قال لها بحبك وعاوز اتجوزك وقعد على ركبه في الشارع وقدملها الخاتم الألماس وطلب إيديها رسمي.. راحت ردت مفاجئته بمفاجأة أكبر حضنته وقعدت على حجره عشان تعبر عن حبها ليه هي كمان.. كلامنا هنا عن الفنانة ثراء جبيل والفنان مختار الديناري اللي عملوا ضجة كبيرة على مواقع التواصل الاجتماعي بعد ما اتخطبوا في الشارع على الطريقة الأوروبية.
واضح إن ثراء جبيل كانت مستنية اللحظة دي من زمان وعجبها طريقة مختار الديناري لما نزل على ركبته ومعاه الورد والخاتم عشان يطلب إيديها وهي في ثواني كانت في حضنه قدام كل المعازيم وطلعوا على كافيه مشهور يكملوا المفاجأة وهي قعدت على حجره واتصوروا والحياة بينهم إيزي خالص.. ده اللي حصل من ثراء جبيل وخطيبها وكأنهم حالفين إن الناس كلها تكون شاهدة على خطوبتهم وقصة حبهم.
وفي الفيديو اللي معايا ده هقولكم ليه خطوبة ثراء جبيل ومختار الديناري تمت على الطريقة الأوروبية في الشارع ومين اللي خطط لكل ده؟ وإزاي ثراء جبيل حضنت خطيبها وقعدت على حجره بعد ما طلب إيديها؟ وليه الجمهور زعلان من كل اللي حصل وردوا عليهم إزاي؟.. خليكوا معايا عشان تعرفوا كل التفاصيل والأسرار.
أي بنت بتتمنى تعيش قصة حب مع حد يقدرها وينفذ وعده ليها بالخطوبة والجواز وخطوبة ثراء جبيل ومختار الديناري كانت مفاجأة لكل الناس ومحدش كان يعرف إنها مرتبطة أو عايشة قصة حب بس الحقيقة هي ومختار بيحبوا بعض وعايشين قصة جميلة بقالهم سنة وجه الوقت اللي يتوجوا بيه القصة دي بحاجة رسمي بقى خليهم يفرحوا والحياة تبسطهم أكتر.
وعشان كده خطيبها اختار طريقة مش بتتعمل كتير في مصر وهي مشهورة بره أكتر ويمكن ده اللي خلى قلب ثراء ينط من الفرحة وعينيها تلمع.
حديث السوشيال ميديا
فكرة الخطوبة بالطريقة دي كانت من اختيار مختار الديناري اللي قدر يتصل بطل أصحاب ثراء جبيل ويتفق معاهم يتجمعوا مع بعض في الشارع عشان يخطبها على الطريقة الأوروبية وهي تكون فرحانة ومبسوطة وبس.
كل ده أكيد مكانش سهل ترتيبه لكن اللي واضح من الطريقة دي إن قصة الحب اللي بينهم واللي بقالها سنة خاضوا فيها معارك كبيرة جداً عشان يوصلوا للي هما فيه دلوقتي.
وعشان كده قرر تكون العلاقة دي في النور وقدام كل الناس.. وعشان كده اختار التميز عشان الناس تتكلم عن اليوم الجميل وثراء تقول إيه اليوم الحلو ده ومتنساهوش أبداً ومختار خطط اليوم كويس كلهم الصحاب عنده وعندها وبدأت المفاجأة.
الطريقة الأوروبية
اتقال إن الخاتم سوليتر واتقال إنه ألماس.. بس في النهاية هو قدم ليها خاتم خطوبة عشان يفرحها وجهز بلالين ونفخها هليوم وعمل بوستر كبير وحطه على العربية وقالها تتجوزيني وراح اشترى بوكيه ورد وجاب مصور وجهز المزيكا ووقف في العربية واتجمعوا في الشارع وبعدها خرج في الوقت المناسب وركع على ركبه وقدم ليها الخاتم على الطريقة الأوروبية وهي من المفاجأة حاطة إيديها على خدودها ومش مصدقة نفسها من اللي بيحصل بعد ما كانت خلاص هتركب عربيتها وتمشي عادي عشان هي مش عارفة إيه اللي هيحصل.. وكان رد فعل ثراء جبيل إنها لقيت نفسها في حضن خطيبها مختار الديناري وقدام كل الناس قالت إنها موافقة.
سبب غضب الجمهور
الحفلة مخلصتش لحد كده ده مختار خد ثراء وطلعوا على كافيه مشهور ومعاهم صحابهم وسهروا هناك وقعدوا يحتفلوا بالمناسبة دي وفي صور وفيديوهات انتشرت ليهم والكل بيتمنالهم حياة سعيدة وفي اللي اتمنى تكون طريقة خطوبته كده.
لكن اللي خلى الجمهور زعل إن في صور ظهرت فيها ثراء جبيل وهي قاعدة على حجر خطيبها ومن وقتها الانتقادات مش مبطلة عليها وبيقولوا إزاي تعمل كده بس هي عاوزة تبين إنها بتحبه ومبسوطة من اللي حصل ويمكن عفويتها اللي خلتها تتصرف بالطريقة دي والبعض قال ده حاجة عادية ومش لازم تاخد كل الحجم ده والبعض قال لازم تاخد بالها.
طبعاً ثراء جبيل ومختار الديناري عارفين إن في انتقادات لكن الموضوع اتعالج علطول ويمكن مكانوش قاصدين كمان وحد من صحابهم نشر صورة ليهم وهما قاعدين على كرسيين في كوشة وبيخطبها رسمي وده عشان الكل يعرف إن ده مش شو ومش مقصود يزعلوا حد.
يعني الراجل داخل البيت من بابه أهو.. ومختار الديناري يعتبر فنان شامل وهو ممثل ومدرب رقص وطالب في معهد الفنون المسرحية وشارك في بعض المسرحيات وقدم بطولة عدد من الأفلام القصيرة وكمان حقق نجاح كبير بعد ما شارك في مسلسل ريفو الجزء الثاني.. وهو كمان بيدرس في مركز القاهرة للرقص المعاصر وكمان هوايته التمثيل والتركيز فيه أكتر من أي حاجة تانية.
تفتكروا اللي عمله مختار الديناري في حكاية الخطوية عشان يفاجئ ثراء جبيل صح ولا لأ؟ اكتبولنا آرائكم في التعليقات.
