أسعار الذهب الفترة الأخيرة كانت كل يوم بحال ولم تكن مستقرة، إيضا انتشر كلام الفترة الأخيرة عن ارتفاع أسعار الذهب الفترة القادمة، لذلك خرجت الحكومة لتكشف عن مفاجآت جديدة في الأسعار وحالة السوق الفترة القادمة.
بس السؤال هنا: هي إيه أسعار الدهب رايحة لفين؟ وياترى هترتفع ولا هتنخفض؟ وإزاي قرار وزير التموين أثر على الأسعار؟
الأيام الأخيرة البنك الفيدرالي قرر أنه يثبت سعر الفايدة، وده بالتأكيد هيرفع أسعار الدهب عالميا ومحليًا، عشان كده انتشر كلام بارتفاع أسعار الدهب الفترة الجاية
بس ياترى هو الكلام ده حقيقي ولا لأ؟
شوف يا سيدي، حسب تصريحات ناجي فرح مستشار وزير التموين في برنامج صالة التحرير، إن سعر أوقية الدهب عالميا هترتفع وهتوصل لـ 2500 دولار، بدل من 1900 دولار دلوقتي
ولما إتسأل عن أسباب انخفاض أسعار الدهب في الوقت الحالي؟
رد وقال إن مبادرة دخول الدهب من غير جمارك كان ليها فضل كبير في انخفاض أسعار الدهب في السوق المحلي بعد موجة ارتفاعات كبيرة ظهرت الفترة اللي فاتت، وده لأن المبادرة دي وفرت المعروض في السوق
ده قال كمان إن مبادرة زيرو جمارك اللي أعفت الدهب من الرسوم الجمركية ماعدا القيمة المضافة خلت عيار 21 دلوقتي يوصل لـ 2190 جنيه بعد ما كان في يوم من الأيام بـ 2800 جنيه، وعشان كده متوقع تجديد فترة المبادرة بعد انتهاء المدة المحددة
لكن من الواضح إن أسعار الدهب مش هتستمر في الانخفاض وهترجع لما كانت عليه، وده لأن نادي نجيب سكرتير شعبة الدهب، قال في تصريحات سابقة لموقع المصري اليوم إن أسعار الدهب قبل العيد ارتفعت بين 10 و20 جنيه ودي زيادة طفيفة
وقال كمان إن الأسعار لسه هتزيد أكتر بعد العيد وسعر عيار 21 متوقع أنه يوصل لـ 2500جنيه، وده بسبب ارتفاع معدلات العرض والطلب في السوق سواء بشرا الشبكة أو الهدايا
دي كمان وزارة التموين أصدرت بعض القرارات اللي ليها علاقة بأسعار الدهب الفترة الجاية، وده لأنها قررت اعتبار السبايك اللي وزنها 100 جرام أو أقل من المشغولات الدهبية
لكن إزاي قرار هيأثر على الأسعار؟
أنا أقولك، حسب إيهاب واصف رئيس شعبة الدهب باتحاد الصناعات، لموقع مصراوي، إن القرار ده هيفرض قيمة مضافة على السبايك بقيمة أعلى مما كانت عليه واعتبارها زي المشغولات الدهبية يعني هتتعامل ضريبيا بنفس معاملة المشغولات
وبحسب هاني ميلاد، رئيس شعبة الدهب بالغرفة التجارية، في برنامج الحكاية إن القرار ده هيرفع قيمة السبايك اللي وزنها 100 جرام 1200 جنيه بعد تطبيق القيمة المضافة عليها، أما بالنسبة للمشغولات الدهبية فالقيمة المضافة هتكون جنيه لكل جرام
وبالمناسبة ده في زيادة تم تطبيقها الشهر ده على مصنوعية الدهب بنسبة 10%، وده لأن الشعبة العامة للدهب أعلنت من فترة عن زيادة قيمة المصنعية ضمن بروتوكول المحاسبة الضريبية الموقع بين الشعبة ومصلحة الضرايب
وعلى فكرة الزيادة دي هيتم تطبيقها كل عام مالي جديد، لكن مش هتكون عبء على المستهلك وده لأن الزيادة مش هتتخطى 2 جنيه لكل العيارات الدهبي، حسب هاني ميلاد
ودلوقتي قولنا توقعاتك عن أسعار الدهب الفترة الجاية؟
