الملياردير خلف الحبتور عاد من جديد يتصدر الترند في مصر وهذا لأنه قال تصريحات مهمة جدا فيها رسائل كثيرة للشعب المصري منها إنه قرر يستثمر في مصر مع جهة حكومية.
فـ ياترى إيه هي المشروعات اللي ناوي يعملها الحبتور في مصر وهل هتكون زي المشروعات اللي عملها قبل كده بالفعل ولا قطاعات تانيه هنسمع عنها لأول مرة؟
الملياردير الإماراتي خلف الحبتور طلع واتكلم وقال كام تصريح عن مصر قلب بيهم الدنيا منهم إنه مهتم بالاستثمار في مصر، وده مش في أي مشروعات والسلام ده مركز على المشاريع اللي أعلنتها الحكومة من خلال الصندوق السيادي.
ولو متعرفش مين هو خلف الحبتور فـ ده من أشهر رجال الأعمال في الشرق الأوسط وهو إماراتي وعنده مجموعة اقتصادية كبيرة بدأها بشركات عقارية.
لكن الحبتور مكتفاش بالمجال العقاري ودخل بشراسة في مجالات تانيه كتير زي الضيافة والسيارات والتعليم، وبقت مجموعة الحبتور بتمتلك حاليا 14 فندق في دول كتير زي الإمارات والولايات المتحدة والمجر ولبنان والنمسا وبريطانيا الله طيب هو إيه حكاية الصندوق السيادي ده وليه الحبتور يعني مهتم بيه أوي كده ؟
في الأول لازم تعرف إن الصندوق السيادي ده عبارة عن صندوق عملته الحكومة عشان تستغل أصول مصر أحسن استغلال ومنها الأصول العقارية اللي بيتم إخلاؤها دلوقتي مع خطة الدولة لنقل الوزارات لـ العاصمة الإدارية خصوصا في منطقة وسط القاهرة
والحكومة بتعرض الأصول دي على مستثمرين عشان تطورها وتستفيد منها وتحولها لـ فنادق ومنشآت سياحية
شوف ياسيدي رجل الأعمال خلف الحبتور قال إنه مهتم بشكل أساسي في الاستثمار في تنفيذ المشروعات المطروحة من خلال صندوق مصر السيادي
وفي تصريحات صحفية قالها وهو بيفتتح مكز حبتور للأبحاث في مصر قال إنه لحد دلوقتي معملش أي مفاوضات أو مباحثات مع الصندوق السيادي أو ناقش الفرص المتاحة
لكن اللي يطمن إنه قال إن السوق المصري بيتميز بالفرصة الجيدة في كل القطاعات، وسبق علق على منطة الساحل الشمالي وقال إن المنطقة دي جيدة وفيها استثمارات واعدة للغاية وعندها مستقبل كتير
ولما اتسأل عن قيمة الاستثمارات اللي ناوي يضخها في مصر من جانب مجموعته في السوق المحلي، رفض يحددها وقال إنه لسه مأخدش أي خطوات فعليه في الموضوع ده وعشان كده مش هيقدر يعلن عنها
قصة المركز الذي افتتحه الحبتور في مصر؟
شوف ياسيدي ده مركز أبحاث اسمه مركز الحبتور للأبحاث ورجل الأعمال الإماراتي قال إن الهدف من انشاءه هوإنه يكون موجود في مصر مؤسسة بحثية بتخدم الثقافة والفكر العربي بمواصفات عالمية .
وقال إنه في المستقبل المركز ده هيخدم شباب مصري كتير وده عن طريق تدريبهم والاستفادة من طاقتهم وهيساعدهم في مجال الدراسة البحثية.
ومن فترة مش بعيدة اتكلم الحبتور عن خططه للاستثمار في مصر، وقال إنه عايز يطور منطقة صلاح سالم، بحيث انها تتحول لمشروع استثماري ضخم يسدد ديون مصر وكمان يغنينا عن القروض!
وبردو كان اتكلم وقال إنه عايز يبنى مجمع جوة مصر زي الحبتور سيتي كده، وده عشان يضم فنادق وابراج سكنية وتجارية وملاعب، وده باستثمارات 8.5 مليار دولار.
بس لغاية دلوقتي لسة مفيش حاجة اتنفذت على أرض الواقع فـ تفتكروا بقا الحبتور هينفذ كلامه ويعمل المشروعات دي كلها وإزاي مصر هتستفيد منها؟
