ناس كثيرة تشتكي من أسعار اللحوم والدواجن في الشهور الأخيرة، وهذا لأنها زادت الضعف تقريبا، لذلك فإن وزارة التموين أعلنت عن تعاقدها على كميات كبيرة من اللحوم والدواجن بأسعار مخفضة في منافذها.
لكن السؤال هنا: أسعار اللحوم والفراخ دي كام؟ والكمية اللي اتعاقدت عليها الوزارة قد إيه؟ وإيه الدول اللي بدأت وزارة التموين تستورد منها؟
أسعار اللحوم والفراخ الفترة الأخيرة ارتفعت بشكل كبير جدا، والكل بقى يشتكى من ارتفاع أسعارهم، وبسبب ده كتير من الناس بدأوا يتجهوا لمنافذ وزارة التموين والمجمعات الاستهلاكية وده لأن سعرهم بيكون أقل
عشان كده وزارة التموين أعلنت في بيان ليها من ساعات عن توافر جميع السلع للمواطنين من لحوم ودواجن وغيرها من السلع الأساسية مع قرب حلول عيد الأضحى المبارك
وطلع وزير التموين الدكتور على المصيلحي،طمن المواطنين وقال إننا عندنا مخزون استراتيجي من جميع السلع يكفي لفترات طويلة، وده تنفيذا لتوجيهات القيادة السياسية باستمرار وجود مخزون من جميع المنتجات الغذائية
ده قال كمان إن عندنا كميات من الدواجن المجمدة تكفي للاستهلاك لمدة أكتر من 3 شهور، وعندنا تعاقدات على 25 ألف طن فراخ برازيلي تكفي لأكتر من السنة
أما بقى بالنسبة للحوم واللي عليها إقبال كبير جدًا الفترة دي تحديدًا، قال إننا عندنا كميات من اللحوم المجمدة تكفي لمدة 4 شهور ونص تقريبا
وعلى فكرة ده قال إن في 2500 راس ماشية وصلوا من دولة جيبوتي من إجمالي 10 آلاف راس تم التعاقد عليها
طيب السؤال هنا: أسعار اللحوم والفراخ دي كام في المجمعات الاستهلاكية؟
أنا أقولك، حسب تصريحات أحمد كمال المتحدث الرسمي باسم وزارة التموين: أسعار اللحوم في المجمعات الاستهلاكية سجلت 195 جنيه للكيلو الطازج، و160 جنيه للمجمد
أما بالنسبة للفراخ المجمدة فسعرها 85 جنيه
ده قال كمان إن الوزارة تعاقدت على 600 طن من أوراك وصدور الدواجن لطرحها في المجمعات الاستهلاكية بأسعار تنافسية وبحسب كمال، الوزارة بتطرح 150 راس ماشية يوميا في المجمعات.
ولما اتسأل عن استعدادات الوزارة لعيد الأضحى؟رد وقال إن الوزارة أقامت 36 شادر على مستوى الجمهورية لبيع الخراف، وتم التعاقدد على حوالي 10 آلاف راس من الأغنام.
وبحسب تصريحات تليفزيونية سابقة للدكتور إبراهيم عشماوي مساعد أول وزير التموين، إن الوزارة بدأت تطرح اللحوم من جيبوتي في المجمعات الاستهلاكية بسعر 195 جنيه.
وقال إن سبب استيرادنا الفترة الأخيرة من جيبوتي هو سعي الوزارة لتنويع مصادر استيرادها من اللحوم خاصة بعد أزمة السودان اللي كنا بنعتمد عليها بشكل كبير في الاستيراد.
وقال كمان أن الوزارة بتوفر اللحوم البلدي في منافذها والمجمعات الاستهلاكية بسعر 225 جنيه، ومش بس وزارة التموين هي بس اللي بتعرض اللحوم باسعار مخفضة لا ده كمان وزارة الزراعة كانت أعلنت من فترة عن طرح اللحوم في منافذها بسعر 225 و 270 جنيه، وده حسب موقع فيتو.
وحسب محمد القرش المتحدث الرسمي لوزارة الزراعة، إن معرض من خير مزارعنا لأهالينا التابع لوزارة الزراعة بيوفر اللحوم بأسعار مخفضة عن السوق بنسبة 40%
ودلوقتي قولنا رايك في أسعار اللحوم في وزارة التموين؟
