مفاجآت بالجملة من نجيب ساويرس للمصريين، ونصيحة مهمة كشفها الملياردير لكل واحد يضع أمواله في الذهب أو يفكر يشتريه.. فياترى ماذا قال عن الدولار؟ وما الغلطة التي فعلها والده زمان؟!
لسة الناس كلها بتتكلم عن صفقة راس الحكمة واللي عملته في الدولار وكمان الدهب، بس نجيب سايرس ليه رأي مختلف شويتين تلاته ولما اتسأل عن انهيار الأخضر في السوق الموازية قال كل الكلام ده في الهجايص لأن الفلوس لسه موصلتش”.
عشان كده تصريحه صدم ناس كتير وخلاها تقلق وتسأل هل معنى كده ان الدولار هيزيد تاني؟
بص ياسيدي ، الملياردير المصري نجيب ساويرس شايف إننا هنعرف سعر الدولار الحقيقي لما تدخل اول دفعت من فلوس الصفقة، وكمان الحكومة توافق على الاعتمادات المتأخرة في البنوك، واللي تعتبر شرط ضروري عشان يتم الإفراج عن البضايع المركونة في المواني وكمان استيراد المواد الخام المطلوبة لتشغيل السوق.
يعني من الاخر كده.. محتاجين الفلوس تدخل الأول ونشوف السوق محتاج دولار قد إيه ، وبعدها هنعرف الدولار هيبقى بكام، بس ده مينفيش برضه ان ساويرس بيشكر في صفقة راس الحكمة وشايف انها صفقة مش هتكرر وهتعمل استقرار كبير في سعر الصرف، بس لو الصفقة دي اتعرض عليها شخصيا مش هيقبلها.
وهنا تظهر ألف علامة استفهام وطبيعي تسأل ساويرس بيفكر إزاي؟
بص ياسيدي ، ساويرس اتكلم بكل صراحة في مداخلة تلفزيونية مع برنامج الإعلامي سيد علي، وقال أنا راجعت صفقة رأس الحكمة، ولقيت إن سعر الأرض أعلى من اللي إحنا إشترينا به كشركة في نفس المنطقة، فلما الجانب الإماراتي يجي يشتري منك الأرض وبعدين يدخلك معاه شريك بـ35%، يبقى ده أمر ميتصدقش لان إحنا نفسنا مبنديش الحكومة أكتر من 27%.
كمان الإمارات هادفع 24 مليار دولار بس في الأرض.. وعلشان تبني محتاجة 3 أو 4 أضعاف الرقم اللي دفعه في الأرض، وبالتالي الفلوس دي كلها هتبقى في مشروعات داخل مصر، واستثمارات قوية لصالح البلد، يعني هما دافعين 24 مليار دولار ثمن الأرض ومع ذلك دخلوا الحكومة كشريك بـ35%.
وبصراحة أنا لو اتعرض عليا الصفقة دي ماخدهاش، الصفقة دي فيها جانب إنساني وأشقاء بيساعدونا وشعب طول عمره بيحب مصر
عشان كده ساويرس بيأكد إن صفقة راس الحكمة صفقة فريدة من نوعها خصوصا ان فلوسها هيعمل سيولة دولارية ويخلينا نقدر نسدد كل اللي علينا ونفتح الاعتمادات للناس اللي شغلها واقف، ونقدر نوصل لسعر الدولار الواقعي ودي مؤشرات مالية.
والسؤال بقى ، في وسط القلق اللي مسيطر على العالم كله برة وجوة، إيه أحسن استثمار من وجهة نظر ساويرس؟..
المفاجأة ان نجيب ساويرس نفسه خسر 252 مليون دولار الفترة الأخيرة، يعني حوالي ربع مليار دولار، بس رغم كده قال أنا رأيي واضح لو حد ثروته مثلا 100 جنيه، يخلي معاه 25 جنيه كاش علشان الزنقة، و25 جنيه يشتري عقار علشان الزمن وفيه أمان للمستقبل وثمنه بيزيد، و25 جنيه لشراء الذهب، و25 الاستثمار في أرض زراعية أو شركة زراعية مع ارتفاع أسعار الأكل واللي عنده فدان بيزرعه بيكسب منه كويس.
ده حتى ندمان على غلطة عماتها العيلة زمان وقال أنا عيلتي كان عندها فدادين في سوهاج وباعتها بـ 50 و100 جنيه، تروح تشتري فدان دلوقتي بـ5 ملايين جنيه، لو كان خلوا الأرض كلها كانت فرقت، بس أبويا مكنش بيحب الزراعة وباع الأرض كلها.
انت بقى رأيك إيه كلام نجيب ساويرس؟ وشايف الدولار هيبقى بكام؟
