الحكومة كانت أعلنت من فترة عن بعض القرارات الهامة التي سيتم تطبيقها في شهر يوليو القادم، وهذا سيكون بالتزامن مع تطبيق الموازنة الجديدة للعام المالي 2023/2024.
بس السؤال هنا: إيه هي القرارات دي؟ وإيه مصير أسعار الكهربا الفترة الجاية؟ وهل هيتم إلغاء الدعم الاستثنائي؟
كلها أيام ويدخل علينا شهر يوليو ويتم تطبيق الموازنة الجديدة، عشان كده الحكومة كانت أصدرت بعض القرارات اللي هتتنفذ في شهر 7 طبقا للموازنة، بس يا ترا إيه هي القرارات اللي هيتم تطبيقها الشهر الجاي؟
بص يا سيدي بحسب موقع الشروق، بدء من شهر يوليو هيتم تطبيق الزيادة المقررة على شرايح الكهربا في المنازل، وده بعد ما أتأجلت 4 مرات تقريبا، بسبب الضغوط الإقتصادية اللي اتعرضت ليها البلد خلال السنين الأخيرة وده دفع الحكومة بالتراجع عن فرض أي زيادة جديدة على أسعار الخدمات
لكن السؤال هنا: أسعار الكهربا هتزيد قد إيه؟
حسب قناة العربية، الزيادة المتوقعة في أسعار الكهربا هتكون بنسبة 20%، وهتتراوح بين 5 و 10 قروش في الكيلو وات، وبكده الشرايح التلاتة الأولى هتزيد بقيمة 10 قروش لكل كيلو
والشريحة الرابعة والخامسة هيزيدوا بقيمة 5 و 6 قروش، أما بقى الشريحيتن السادسة والسابعة فمش هيكون عليهم أي زيادة لأنهم مش بيتمتعوا بأي دعم
ومن المقرر أن الدكتور محمد شاكر وزير الكهربا، يعقد مؤتمر صحفي للإعلان عن خطة الوزارة في التعامل مع القرارات الجديدة
أما بقى بالنسبة للقرار التاني اللي هتطبقه الحكومة في يوليو فهو بقى خاص بالدعم الأستثنائي للأسر الأولى بالرعاية على بطاقات التموين، و اللي تم إقراره في سبتمبر 2022 ومن خلاله بيتم صرف سلع بقيمة 833 مليون جنيه شهريا وبيستفيد منه حوالي 64 مليون مواطن، وده حسب اليوم السابع
ومن المفترض أن الدعم الأستثنائي بيتراوح بين 100 و 300 جنيه على كل بطاقة، لكن حسب وزير التموين الدكتور علي المصيلحي حزمة المساعدات الاستثنائية هينتهي العمل بيها في نهاية شهر يونيو الجاري
وبعدها يرجع تاني بقيمة 50 جنيه شهريا للمواطن إذا كان عدد الأسرة 4 أفراد و25 جنيه للفرد الزيادة
ولحد دلوقتي مفيش أي معلومات عن إمكانية مد الصرف من عدمه لكن ده كله هيتحدد في اجتماع مجلس الوزرا الجاي
أما بقى القرار التالت فهو هيكون بخصوص دعم المواد البترولية، وده لأن لجنة التسعير التلقائي للمشتقات النفطية هتعقد اجتماع لتحديد أسعار البنزين والسولار خلال الربع الأول من العام المالي الجديد، وده يجي بعد قررها في اجتماعها الأخير خلال شهر مايو بتثبيت أسعار البنزين وزيادة السولار
وعلى فكرة، منشور إعداد الموازنة الجديدة الحكومة عززت فيه مخصصات دعم المواد البترولية في العام المالي جديد لـ 119 مليار و4 مليون جنيه، مقابل 58 مليار جنيه في موازنة 2022/2023، وده عشان تعوض أثر الزيادة المحتملة في الأسعار العالمية كمان عشان تخفف العبئ عن المواطن
متنساش كمان أن شهر يوليو الجاي هيكون شهر خير للموظفين وده عشان هيضم أكتر من زيادة في المرتبات منها اللي أقرها الرئيس عبد الفتاح السيسي في شهر إبريل اللي فات، بالإضافة للعلاوة الدورية اللي هتكون بحد أقصى 7% لجميع العاملين بالجهاز الإداري للدولة
ودلوقتي قولنا رأيك في قرارات الحكومة في يوليو؟
