تقريبا كلنا نحب أن نرى الملك عبدالله وزوجته الملكة رانيا مع بعض ونهتم بحياتهم واخبارهم ، حتى صورهم تعجبنا وتحسسنا بأشياء حلوة .
ماشاءالله عليهم علاقتهم جميلة كلها حب وتفاهم وتواضع ورقي ، وهو ده اللي اي ست بتتمناه في علاقتها مع جوزها، عشان كدا بقت الملكة رانيا والملك عبدالله ثنائي مميز ونموذج ناجح جدا في العلاقات والجواز وكل الوطن العربي بيحب يتعلم من تصرفاتهم الجميلة.
اكيد في اسرار خلت علاقتهم بالشكل ده ناجحة وقوية ولسة الحب موجود فيها مقلش مع الوقت والمسؤليات الكتير اللي على عاتق الملك عبدالله ، لا بالعكس ده دايما بيعبرلها عن مدى حبه واحترامه ليها ، والملكة كمان بتستغل كل مناسبة عشان تعبر عن مشاعرها تجاه زوجها الملك عبدالله ودايما بتقوله ” ياسيدي” في كل صورة بتنشرهاله على حسابها
الملكة رانيا والملك عبدالله نجحوا في تأسيس أسرة جميلة مليانة حب واحترام ، وده قدروا يعملوه عشان كانوا متبعين شوية حاجات محافظين عليها في جوازهم وحياتهم مع بعض ، خلقت عندهم الاستقرار الاسري واستمرارية الحب بينهم وده اللي بنشوفه في عيونهم لما بيظهروا سوا وفي ابسط التفاصيل
طب ايه هي اسرار نجاح علاقة الملكة رانيا والملك لمدة 30 كدا ؟اول حاجة الاحترام المتبادل بينهم ، والملك بيقدر زوجته جدا وبيحترمها حتى في طريقة كلامهم وتصرفاتهم مع بعض لما بنشوفهم في اي لقاء بيكون باين جدا اد ايه في احترام وتفاهم
كمان الملك دعم الملكة رانيا كتير بعد ما اتجوزوا ، وهي قدرت تحول دعمه ليها لنجاحات كتيرة على ارض الواقع وخدمت شعب الاردن وساندتهم طول الوقت ، وده طبعا ناتج عن دعمه ليها ومنحها فرصة انها تقدم افضل ما عندها.
واهم حاجة بقى جميلة في علاقتهم هي ان حياتهم الزوجية خاصة جدا ، ومن ساعة ما اتجوزوا من 30 سنة وعمرنا ما سمعنا حتى ولو تسريب عن مشكلة بينهم وحريصين جدا يخلوا حياتهم الزوجية بعيدة عن الاضواء ودايما بيظهروا الحب والمودة والاحترام قدام الناس ، لكن عمرنا ماشوفنا اي موقف حصل بينهم هما الاتنين في مناسبة مثلا بيدل على ان في مشكلة بينهم ، وده دليل على انهم متفاهمين وبيعرفوا يحلوا مشاكلهم بسرعة ويتجاوزوها.
ولو اتكلمنا بقى شوية عن الملكة رانيا كـ ست بس ، فهي بتحب جوزها جدا ومش بتفوت اي مناسبة الا وتكتبله كلام حلو اوي على انستجرام ، وبصراحة بتعرف تختار شوية كلام رومانسي ورقيق يدخل القلب.
يعني مثلا في عيد جوازهم من كام يوم ، نشرت فيديو مليان صور ليهم مع بعض ، وكتبتله ايه بقى ، اسمعوا واتعلموا .. ” كل يوم يمر يقربنا أكثر .. وكل سنة تمضي تؤكد لي كم أنا محظوظة لقضاء حياتي معم .. عيد زواج سعيد يا ملكي “.
ومرة كمان نشرت صورة ليهم سوا وكتبت : لقلبي ملك ،، وفي عيد جوزاهم السنة اللي فاتت كتبتله : دائماً الأحب على قلبي يا سيدنا.
وفي 2020 كتبتله : كيف لحبي لك ألا يزيد كل يوم ؟ فابتسامتك تضئ حياتي منذ 27 سنة ” .. بصراحة كلامها حلو ومشاعرها جميلة وبتعرف تعبر عنها لحبيبها.
قصة حب وجواز الملك عبدلله والملكة رانيا دي حصلت من أول نظرة .. يعني شافها أعجب بيها مقدرش يمنع نفسه انه يكلمها لحد ماعرض عليها الجواز ، وده اللي حكاه الملك بنفسه في كتاب كتبه باسم فرصتنا الاخيرة ، وقال فيه هو عرفها ازاي بالظبط وايه اللي حصل لما شافها.
القصة حصلت سنة 92 لما رجع الملك في اجازة سريعة من فترة تدريبات شهرين ، وراح يتعشى عند اخته عائشة واللي كانت عازمة اصدقائها كمان على العشا ، وكانت رانيا حاضر الليلة دي وجت مع صديق ليها ، وشافها الملك واعجب بيها من اول نظرة لكنه مقدرش يتكلم معاها كتير في الليلة دي.
وبعد فترة قدر يوصل لرقم تليفون شغلها واتصل بيها وعرفها بنفسه وقالها انه عايز يقابلها تاني بس هي كانت مترددة في الاول وقالتله ” سمعت عنك حاجات” ولسة هتكمل بقى كلام قالها ان معظم اللي سمعتيه مش صحيح واشاعات.
الملك مفقدش الامل وفضل مصمم انه يقابلها ويتكلم معاها ، وقرر يستغل صديق مشترك بينهم هما الاتنين عشان يقنعها تقابله ويقوله انه نيته صادقة ناحيتها لكنها رفضت برضه، لكنه مستسلمش برضه ، وفضل يفكر يعمل ايه عشان يخليها توافق تشوفه ؟
راح اشترى ليها علبة شيكولاتة
بلجيكية لانه عرف انها بتحب الشيكولاتة جدا، وبعتهالها مع صاحبهم المشترك ، وبعدها فعلا وافقت تقابله لاول مرة لوحدهم وده في أواخر سنة 92 ، ومن هنا بدأت علاقتهم والحب ينشأ بينهم ، وتليفونات ومقابلات خفيفة
وفي يوم عيد ميلاد الملك عبدالله كانت حاضرة ، ووالده الملك الحسين عرف سرهم ، وقاله طالما عرفنا السر .. امتى عايزني اقابل اهلها ؟
لكن الملك عبدالله قرر يعملها مفاجآة رومانسية وعزمها على خروجة لجبل تل الرمان ، وطلب ايدها وهي ابتسمت ووافقت ، وبعدها فعلا الامور الرسمية تمت ورتبوا زيارة الملك الحسين لأهل رانيا وخطبوها واتجوزوا في 10 يونيو 93 واتعملهم فرح اسطوري ضخم وبقى عيد قومي في الاردن.
