كرش حمو بيكا عامل قلق في الساحل الشمالي ولا يكفيه الحفلات التي يقدمها ويظهر فيها الجمهور بالمايوهات والبيكيني فهو أيضا يستعرض كرشه وكأنه فرحان بيه وهي الناس بتتفرج عليه.
إزاي مطرب المهرجانات حمو بيكا مش هامه السخرية والتنمر اللي بيتعرض ليهم وكرشه بقى مباح للكل يتفرج عليه عادي.. لكن إيه السبب اللي مخلي بطنه منفوخة كده ومش بيعمل رجيم ولا تكميم عشان يظبط نفسه شوية.
حمو بيكا مقضيها في الساحل الشمالي حفلات غنا وحفلات شوي وفي الاتنين كرشه مدلدل قدامه وهو فرحان.. تحس كده إنه بيركب بيه التريند وبيعمله فلوس لما يصور كرشه في فيديوهات كده.. هو حمو بيكا مش مكفيه إنه بيغلط في كلمات الأغاني وهو بيسجل في الاستوديو والناس بتاخده غسيل ومكوى كمان عامل كرشه سبيل للي رايح واللي جاي كده.
مش عاوز يتعلم
حمو بيكا طلع في مرة كده قال إنه مش متعلم ومخدش شهادة ومبيعرفش يقرأ ولا يكتب ويمكن ده اللي مخليه متعطل بخصوص كارنيه عضوية نقابة الموسيقيين والحوار اللي الناس كلها عارفاه.. لكنه رغم كده خد محو أمية عشان يظبط الدنيا شوية.. بس بردوا هو شكله ميعرفش في الاتيكيت وامتى يتكلم وامتى يسكت وكمان أفعاله كلها تضحك وكأنه شايف نفسه ممثل كوميدي بس سيبك انت الناس بتحبه وهو طبيعته كده وبيقولوا عليه ده قلبه طيب وغلبان وبنحبه كده عشان طبيعي ومش بيستعرض.. طيب إزاي الناس بتحبه كده وإزاي بيتريقوا عليه محدش عارف بس أهو ده اللي حصل.
هو بيصرف فلوسه على كرشه؟
عارفين الطفل الصغير لما يكون مليان شوية ولا كرشه قدامه بيقعد يفرح بيه ويقول عز أبويا ويدب كده عليه.. أهو اللي يشوف كرش حمو بيكا يقول ده ابن عز ومتربي ع الغالي وعشان كده الناس بتفتكره بيصرف فلوسه على كرشه ومقضيها أكل.. وناس قالت إن فيديوهات كرشه دي بتعمل مشاهدات وبتجيب فلوس حلوة يبقى عادي بقى لما يصرف على الكرش وأهو زي ما بيتقال الراجل اللي من غير كرش ميسواش قرش.. وعشان كده لا بيهمه السخرية ولا القصص دي.
حفلة شوية معتبرة
من كام ساعة كده انتشر فيديو ظهر فيه حمو بيكا وهو في الساحل الشمالي ومكانش لابس غير المايوه وكرشه قدامه وكان وقتها في حفلة شوي معتبرة على البحر وبيتصور عادي وبيضحك وواحد الموضوع ببساطة وحتى اللي حواليه يبان كأنهم بيتريقوا عليه بس هو في النهاية بيتعامل بطبيعته عادي.. مش بس ده الفيديو اللي خلت الناس تقول كرش حمو بيكا عامل قلق ده في فيديوهات تانية ليه وهو نازل البحر وكرشه قدامه عادي وعايش حياته وشكله متعايش مع كرشه على الوضع ده كده عادي.
كرش ولا بطن منفوخة؟
الحقيقة بقى إن حمو بيكا بيصرف على كرشه بس عشان يتعالج مش عشان هو ابن عز.. وبطنه دي منفوخة بسبب أزمة صحية بيعاني منها ورغم إن الكل بيتريق عليه بس حالته كثيرة للتعاطف.. وده اللي كان كشف عنه حمو لما اتمنع من الغنا قبل كده وطلعت قال أنا قعدت في البيت ومش واخد تصريح عشان أغني والنقابة واقفة ضدي.. وعشان كده نشر صورة ليه وهو بيتعالج في المستشفى وطلع عنه داء مناعي نادر اسمه كرون وده اللي بيخلي بطنه منفوخة وقال إنه بيحتاج حقنة كل 3 شهور سعرها 130 ألف جنيه وعشان كده لازم يشتغل عشان يعالج نفسه وميمدش إيده لحد.
