لابس مايوه وراكب سيارة بوجاتي المعروفة بسعرها الخيالي! هذا هو الفيديو الذي انتشر انتشر لرجل الأعمال محمد ابو العينين خلال الساعات الأخيرة، وما أدراك من هو محمد ابو العينين؟
فياتري ايه حكاية الفيديو اللي قالب مصر؟ وايه سر العربية اللي ظهر بيها؟ وأصلا إزاي رجل الأعمال الشهير جمع ثروته؟
“شاهد محمد ابو العينين بالمايوه في باريس بسيارة بوجاتي” ، هو ده عنوان الفيديو اللي انتشر على صفحات السوشيال ميديا، والكل بيتكلم عنه بعد ماظهر فيه رجل الأعمال الشهير وهو راكب سيارة فارهة من طراز بوجاتي فيرون سبورت.
وحسب موقع صدى البلد، سيارة “بوجاتي فيرون سوبر سبورت” تابعة للشركة الفرنسية بوجاتي وظهرت لأول مرة في 2011، وسعرها في 2021 وصل إلى 2.5 مليون دولار، يعني لو حسبناها بسعرالدولار د لوقتي سعرها هيعدي 77 مليون جنيه.
بس حسب صدى البلد سعر سيارات بوجلتي دايما بيزيد، وأثرياء العالم بيتيةيابقوا عشان يشتروا نسخها القليل، لأن موجود منها 300 نسخة بس في العالم
وعلى فكرة محمد ابو العينين هو صاحب مجموعة صدى البلد الإعلامية، وظهوره الأخير خلى الناس تسأل عن ثروة محمد ابو العينين وجمعها إزاي؟
بص ياسيدي ابو العينين هو مؤسس ورئيس مجموعة كليوباترا، واحدة من أكبر الشركات في مصر وشغلها الأساسي في صناعة السيراميك والأدوات الصحية، وبتصدر منتجاتها لأكتر من 100 دولة حسب الموقع الرسمي للمجموعة.
ومحمد ابو العنين خريج تجارة حلوان سنة 1973، وبعدها بسنة بدأ حياته في البزنس بتأسيس شركة للاستيراد والتصدير في السوق الليبي.
بس في 1976 رجع مصر عشان يفتح شركة لاستيراد السيراميك الإيطالي، ومع الوقت بدأ يجهز نفسه لصناعة السراميك جوة مصر، وفعلا في 1983 كان بيفتح أول مصنع لمجموعة سيراميكا كليوباترا في مدينة العاشر من رمضان.
وتعالى بقى للوقت الحاضر هتلاقي المصنع الواحد بقى 17 مصنع بيكونوا إمبراطورية سيراميكا كليوباترا: تالت أكبر شركة لإنتاج السيراميك في العالم، حسب الموقع الشخصي لمحمد ابو العينين، اللي مكتفاش بصناعة السيراميك وبس، ده دخل بتقله في كل حاجة، وعد معايا ياسيدي:
مجموعة كليوباترا للتنمية الزراعية ، ودي متخصصة في استصلاح الأراضي وتصدير منتجاتها من الفاكهة والخضروات إلى الدول الأوروبية والأسيوية والعربية.
وعندك كمان: كليوباترا للمشروعات العقارية، ودي تمتلك مشروعات سكنية فاخرة في مدن الشروق و6 أكتوبر ده غير المولات الضخمة في القاهرة اسكندرية.
وحتي التكنولوجيا مفلتتش من تحت ايده، لأنه أسس اول مصنع في مصر والشرق الأوسط وأفريقيا لصناعة الكروت الذكية
واللي متتوقعوش بقى ان ابو العينين شغال في بيزنس الطيران، اه والله زي ماسمعت: هو فتح شركة اسمها كليوباترا للطيران، وشغالة في صيانة الطائرات، وطيران رجال الأعمال.
وطبعا واحد زي ابو العينين لازم يحط فلوسه في السياحة، الفرخة اللي بتبيض دهب لكل المستثمرين في مصر، وعشان كده عنده منتجعات فاخرة في شرم الشيخ ومرسي مطروح.
ولو فاكر ان ابو العينين بتاع اقتصاد وبس تبقى غلطان طبعا، لأن رجل الأعمال الشهير نجح يجمع بين اهم حاجتين: الفلوس والسياسة.
وحسب اليوم السابع، هو عضو في مجلس النواب من سنة 1995، يعني بنتكلم في 28 سنة تقريبا.
وهو دلوقتي مش عضو وبس، ده وكيل مجلس النواب، وزي ماقلنا في أول الفيديو هو صاحب قناة صدى البلد اللي من أشهر المذيعين فيها أحمد موسى.
ولو هنرجع لفيديو العربية، ف لغاية دلوقتي مفيش اي معلومة رسمية تأكد انها بتاعته، فهل تفتكروا مع حجم شركاته، هيبقى طبيعي ان محمد ابو العينين يشتري عربية ب 77 مليون جنيه؟ ولا برضه السعر غالي اوي؟
