حياتها الخاصة مليئة حوارات وتحاول تعمل موف اون بعد انفصالها عن زوجه، ورغم انها صغيرة في السن والحياة أمامها إلا أن منة عرفة أصيبت باكتئاب في سن صغير وكانت تعالج وتأخذ ادوية.
بس دلوقتي حياتها اتغيرت وبدأت تفكر في نفسها وتعمل اللي يسعدها وبعدت عن كل الناس في حياتها ،، ايه اللي حصل لمنة عرفة ؟
الست بعد الانفصال بتمر بأسوأ فترة في حياتها ، وهو ده اللي حصل لمنة عرفة بعد ما انفصلت عن جوزها محمود المهدي السنة اللي فاتت ، وعاشت فترة سيئة لكن بتحاول تساعد نفسها وتخرج منها وتكون احسن ، وده واضح عليها الفترة الاخيرة واللي مقضياها سفريات وفسح ، ورحلات في المالديف وعايشة حياتها على الاخر.
محدش فينا ينسى شقاوة البنوتة الصغيرة منة عرفة اللي كلنا حبناها من وهي طفلة مع اشرف عبد الباقي واحمد حلمي، وفجأة مرت السنين ولقينا البنوتة دي بقت انسة حلوة وجميلة وكلت الجو من فنانات كتير على الساحة بجمالها وشقاوتها برضه.
وبدأت منة ترجع بقى للدراما بس المرادي في دور الفنانة الشابة الحلوة ، وخدت خطوات كتير في مشوارها الفني لكن للاسف حياتها الشخصية كانت متوترة وعندها مشاكل كتير مع اسرتها وفي علاقاتها العاطفية.
منة ومحمود المهدي قصة عاشها الجمهور كله مع منة عرفة لان تفاصيلها كانت على الملأ ، وقعدنا سنتين نسمع عن مشاكل وانفصال ورجوع وحوارات كتير جدا حصلت بينهم لحد ما في النهاية سابوا بعض فعلا.
هما الاتنين حبوا بعض واعلنوا ارتباطهم رسمي من في 2021 ، وبعد ما كتبوا الكتاب وهما بيجهزوا للفرح وبيستعدوا خلاص حصل بينهم مشكلة ومحمود طلع كتب على انستجرام انهم انفصلوا بس لمح بتلميحات مش حلوة وقال : الناس اللي بتتصل وتسأل خلاص كل حاجة قسمة ونصيب، وأنا كراجل شرقي صعيدي، فيه حاجات مش هتنفع معايا، وهتوقفها عن شغلها وحلمها وأصدقاءها في الوسط الفني، فأكيد مش هقف في دا، وربنا يكرمها في المجال الفني، وتوصل أعلى حاجة فيه
محمود كان ضد شغل منة عرفة خاصة انها كبرت واحلوت والعين عليها ، وبدأ يضايق من بعض الادوار اللي بتجيلها ومكنش عايزها اصلا تكمل في التمثيل لكن هي مكنش عندها استعداد تضيع كل اللي عملته في الهنة من وهي طفلة لحد ما بقت فنانة شابة.
والدنيا اتلمت ورجعوا لبعض ، وهوووب خناقات وانفصلوا للمرة التانية بس المرادي كان انفصال مش على الورق ، وده كان بسبب مشهد جرئ بين منة عرفة والفنان محمد نجاتي، وكانت قصة الناس حكيت واتحاكت فيها ، وجوزها كان مضايق من المشهد وحصلت مشكلة بينهم وبين الفنان نجاتي.
اما بقى الانفصال التالت والاخير ده اللي كان صادم لان محمود المهدي كتب كلام جرئ وكشف كتير من اسرار علاقته بمراته واهلها واللي بيحصل بينهم وقال تم الطلاق خلاص للأسف، وكان في عدم اخلاص وامانة وعدتها، واتضحك عليا في أول الجوازة وقتها عشان أحافظ على بيتي وسكت.. وغير أمها سبب خراب البيت بسبب الفلوس عشان هي اللي كانت بتصرف عليها منة، وبسبب إني كنت رافضها تشتغل في المجال ده وأمها ما كانتش عندها مانع تتنازل في المجال مقابل الفلوس، بس كل حاجه بالدليل فضلت تحاول لحد ما خربت البيت “.
ودي كانت النهاية وانفصلت منة عرفة فعلا عن محمود المهدي، لكن لما طلعت في لقاء تلفزيوني قالت انها لسة بتحبه وزعلانة عشان فجأة الشخص اللي بتحبه بقى مش موجود في حياته ودي حاجة صعبة على اي حد ، ده احنا لو مربين قطة وماتت بنزعل عليها.
لكن الوقت دايما هو اللي بينسينا اي حاجة ومنة عرفة قدرت تعمل موف اون ومتالقة ومسافرة كل يومين في حتة ، وبتشنر صور وفيديوهات كتير على انستجرام وهي عايشة حياتها ، مرة في الساحل ومرة في المالديف ، ده غير الاعلانات اللي بتعملها لمنتجات كتير وتروجلها على حسابها الشخصي ، لكنها بعيدة شوية عن الوسط وعن الناس اللي كانوا اصحابها وقافلة على نفسها وبتعوض اللي فاتها ومش عايزة تدخل في مشاكل وحوارات تاني لحد ما يجيلها نصيبها خاصة وانها لسة صغيرة والعمر لسة قدامها.
