مازال النجم حسن يوسف و شمس البارودي غير قادر على استيعاب وفاة ابنهم عبدالله الذي رحل بعد ماغرق في البحر وهو يقضي أجازته في الساحل الشمالي ، وكانت مفاجآة صدمت كل الناس داخل وخارج الوسط الفني.
عبدالله ابن حسن يوسف ده اخرالعنقود ، اصغر واحد في ولاده وعمره 35 سنة ، وللاسف نزل البحر بالليل واختفى شوية وبعدها طلعوا جثمانه وهو فاقد للوعي وجريوا بيه على مستشفى العلمين لكن للاسف كان خلاص فارق الحياة واعضاء جسمه توقفت ومحدش قدر ينقذه.
شمس البارودي والدة عبدالله في انهيار تامة ، محدش عارف يكلمها ولا يهديها واول ما سمعت الخبر مصدقتش خالص وقالت اكيد ده مش ابني عبدالله ، لكن للاسف التأكيد جالها ودخلت في حالة صراخ وبكاء هيسيتري لما سمعت ان ابنها الصغير خلاص اتوفى وكمان غرقان.
من وقت ما شمس البارودي عرفت وهي منهارة ومحدش من الوسط الفني عارف يكلمها يعزيها ولا يقولها اي حاجة ، ومش بتعملحاجة غير انها بتعيط كوفي حالة صدمة ومش مستوعبة اللي حصل لابنها اللي كان رايح يقضي يومين مع اصحابه في الساحل ونزل البحر بالليل لكن عمره انتهى لحد هنا ومعرفش يخرج من المية الا جثة هامدة.
الوضع صعب على اسرة حسن يوسف خاصة وان هو ومراته شمس كبار في السن والخبر صدمة بالنسبالهم ومش قادرين يتمالكوا نفسهم ، وعمرهم ماكانوا يتخيلوا انهم هيدفنواواحد من ابنهم في عز شبابه.
حسن يوسف في حد اتصل بيه ليلة الحادثة وسأله عن عبدالله بس هو مكنش يعرف حاجة وقالهلا ابني كويس وزي الفل ، لكن لما عمر ومحمود اخوات عبدالله الكبار بدأوا يتحركوا اتاكداو من خبر وفاة اخوهم الصغير وحسن يوسف انهار ومقدرش يتحمل الصدمة وكاوا خايفين عليه يحصله حاجة هو كمان خاصة وانه عدى ال80 سنة يعني وحالته متستحملش صدمة زي دي .. فعلا ربنا يصبره حسن وشمس على المصيبة اللي هما فيها.
ولما عرفوا واتأكدوا ان ابنهم عبدالله موجود في مستشفى العلمين ، اسرة حسن يوسف راحوا كلهم على هناك الفجر عشان يشوفوا ابنهم واللي حصله ، وفعلا راحوا بس لحد دلوقتي مستلموش جثمانه وده عشان هيتم دخوله المشرحة عشان يعرفوا سبب وفاة بالظبط وامتى وازاي ، وده اجراء طبيعي بيحصل في حالات الوفاة المفاجئة اللي زي دي
ولحد دلوقتي هما بيحاولوا يخلصوا الاجراءات وتصاريح الدفن عشان يقدروا ياخدوا ابنهم ويرجعوا بيه على القاهرة يدفنوه في مقابر العيلة.
وعشان كدامش عارفين يحددوا معاد الجنازة ولا الدفن و حتى العزا لان عبدالله لسة في المستشفى ، وكل ده هيتحدد بعد ما الطب الشرعي ينتهي من التشريح واهله يستملوا جثته وتقرير الوفاة وتصريح الدفن.
لكن التقارير الطبية المبدئية اللي طلعت من مستشفى العلمين اكدت ان عبدالله لما وصل المستشفى كانت متوفي واعضائه كانت متوقفة وانه اتوفى بسبب حاجة اسمها اسفكسيا الغرق ، ودي معناها انه دخل لجسمه مية كتير جدا ملت الرئتين ومقدرش يتنفس لحد ماغرق.
واصحابه قالوا انه اختفى حوالي ساعة في البحر ومكنوش لاقينه لحد ما قدروا يلاقوا جثمانه وطلعوه وكانوا فاكرينه مغمى عليه عشان كدا خدوه المستشفى لكن للاسف كان فارق الحياة والدكاترة في الطوارئ مقدروش يساعدوه.
من وقتها والوسط الفني مقلوب والكل بيواسي النجم حسن يوسف وشمس البارودي في مصيبتهم وبيحاولوا يتواصلوا معاهم بس مش عارفين بسبب الحالة اللي هما فيهم.
كمان الفنانة نهال عنبر راحت جري على مستشفى العلمين اول ما اتأكدت من خبر وفاة عبدالله وفضلت قاعدة هناك اكتر من ساعة لكن مقدرتش تقابل اسرة حسن يوسف لانهم كانوا جم شافوه ومشيوا يخلصوا باقي اجراءات الدفن ، وكمان حسن وشمس البارودي دخلوا في حالة انهيار وصدمة ومقدرش يقعدوا اكتر من كدا في المستشفى جنب جثمان ابنهم
الناس في الاول كانت مش عارفة مين ابن حسن يوسف اللي توفى وكانوا فاكرينه عمر الممثل لانه الوحيد اللي معروف في ولاده ودخل المجال لكن الباقيين ناريمان ومحمود وعبدالله كانوا بعاد تماما عن الفن ، وعبدالله الراحل كان دارس الطيران في اوكرانيا وكمان خد شهادة في الاعلام من جامعة بيروت. الله يرحمه ويصبر اهله.
