قالت الفنانة شيرين عبد الوهاب: “كل من كان في حياتي خونة، أقرب وأبعد الناس كانوا خاينين ومفيش أصل ولا عشرة”.
وأضافت خلال لقائها ببرنامج “بيج تايم بودكاست” الذي يقدمه عمرو أديب وأصالة، المذاع على قناة “إم بي سي 1”: “شخص ما وأنا بمشيه من عندي وبقول له أنت ما لكش عيش خلاص عندي فيقول لي أنا عايز كده علشان أمشي، نوع من الابتزاز، مش يقول لي حقك عليَّ أو آسف إني عملت كده ومش هاين عليَّ العشرة عايز أسمع الكلمة دي علشان أطمئن لكن لأ، كل الناس كلهم قلعوا القناع واكتشفت خيانتهم ليَّ”.
وتابعت: “كنت مستنية حد من القريبين ليَّ يبيض وشي وما تهونش عليه العشرة ويتمنى ليَّ الخير ما لقتش كلهم طلعوا خونة، جربت الكل في الامتحان وكله رسب ولم ينجح أحد”.
سرقة أموال شيرين عبد الوهاب
ولفتت شيرين عبد الوهاب: “الفلوس ما لهاش علاقة بالتعاسة، أنا شقيت من وأنا عمري 13 سنة ولو كان اللي حواليَّ بيستثمروا لي فلوسي كان زمان بقى معايا، ولكن أنا بقالي 25 سنة بتسرق ولو حد تاني بيحب الفلوس كان اتنقط، واللي عندي دايمًا مش ليَّ، أنا عايشة حياتي ببساطة وما عنديش خدم كل اللي عندي فدانين أرض زارعاهم كل الحاجات اللي بحبها، ولما باكل حتة جبنة قريش كإني باكل كافيار”.
وأكدت: “استشرت دكاترة نفسيين وما عرفوش يوصلوا لحاجة، لكن الحمد لله أنا بقيت كويسة، بس أنا بحب القلعة منطقتي، ولما أكون تعبانة اقولهم خدوني أشم هوا منطقة القلعة، وحلم حياتي إني أسكن في القلعة وما ليش لا في التجمع ولا غيرها أنا بحب أعيش في الشوارع المزيتة القديمة ومش بحب الصحراء اللي عايشين فيها دلوقتِ”.
مقالات أخرى قد تهمك
