ما رأيك لو تضع فلوسك في البنك وتأخذ مكسب 20.٪ ومتقلقش نحن هنا لا نتكلم عن شهادة ادخار هتضطر تضع فلوسك فيها لمدة 3 سنين، لا فانت فلوسك حاضرة وممكن تاخدها في اي وقت.
فياتري ايه التفاصيل والشروط؟
في الفترة الأخيرة، المنافسة بين البنوك بقت شديدة، وكل بنك بيحاول يحافظ على العملا بتوعه وكمان يجذب عملاء جدد، وده عن طريق طرح منتجات بفايدة مرتفعة.
وهنا بقى ييجي الكلام عن واحد من أهم المنتجات دي وهي حسابات التوفير، وخلينا نبدأ الأول بحساب التوفير في بنك مصر
وتقدر تفتح حساب التوفير بحد أدنى 3000 جنيه مصري، مع حرية في اختيار دورية صرف العائد ما بين شهري أو ربع سنوي أو نصف سنوي أو سنوي، والعائد الشعري بيوصل إلى 8% حسب رصيد الحساب.
وبيوفرلك بنك مصر تنفيذ معظم معاملاتك البنكية مجاناً من خلال خدمة الإنترنت البنكي، وكمان إمكانية فتح حساب مشترك باسم أكتر من شخص.وبرضه من حقك إصدار بطاقة خصم فوري على الحساب وكل البطاقات الائتمانية بضمان حساب التوفير.
وتقدر تطلب تحويل المرتب أو المعاشات اوتوماتيك للحساب الخاص بيك بناء على رغبتك، وممكن برضه تخلي البنك هو المسؤول عن سداد الالتزامات المختلفة نيابة عنك عن طريق الخصم من الحساب.
ونيحي بعد كده لبنك القاهرة اللي بيقدملك حساب «ميجا توفير» مع تأمين مجاني على الحياة، وده متاح للعملا من سن الـ18 لغاية بلوغ العميل 60 سنة.
والحد الأدني لفتح الحساب 1000 جنيه، بس خد بالك، الأحد الأدنى لاحتساب أي عائد هو 5000 جنيه.ودورية صرف العائد تكون شهرية، ونسبة العائد الشهري تترواح بين 3.25% و7%، حسب المصري اليوم
أما تالت بنك معانا فهو البنك التجاري الدولي CIB اللي بيقدملك خدمة فتح حساب توفير بحد أدنى لفتح الحساب 100 جنيه بس ويتم صرف العائد شهريا، بنسبة فايدة تصل إلى 7.5%، حسب المصري اليوم
اما آخر بنك معانا فهو البنك العربي الأفريقي واللي بيقدملك فايدة على حساب التوفير تصل إلى 20% مرة واحدة والسر في حساب جولدن بلس.
وفي البنك العربي الأفريقي انت تقدر تفتح الحساب من غير مصاريف، بس في مصاريف دورية 15 جنيه.ومن حقك تحدد دورية العائد اللي انت عاوزها سواء كانت دورية العائد الشهرى18% أو دورية العائد الربع السنوى 18.5٪ أو دورية العائد النصف سنوى 19 % أو دورية العائد السنوى 20%.
بس لازم تعرف إن الحد الأدنى لفتح حساب التوفير جولدن بلس هو 250,000 جنيه، والحد الأدني لاحتساب العائد مبلغ 50000 جنيه.وبيتم احتساب العائد على أقل رصيد في خلال الشهر من يوم 1 إلى آخر يوم في الشهر.
وبالنسبة للأوراق الأساسية المطلوبة لفتح الحساب فهي البطاقة الشخصية سارية أو جواز السفر سارى، مع تقديم بيان الدخل، إيصال مرافق زي فاتورة غاز او كهربا او مياه.
وزي ماقلنا في البداية، أهم ميزة في حسابات التوفير انك تقدر تسحب فلوسك في اي وقت، لكن في شهادات الادخار لازم تستنى 6 شهور على الاقل من تاربخ الشراء.
والمشكلة انك لو كسرت الشهادة قبل انتهاء مدتها ولتكن 3 سنين مثلا، ساعتها هتخير جزء من فلوسك وهيتفرض عليك غرامة اسمها غرامة الاسترداد والبنك اللي بيحدد قيمتها حسب معاد استرداد الفلوس، ودلوقتي قولنا لو انت معاك مبلغ عاوز تحطه في البنك هتفضل شهادات الادخار ولا حسابات التوفير؟
