان كده من المرجح إن المركزي يثبت سعر الفايدة الاجتماع الجاي رغم ارتفاع وتيرة الأسعار
وقال كمان إن استخدام المركزي لسعرالفايدة عشان يسيطر على التضخم مش هيكون له تأثير على الضغوط التضخمية خصوصا بعد ما جربنا قبل كده ورفعنا سعر الفايدة خلال الـ 16 شهر اللي فاتوا والتجربة أثبتت عدم نجاحها وده لأن الاسعار برضو زادت عشان التضخم بيتأثر بتوابع مرونة سعر الصرف وخفض الجنيه قدام الدولار
بس هو إيه اللي حصل خلال الـ 16 شهر اللي فاتوا؟
حسب موقع مصراوي، البنك المركزي كان رفع سعر الفايدة 5 مرات بنسبة 10% خلال آخر 16 شهرا آخرها كانت 2% في مارس اللي فات وقبلها 8% خلال 2022، وده بعد ما أثر انخفاض سعر الجنيه مقابل الدولار على زيادة الأسعار
وبالمناسبة كلام محمد عبد العال هو تقريبا نفس كلام حسن عبدالله محافظ البنك المركزي، لما قال إن رفع أسعار الفايدة مش هتعمل أي حاجة لاحتواء التضخم
عشان كده طلب محمد عبد العال من وزارة المالية أنها تتخذ مجموعة من الاجراءات لتحسين الأوضاع الاقتصادية وبلاش نركز بس على السياسة النقدية ورفع أوخفض سعر الفايدة
دي كمان سهر الدماطي أيدت توقعات عبد العال بتثبيت البنك المركزي سعر الفائدة للمرة الثالثة على التوالي
وقالت إن رفع سعر الفايدة هيتسبب في زيادة معدلات التضخم بسبب زيادة تكلفة الإقراض اللي هتكون عبئ على المنتجين وبالتالي هيرفعوا أسعار السلع والخدمات وبالتالي هيرتفع التضخم وهندخل في دايرة مش في صالح الاقتصاد
ورغم كده سهر ما استبعدتش أنه المركزي يرفع الفايدة بنسبة1% لكن ده ممكن يكون في حالة واحدة بس وهي التوصل لاتفاق مع صندوق النقد لإجراء المراجعة الأولي اللي تم تأجيلها في مارس اللي فات، خصوصا إن الصندوق على طول بيطلب أنه سعر الفايدة يتماشى مع معدلات التضخم
أما محمد بدرة الرئيس التنفيذي السابق لأحد البنوك الخليجية، كان شايف حاجة تانية وال إن ممكن البنك المركزي يرفع سعر الفايدة بنسبة 1 و 2% في الاجتماع الجاي بعد ارتفاع معدلات التضخم
وقال إن اتباع المركزي لسياسة نقدية شديدة ده جاب نتيجة إلى حد ما من خلال تقييد معدلات السيولة في السوق وترشيد الاستهلاك بشكل عام
ودلوقتي قولنا توقعاتك عن قرار المركزي الجاي؟
