فيديو مدته 360 ثانية نشرته صاحبة محل أميرة الذهب المشهور كشف عن خطة 3 سيدات قاموا بسرقة الذهب من محلها؟، لكن يا ترى كيف فعلوا ذلك والمحل به كاميرات؟ وهل قبضت عليهم الشرطة؟ تابعونا لمعرفة التفاصيل:
تقريبا كل عشاق الدهب يسمعوا عن أميرة الدهب ومتابعينها دايما واللي اتشهرت جدا بالعروض اللي بتقدمها على الدهب والفيديوهات اللي بتعملها على صفحتها لمتابعيها.
واليومين اللي فاتوا أميرة الدهب بقت ترند وحديث كل السوشيال ميديا وده بعد ما عرضت فيديو على صفحتها بيكشف خطة 3 سيدات لسرقة محلها
طيب إزاي عملوا كده؟ كاميرات محل أميرة الدهب قدرت إنها توثق لحظات سرقتهم للمحل بالتفصيل، وده بعد ما اتفقوا إن واحد فيهم تبدأ تختار ما بين مجموعة خواتم مختلفة.
والاتنين التانين بدأوا يلهوا البياع بكلامهم معاه لحد ما قدرت وبخفة يد تسرق خاتمين، واحد حطته في بوقها وهي بتكلم وبعد شوية خرجته في ايديها وحطته في شنطتها.
وبعدها اخدت التاني وبسرعه حطته فـ شنطتها، كل ده والجواهرجي قاعد بيفرجها على تشكيلة جديدة وده لأنه تخيل إنها بتشتري فعلا وزي ما بيقولوا مديهم الأمان!
وبعد شوية بصت للستات اللي معاها عشان يتحركوا ويمشوا بسرعه وده بعد ما انتبهت إن في واحد من الموظفين الموجودين في المحل نبه زميله اللي كان واقف معاهم وقاله خلي بالك وده لأنه طبعا كان شايف زحمة ودوشة في المحل، وفعلا اتنين منهم مشيوا.
وفضلت واحدة مع البياع لدقايق وطلعت رزمة من الفلوس وقعدت تعدها قدامه وده عشان توهمه إنها هتشتري بجد وفعلا الـ 3 ستات دول نزلوا ورا بعض وبسرعه البرق اختفوا.
وطبعا أميرة الدهب اكتشفت الخطة اللي اتعملت عليها وطلعت في فيديو على صفحتها وقالت إنها قدمت بلاغ للشرطة، وناشدت كل متابعيها لو يعرفوا الستات دول يبلغوا بأوصافهم وكان واضح عليها إنها زعلانه جدا من اللي حصلها.
وقالت بالنص:” حسبي الله ونعم الوكيل في كل اللي يسرق شقا ناس ستات، للأسف حرامية سرقوا من محل أميرة الدهب اللي يقدر يوصلهم يتواصل معانا أو يبلغ عنهم، واشتروا مننا الصبح للتشويش على السرقة، ودي كانت الزيارة التانية للمحل في نفس اليوم.
وقالت: يا ريت أصحاب المحلات يخلوا بالهم ودي صورهم علشان لو حد تعرف عليهم وشاركوا الفيديو يا جماعة يمكن ميعرفوش يأذوا حد بعد کده.
لكن الأجهزة الأمنية مسكتتش وبعد ساعات قليلة أعلنوا في بيان رسمي نشرته المواقع الإخبارية إنهم يقبضوا على السيدات اللي نفذوا عملية السرقة دي.
وأكدت الأجهزة الأمنيه إن السيدات اللي ارتكبوا الواقعة دي ليهم معلومات جنائية وواحدة منهم بالفعل مطلوبة للتنفيذ وعليها 9 أحكام قضائية.
ده غير كمان إن في شخصين كانوا بيساعدو الـ 3 ستات دول في تنفيذ خطتهم دي وكان معاهم وقت ما اتقبض عليهم مبالغ مالية ومشغولات ذهبية مسروقة .
و بمواجهتهم اعترفوا بتكوين مجموعة اتخصصت في سرقات محلات الدهب، باستخدام عربية ملك لشخصين اللي بيساعدوهم وطبعا الأجهزة الأمنية أخذت معاهم كل الاجراءات القانونية.
دلوقتي قولولنا رأيكم في اللي حصل في محل أميرة الدهب وهل شايفين إنها اتصرفت معاهم صح؟
