كان يراقبها هي في الثانوية، وكانت ينتظر دخولها الجامعة كي يتجرأ ويتقدم لخطبتها، لم تكن تعرف شئ عن الأمر وزيارتها لوالده في عيادته كشفت المستور ما بينهم، أسرار قصة حب هاني الناظر وزوجته ومعلومات ستعرفوها لأول مرة، خاصة إنهم كانوا مع بعض كتف في كتف 40 سنة زواج، حتى رحل الطبيب الإنسان من ساعات.
اللي متابع هاني الناظر هيعرف أد إيه هو محبوب من الناس كلها وده نتيجة طبيعية للي بيعمل الخير ويرميه البحر.. وهو عمل كده ولقى ده في دعوة تجبر بخاطره وقت تعبه الصعب ومعافرته مع الكانسر ولقى ده بردوا في دعوة بالرحمة والمغفرة لما خبر رحيله انتشر على السوشال ميديا والمواقع الإخبارية.
النهاردة دكتور هاني الناظر راح عند ربنا، هاني الناظر اللي كان صاحبنا وأب لينا وأخ لينا اللي كتب أدوية ووصفات لملايين الناس مجاناً اللي كتب فالكومنتات لآلاف أو عشرات الآلاف من غير القادرين وكانت كلمته علطول طيب بس تعالى العيادة.. الراجل اللي كان واهب جزء كبير من وقته ع السوشيال ميديا ساعات طويلة يومياً للرد ع الناس بمنتهى اللطف والود وكتابة أدوية ومساعدات بالمجان.. إنا لله وإنا اليه راجعون.. الله يرحمه ويُحسن إليه كان قدوه لكل إنسان عرفه.. من وقت ما تم الإعلان عن رحيل الدكتور هاني الناظر والسوشيال ميديا مقلوبة عليه بالشكل ده.. نعي وكلمات كلها دعوات بالرحمة والمغفرة والأغلب مش مصدقين خبر رحيله أصلا بالذات إنه كان بدأ يتحسن.. لكن الكل في حالة حزن بلا استثناء وكمان مراته وابنه في حالة صعبة جداً عليه.. والجنازة تم تشييعها في المجمع الإسلامي في الشيخ زايد بجوار مستشفى زايد التخصصي بعد صلاة العصر والساعات اللي جاية الأسرة هتحدد موعد ومكان العزا.
الطبيب الإنسان مع الناس كان بيطبق حديث الرسول صلى الله عليه وسلم رفقاً بالقوارير مع مراته طبيبة الأسنان عزة سري الدين.. عاش معاها في رحمة ومودة وسكينة لحد ما ربنا افتكره.. اللي حصل بيهم في عز الشباب إنها كانت بنت الجيران ومن يوم ما كانت بتروح المدرسة أيام الثانوية عينه وقعت عليها وقلبه دق ومقدرش يقاوم مشاعره.. أبوها المحامي الهُمام كان صاحب أبوه الطبيب الناجح الروح بالروح.. وعشان بردوا تكونوا معانا في الصورة أبو الدكتور هاني الناظر كان طبيب جلدية بردوا ووقتها بنت الجيران راحت عنده تتعالج بما إنهم جيران بقى وكمان الأهل يعرفوا بعض.. كان عندها حبوب الشباب والدكتور قرر يعملها جلسات وقتها.. وهناك خدت بالها من نظرات هاني الناظر والصدفة جمعتهم لأول مرة في العيادة.
الأب شاف ابنه متعلق بيها واستنى لحد ما خلصت ثانوي بفارغ الصبر وراح يخطبها رسمي وهي في أولى طب أسنان.. مع إن قصة الحب بدأت من وهما صغيرين أصلا.. ووقت الخطوبة كان هاني الناظر بيؤدي الواجب الوطني تجاه بلده بيشارك في حرب اكتوبر وقت الخطوبة كانت وعزة سري الدين مكانتش بتعرف تكلمه خالص ويدوب كانت بتطمن عليه من خلال مامته اللي هي حماتها وبعد ما حرب أكتوبر خلصت تمت الجوازة هو كان خطبها سنة 1974 وعقبال ما البلد استقرت خدوا كام سنة حلوين في الخطوبة.
وحسب كلام الدكتورة عزة سري الدين إنها اتعلقت جدا بالدكتور هاني الناظر وهو كان السبب في نجاحها بعد ما دخلت المركز القومي للبحوث.. والدكتور هاني الناظر الله يرحمه كان شايف إن جوازهم نصيب والحب اتولد من الراحة اللي لقياها معاها.. وعشان كده دعمها ووقف في ضهرها.. وخدت منه كل الدعم عشان تكمل مسيرتها العلمية والعملية لحد ما بيتهم في اتنين علماء كل واحد فيهم بيقدر مواقف التاني.. عزة أنجبت من الدكتور هاني الناظر 3 أبناء منهم الدكتور محمد الناظر اللي شغال طبيب جلدية زي أبوه الراحل وهو اللي أعلن خبر تعبه من فترة ورحيله من ساعات.
طبعاً الدكتور هاني الناظر واحد من أشهر الأطباء في مجال علاج الأمراض الجلدية في مصر والوطن العربي وبيظهر في العديد من البرامج التلفزيونية بسبب خبرته الكبيرة في حلول مشاكل البشرة والشعر وهو متخصص في تجميل الوجه والليزر.. وحاصل على بكالوريوس في الطب والجراحة وكذلك دكتوراة في النباتات الطبية ده غير حصوله على ماجستير في الأمراض الجلدية وهو زميل كلية الأطباء الملكية بأدنبرة في انجلترا وكمان بيشتغل أستاذ بالمركز القومي للبحوث في القاهرة.. ربنا يرحمه ويغفر له ويصبر كل أهله ومحبيه على رحيله.
