خلف الحبتور هيشتري الزمالك! من منا لم يسمع أو يقرأ هذا الخبر، الذي انتشر بصورة كبيرة خلال الأيام الماضية، وبدأت الأخبار تزيد مع زيادة الملياردير خلف الحبتور لمصر، فماذا قال عن الزمالك وهل يفكر حقا في شرائه؟
خلال الايام اللي فاتت مصر الملياردير الاماراتي خلف الحبتور فضل ترند رقم واحد بسبب الاخبار المتداوله عن تقديمه عرض رسمي لشراء نادي الزمالك.وخصوصا انه بعد الاعلان عن الخبر ده لقيناه في مصر وتحديدا في مدينه العلمين الجديدة.
واهو الحبتور دلوقتي طلع على صفحته عشان يكلم الناس ويحسم الجدل ده كله، وببساطه كده الراجل أكد إنه معندوش أي نية لشراء نادي الزمالك.
ومش بس كده، ده قال لك فيما معناه انا عمري مافكرت ولا هافكر اشتري نادي رياضي جوة مصر او في اي حته في العالم كله، بس ياترى ليه هو حد يكره المكسب؟ ده معروف ان الاستثمار في الرياضه لو اتنفذ صح بيجيب مبالغ كويسه اوي؟
على بلاطة كده، الملياردير خلف الحبتور ماشي في حياته بمبدأ واحد: اللي ما اعرفوش ما اشتغلش فيه، وعشان يحط فلوسه في حاجه لازم يكون واثق منها وعارف خباياها من الاول للاخر، لأنه بكده هيبقى عارف ازاي يكبرها ويطورها.
وبما ان الحبتور اعترف انه ما ليش في الكورة الا من بعيد لبعيد فسكة الأندية دي مش بتاعته، طيب إيه سكته؟
بص يا سيدي الحبتورر ده ماسك مجموعة اقتصادية من اضخم المجموعات الاقتصاديه في الوطن العربي وشغاله كل حاجه ممكن تخطر على بالك من اول العقارات الفنادق لغاية السيارات الفارهة والتعليم
والفنادق اللي بتديرها المجموعه موجوده جوه الامارات وفي اكتر من دوله بره الوطن العربي،
ولو هنتكلم عن مصر تحديدا فالملياردير الاماراتي سبق ورمى بياضه وقال انا عندي مشروع في صلاح سالم لو اتنفذ هيحوله لجنه الدنيا على الارض ويسد ديون مصر يغنيها عن القروض.
وسبق برده اتكلم لقناه العربيه وقال انه عنده فكره مشروع عقاري ضخم في مصر شبه الحبتور سيتي كده في الامارات وتكلفته 8.5 مليار دولار.
طيب ايه هو الحبتور سيتي ده اصلا؟.
بص ياسيدي دي مجموعه أبراج ضخمة بتنفذها مجموعه الحبتور في الإمارات، لو فاكرين من كام اسبوع انتشر فيديو حيتان طايره في سماء الإمارات.
والحيتان دي كانت بتلف حوالين مبنى معين، اهو المبنى ده ضمن مشروع الحبتور سيتي، اللي مفروض يضم أكبر مبني في العالم.
وعلى فكره، الملياردير الاماراتي خلف الحبتور كان طلع قبل كده مع لميس الحديدي من كام سنه في حوار تلفزيوني.
وقال انه مهتم بالفنادق الحكوميه وممكن يشتري عدد يشتري فيها او يدخل شريك والإدارة تكون ليه، بس لغاية دلوقتي محصلش جديد.
اما بقى لو هنتكلم على ثروة مةموعة الحبتور فالرقم مش معروف وهو رفض يصرح بيه، بس الاكيد انه قال إنه ثروة المجموعه بتوصل لمليارات الدولارات.
وعموما برنامج الطروحات الحكوميه لسه شغال والفرص معروضه قدام كل المستثمرين بره وجوه مصر، فهل تتوقعوا نشوف الحبتور بيشتري حاجه من اصول الحكومه قريب؟
