على وش ولادة وترقص أحسن من دينا، تعمل ميكب وتكسب ملايين وهي في بيتها زوجها يدعمها في الحمل وبيجهز معها كل تفصيلة.. أسرار ويوميات البلوجر دينا داش توأم الفنان أحمد داش مع الحمل.
إزاي دينا داش استغلت التيك توك عشان تكسب الملايين وهي حامل؟.. ليه جوزها بيدعمها وإزاي هتولد وهي عاملة ميكب؟.. إيه أسرار دينا داش مع الحمل واللي أغلبها غريبة على مجتمعنا؟.. كل ده وأكتر هتعرفوه لما تتابعوا الفيديو اللي معايا.
بعد جوازها بسنتين بقت حامل.. سابت شغلها في شركتها واهتمت بالحمل والبيبي وطول الـ9 شهور بتفاجئ المتابعين بفيديوهات رقص ولبس جرئ وتجهيزات وحاجات غريبة عن مجتمعنا وكإنها قررت تبقى شاكيرا الشرق الأوسط.. دينا داش ليها طقوس مع الحمل هنستعرضها معاكم في باقي الفيديو.
أم مش صبورة
ربنا يقومك بالسلامة وتجيبي عيل سليم وكويس ومفيهوش أي مشاكل، إنتي بتحطي إيه على شعرك وليه الماكياج ده كله.. إنتي هتبقي أحلى مامي.. كل دي تعليقات من المتابعين عند دينا داش بعد ما نشرت فيديو ليها وهي بتعمل ميكب وبتظبط شعرها وقالت إن ده يوم في حياة أم مش صبورة.
وإنها الساعات دي بتتقضى بالطول والعرض ومستنية ساعة مفترجة للولادة وعشان كده أي حاجة بتلاقيها قدامها بتطهرها وبتقول على اللي هي فيه ده موضوع مخيف.. واضح كده إن خلاص الساعات الأخيرة مش الأيام بقت معدودة على الصوابع ودينا داش شكلها هتدخل تولد وهي عاملة ميكب والجمهور كله هينبهر من شكلها.. وده واضح في اهتمامها بنفسها والتفاصيل اللي بتعملها كل يوم في حياتها وهي حامل.
بترقص أحسن من دينا
اللي بتعمله دينا داش اليومين دول مش هو البداية دي من أول يوم حمل وهي بتعمل حاجات الكل مستغربها عشان مش بتحصل في المجتمع بتاعها كتير.. الناس بتقول عليها دي شاكيرا وناس تانية بتقول دي بترقص أحسن من دينا.. اللي واضح إن دينا داش مرتبة نفسها لموضوع الحمل ده وشكلها أخرته كل الفترة دي عشان تكون محضرة نفسها كويس وتستغل الـ9 شهور دول أحسن استغلال.
دينا داش بترقص وهي حامل مش فارق معاها بطنها اللي قدامها ولا أي حاجة خالص وممكن تبقى فاهمة إن ده في صالح البيبي أصلا عشان في دكاترة بينصحوا بكده بس في المجتمع بتاعنا مفيش الكلام ده.. آه ده كمان الرياضة من الطقوس اليومية عند دينا داش كل يوم تمارس رياضة الحوامل والفيديوهات اللي بتنشرها أكبر دليل على اللي هي عايشاه.
دعم الزوج
تخيلوا بقى لما تلاقي حد بيدعمك في التفاصيل دي عشان تطلع بأفضل صورة أكيد هتبقوا مرتاحين أكتر نفسياً وده اللي حصل مع دينا داش.. جوزها أكبر داعم ليها بيعد ليها العدات بتاعة التمارين وبيرقص معاها ويتصور عادي عشان ده مفيد لابنه اللي جاي في السكة.. بيجهز معاها كل حاجة خاصة بالبيبي هدوم مستلزمات كريمات شامبوهات كل حاجة.. عشان يقولها أنا في ضهرك ومقدم نموذج كله تقدير واحترام ليها ولنفسيتها في الفترة دي عشان التقلبات المزاجية طبعاً.
أرباح بالملايين
بس كل ده كوم والاستفادة اللي من ورا الفيديوهات اللي بتتوثق دي كوم تاني.. طبعاً الناس عارفة إن دينا داش بلوجر ليها اسمها وشغلها ودايما بتشجع البنات متقعدش في البيت وتنزل تشتغل وتعمل لنفسها كيان خاص بيها.. دينا عندها شركتها الخاصة ولما بقت حامل وقعدت في البيت تنتبه للحمل والبيبي الناس قالوا خلاص دي بقت ست بيت واللي بتنصح بيه مش بتعمل بيه.
بس العكس كله حصل.. دينا داش بتتابع شغلها في شركتها زي ما هي بس أهو كله إشراف وبس وجوزها بيدعمها ويساعدها.. وغير كده بقى دينا استغلت التيك توك في الفيديوهات اللي بتعملها دي وبتكسب من وراها ملايين كل ما تحقق مشاهدات أكتر.. دينا عارفة بتعمل إيه كويس ولو المتابعين اتعلموا منها يعملوا زيها كده المجتمع مش هيشوف الرقص غريب ولا اللبس اللي بتطلع بيه ولا الماكياج اللي بتعمله ولا أي حاجة حصلت غريبة.. كل اللي عملته دينا ثقافة ودراسة وعرفت تستغل فترة حملها بشكل كويس ولسه بقى لو المحتوى ده كمل وهي أم بقى ومعاها بيبي هتبقى في حتى تانية خالص.
