تعتبر زوجهاا الأب الروحى لها، وهو طول عمره ييعتبرها ابنته هو ومراته! ولولا حرمة التبنى كان تبناها، لكن هو تزوجها في النهاية وأصبحت حب عمره.
شغلته أول ما شافها ووقع فى غرامها ومحدش سمى عليه ..إحنا هنا بنتكلم عن الكابل الأشهر فى الإعلام المصرى توفيق عكاشة وحياة الدرديرى ..
مين حياة الدرديرى وإزاى خاضت تجربة التقديم التليفزيونى؟ هل كان واسطتها توفيق عكاشة؟ واتعرفت عليه إزاى وعرفته واتجوزته كمان؟ اللى قاله عنها مفاجأة، فياترى إيه سر أستمرار الزيجة لحد دلوقتى؟
حياة الدرديرى اللى يشوفها دلوقتى ميشوفهاش زمان قبل ما تعرف توفيق عكاشة وتتجوزه بس الحق يتقال طول عمرها بتنحت فى الصخر وجيباها من شرقها لغربها لحد ما عكاشة ظهر فى حياتها وقدمها للجمهور وقدم لها فرصة عمرها على طبق من دهب ..
حياة الديرديرى شخصية بسيطة جدا ومن عيلة على قدها من البحيرة إتخرجت من كلية الإعلام جامعة القاهرة ولما إتخرجت بدأت الدخول فى مجال الإعلام بقلب جامد وصممت إنها تكون حاجة وقد كان ..
حياة لفترة من الفترات كانت سيرتها على كل لسان ..وإسمها إرتبط بتوفيق عكاشة لفترة كبيرة جدا بسبب ظهورهم الكتير مع بعض فى قناته وقتها قتاة الفراعين ..لحد ما قطعوا الشك ياليقين وإتجوزوا ..
حياة إتجوزت مرتين .أول مرة من رجل أعمال عنده شركة سياحة فى الأقصر ،وخلفت منه بنتين وولد ياسمين ومنة وعبد الله ..
ولكن الجوازة مستمرتش وإنفصلت بسبب الخلافات اللى كانت بينهم علشان حياة عايزة تشتغل إعلامية وهو مصمم إنها تقعد فى البيت وتربى العيال .. فحياة أختارت كايريها طبعا ..
ده إستفز جوزها جدا فقرر إنه يحرق قلبها على ولادها ويحرمها منهم ..خدهم وسافر برة مصر مش بس كده قالهم إن إمه عميلة وجاسوسة ..
إنفصالها عن زوجها فوقها وخلاها تكتشف جوانب كتير فى شخصيتها كانت مدفونة ،وبدأن تشق طريقها اللى عافرت علشانه وفعلا بدأت مشوارها فى الصحافة الفنية فى جريدة “صوت الأمة”،ومن الصحافة للتليفزيون المصرى ..
حياة إشتغلت كمراسلة لعدد من القنوات وتغطية الاحتفالات والمهرجانات السينمائية،وفضلت قناة تشيلها وقناة تحطها لحد ما جالها اللى بيهم كلهم .. أيوة توفيق عكاشة ،اللى كان العوض بالنسبة لها عن كل اللى مرت به ..لقيت اللى بيدعمها ويشجعها من أول لحظة شافته فيها من غير ما يعرفها لسه ..
وده لما راحت تقدم على وظيفة مذيعة فى قناة الفراعين ..وعملت الإختبارات وسقطت فيها ..قالولها هنرد عليكى يوم فى التانى محدش كلمها..حياة تسكت؟ لا طبعا خدت بعضها وطلعت على القناة وهناك عرفت إنها متقبلتش حاولت تعرف السبب كلمة فى التانية شافت عكاشة بالصدفة وهنا حصل كميا كبيرة بينهم وأعجب بشخصيتها أوى وقرر إنه هيضمها لفريق العمل..بس هتشتغل فى إعداد الربناج بتاعه وفعلا إشتغلت لمدة سنة وفجأة لاقيناها على الهوا مباشرة .. وعملت برنامج وبقى عكاشة ضيف دائم تقريبا فى كل حلقاتها..
ظهورهم مع بعض بعيدا عن الشاشات بقى كتير ..والكلام بقى عليهم أكتر وهو كان يرد ويقول دى بنتى وهى تقول ده الأب الروحى ..لحد ما نيمنا كلنا فى الخط وفجأة أتجوزوا .
وزى ما وقف جنبها ودعمها فى بدايتها ..هى كمان كانت فى ضهره وسند له فى عز أزماته وقال عنها: «حياة وقفت جنبي وقفة رجالة رغم غلق قناتي وعدم وجود مصدر رزق آخر لي، وهي إنسانة طيبة وجدعة جدًا، ورفضت أن أكتب لها مؤخرًا إطلاقًا، بييجي عليا أيام ببقى مش معايا تمن علبة السجاير، حاجة محزنة الصراحة، ومع ذلك هي متحملة وماقالتش كلمة حتى تضايقني بيها»…ويمكن ده واحد من الأسباب اللى مخلى الجوازة مستمرة لحد وقتنا ده لا سمعنا عنهم خلافات ولا إنفصال ..
عكاشة تصدر التريند الأيام اللى فاتت بردوا كعادته ولكن المرة دى مش تصريح له لأ ،ولكن هو فيلته إتسرقت من مجهولين فى كمبوند شهير بأكتوبر ،وسرقوا 4 ساعات من ماركات عالمية مشهورة وقيمتها بتوصل لملايين الجنيهات.. ده غير مشغولات ذهبية ومبلغ مالي 4 آلاف دولار.
عكاشة كان بيقضي أجازة الصيف في الساحل ولما رجع من السفر اكتشف اختفاء متعلقاته وبلغ أجهزة الأمن اللي حضرت للفيلا لمراجعة كاميرات المراقبة بالمنطقة وفحص المترددين على المكان.
