انتظروا تعويم جديد للجنيه والتنفيد خلال ساعات! هذا هو التحذير الذي انتشر خلال الساعات الماضية على السوشيال ميديا، فعل سنرى خلال ساعات أن البنك المركزي يعلن عن تعويم جديد للجنيه؟ وماذا سيحدث في السوق السوداء وكم وصل سعر الدولار بها؟ تابعونا لمعرفة كافة التفاصيل:
مع بداية السنة المالية العديد في مصر 2023 – 2024 واللي بتبدأ من أول يوليو كل سنة، زاد الكلام عن تعويم جديد للجنيه، وخصوصا انه حسب الخطة المعلنة من وزارة الكهربا المفروض تأجيل زيادة الكهربا انتهى في 30 يونيو، ومن اول شهر 7 اللي احنا فيه، المفروض يتم رفع أسعار الكهربا.
بس القرار ده مش جديد وسبق واتكلم المتحدث باسم رئيس الوزرا نادر سعد عن زيادة أسعار الكهربا من أول يوليو، حسب المصري اليوم، لكن رسميا مطلعش قرار من الحكومة بالتنفيذ لغاية دلوقتي.
نيجي بقى لتعويم الجنيه، هتلاقي الرئيسي السيسي قال إن رفع سعر الدولار لو هيضيع المواطنين والشعب المصري يبقى بلاش منه حتى لو ده يتعارض مع طلبات صندوق النقد الدولي، فهل معنى كده ان ملف تعويم الجنيه اتقفل للأبد؟
بص ياسيدي في البداية لازم تعرف ان مصر في أكتوبر اللي فات سبق وأعلنت اعتماد سعر صرف مرن للجنيه فعلا، وتقدر تقول ان النظام حاليا في مصر هونظام التعويم المدار:
يعني الدولة سايبة السوق يحدد سعر الجنيه امام الدولار بس بحدود معينة عشان تضمن استقرار الجنيه.
تعال بقى بص على التقارير الدولية هتلاقي ملف التعويم حاضر فيها وبقوة، وآخرها مثلا تقرير وكالة بلومبرج اللي توقعت فيه تأجيل خفض قيمة الجنيه، وشد مليون خط تحت كلمة تأجيل، لأن ده معناه ان سعر الدولار هيزيد رسميا في البنك لكن امتى بالظبط محدش يقدر يقولك معاد محدد.
والفكرة هنا ان الوكالة ربطت بين الخفض الجديد لقيمة الجنيه، وزيادة احتياطي الدولة من الدولارات عشان البلد تقدر تدير بنجاح خطوة الخفض أو التعويم زي مابنقول
طيب زيادة الاحتياطي دي هتيجي منين؟
بص ياسيدي كارلا سليم، الخبيرة الاقتصادية في “ستاندرد تشارترد” شايفة ان البنك المركزي هيأجل تعديلات على أسعار الصرف وسعر الفائدة لبعد بيع مجموعة من الأصول المصرية.
ومن وجهة نظر بنك جولد مان ساكس ، مصر محتاجة حوالي 5 مليار دولار عشان تقدر تاخد قرار جديد بخفض قيمة الجنيه ، من غير مايحصل جنون في السوق.
وده تقريبا نفس كلام سيتي غروب اللي شايف إن مصر مش هتاخد قرار بخصوص خفض الجنيه من عدمه قبل سبتمبر الجاي على الاقل
وبكده يفضل اخر سؤال لو حصل خفض جديد في قيمة الجنيه فعلا ، الدولار جوة البنك هيبقى بكام؟
خلينا نقول ان التوقعات مختلفة من بنك دولي للتاني، لكن معظمها عند مستوى واحد، وعندك مثلا بنك سيتي جروب توقع وصول الدولر إلى 36 جنيه رسمي في نهاية ديسمبر 2023, علشان يسجل بعد كده حوالي 37 جنيه في 2024.
وتعال بقى بص على سعر الدولار في السوق السودة هتلاقيه وصل قبل العيد لحوالي 39 جنيه حسب مصرواي، بسبب بداية موسم السفر والإجازات، لكن دلوقتي السوق بدأ يحصل فيه ركود فعل تتوقع إن احنا رايحين لسكة التعويم لو الظروف بقت مناسبة ولا الحكومة صرفت نظر عن التعويم وهتكمل دعم الجنيه؟
شاركونا في التعليقات
