ترافيس سكوت وصل مصر وتصور في الأهرامات أيضا وهو يشرب سجائر، الشركة التي تنظم الحفل تتحدى كل الجهات وبتقول الحفل في ميعاده.. كيف؟
شاعر غنائي شهير اتورط في حكاية وصوله؟ وهل اتصور في الأهرامات فعلاً؟ ورقم تكلفة الحفلة دي محدش هتصدم ناس كتير.. أسرار وكواليس جديدة عن حفل ترافيس سكوت في مصر هتعرفوها معايا في الفيديو ده.
محدش ليه سيرة دلوقتي إلا على حفل مغني الراب الأمريكي ترافيس سكوت والشركة اللي هتنظم الحفل بتقول كل التذاكر اتباعت وخلاص استنوا الحفلة يوم 28 يوليو زي ما وعدناكم.. ومحدش عارف إزاي ده هيحصل وأصلا نقابة الموسيقيين مدتش تصريح بالحفلة دي أساساً.. تحديات كتيرة بتواجه الحفلة دي ومحدش عارف مصيره إيه.
تعليق الحفل
حفل ترافيس سكوت لحد دلوقتي محدش عارف مصيره ولسه متعلق لا منها في تصريح رسمي ولا منها الموضوع اتلغى خالص وكلها أيام قليلة جداً على الحفل.. وكمان عالم الآثار زاهي حواس مستغرب إن الحفل ممكن يتلغي خالص وبيقول إنه كان في جدة جنب مكة وعمل حفلة كبيرة هناك.
وكمان مستغرب من اللي بيتقال عن الحفلة والطقوس الغريبة اللي بتحصل في حفلات سكوت واللي الناس بتتكلم عنه ده هو اللي غريب تأثير إيه في المصريين ده حتى المصريين نفسهم متأثروش بالفرنسيين يعني حفلة هي اللي هتعمل كل اللي متعملش.. أكيد لينا عاداتنا وتقاليدنا اللي محافظين عليها.
وصل ولا موصلش
الكلام الساعات اللي فاتت عن إن ترافيس سكوت وصل مصر وفي ترحيب كبير بيه والناس على السوشال ميديا خلاص اتأكدوا إن سكوت وصل مصر واتقال إنه هيعمل حفلته في الأهرامات خلاص.
ده حتى في صورة متداولة ليه وهو في الأهرامات والناس بترحب بيه وإنه بيروج للسياحة في مصر.. لكن بحسب القاهرة 24 في تصريحات من المهندس محمد سراج المسؤول في تيكيتس مارشيه Tickets Marche اللي هتنظم حفل ترافيس سكوت قال فيها إن الصورة المتداولة للمغني في الأهرامات متفبركة ومش حقيقية خالص.. ده كمان ترافيس موصلش مصر لحد دلوقتي.
تورط شاعر غنائي
الغريبة بقى إن الشاعر الغنائي خالد تاج الدين اتورط في وصول ترافيس سكوت مصر وقال في بوست ليه على حسابه في فيسبوك إنه بيرحب بترافيس سكوت وقالت كده في كلامه.. لحد ما واحد من المتابعين قاله هو ترافيس سكوت وصل مصر قاله آه.. ومن هنا بقى الناس اتكلمت عن وصوله والصورة المتفبركة في الأهرامات.
الغريبة إن الشركة اللي بتنظم الحفل عملت كل الاستعدادات الأيام اللي فاتت وهيتعمل في معاده يوم 28 يوليو الشهر ده بس نقابة الموسيقيين كان ليها تعليق على التجهيزات دي من خلال محمد عبدالله المتحدث الرسمي باسم نقابة المهن الموسيقية وقال في تصريحات ليه مع القاهرة 24 إن الشركة المنظمة مخدتش موافقة من الجهات الأمنية ولو معاهم موافقة أمنية كانوا طلعوا قالوا.
صدمة التكلفة
كمان المدير التنفيذي لشركة تيكيتس مارشيه Tickets Marche اتكلم عن تكلفة الحفل ده ويعتبر نوع من أنواع الصعبانيات شوية عشان تفادي الخسارة مثلاً وقال ده التكلفة لحد دلوقتي 11 مليون دولار وده يعاد 350 مليون جنيه مصري.. وكل ده ومخدناش موافقة وتصريح رسمي من الجهات المعنية لإقامة الحفل.
تفتكروا حفل ترافيس سكوت في مصر هيتعمل ولا لأ بالذات إن فاضل يومين تلاتة بالكتير على الحفلة دي؟ اكتبولنا آرائكم في التعليقات.
