كثير من الناس حلمهم أنهم يشتروا شقة، لكن ارتفاع أسعار الشقق والعقارات بشكل مبالغ فيه جعل الحلم بعيد، لكن الآن يمكنك أن تشتري الشقة التي تحلم بها من خلال مبادرات التمويل العقاري، لكن إيه حكاية المبادرات دي؟ وإيه هي البنوك اللي بتقدمها؟ وياترى شروطها إيه؟
أسعار العقارات الشهور الأخيرة ارتفعت بشكل مبالغ فيه ودلوقتي كل اللي كان حلمه شقة خلاص مبقاش حتى بيفكر يشتري.
بس استنى أنت تقدر دلوقتي تحقق حلمك وتشتري الشقة اللي نفسك فيها وده من خلال مبادرات التمويل العقاري اللي بتقدمها كتير من البنوك في مصر، واللي كمان بيتنافسوا فيها عشان يقدموا شروط وتسهيلات تنافس كل الطبقات.
من ضمن المبادرات دي مبادرة البنك الأهلي، وحسب الموقع الإلكتروني للبنك شروط مبادرة التمويل العقاري أنه يكون الدخل الشهري للعميل هو 6 آلاف جنيه للفرد و8 آلاف للأسرة.
كمان من ضمن الشروط دي أنه ميقلش سن المتقدم للمبادرة عن 21 سنة وميتعداش سنه عن 65 سنة لكافة الشرايح وقت انتهاء التمويل أو عند بلوغ سن المعاش، وبحد أقصى 75 سنة في نهاية تمويل أصحاب المعاشات والمستفيدين من المعاش.
وطبعا لازم يكون المتقدم مصري الجنسية، ومدة العمل في وظيفته متقلش عن 6 شهور لموظفين القطاع الخاص والعام وسنة لأصحاب المهن والأعمال الحرة.
وعلى فكرة مدة القرض أو التمويل الحد الأدنى ليها 5 سنين والأقصى 30سنة، أما قيمته فبتكون 90% من إجمالي قيمة الوحدة وده رقم محترم جدًا للتمويل. وبالنسبة بقى لوديعة الصيانة فالبنك بيمنح 10% كحد أقصى من سعر الوحدة.
بس ياترى هو البنك بياخد قسط قد إيه؟ شوف يا سيدي، حسب موقع صدى البلد البنك بياخد 40% من صافي دخل العميل بعد استبعاد كل رسوم وبعد سداد كل الالتزامات اللي عليه.
والفايدة على القرض قيمتها 3% متناقضةأما بالنسبة للمصاريف الإدارية فبتكون0.5% من مبلغ التمويل وبيتم تقسيطها على فترة عمر القرض
مميزات التمويل العقاري من البنك الأهلي
أنا أقولك، أول ميزة بتاخدها هو فتح حساب مجاني هناك، ده بالإضافة لمصاريف الاستعلام بتكون مجانية برضو وبتاخد كمان وثيقة تأمين على الحياة والعجز الكلي.
ده كمان بنك التعمير والإسكان بيقدم مبادرة التمويل العقاري، بس إيه هي شروطها؟ حسب موقع صدى البلد، من ضمن المبادرة دي هو أن يكون الحد الأقصى لمساحة الوحدة هو 150 متر وتكون كاملة التشطيب وجاهزة للسكن، وكمان يكون الحد الأقصى للدخل الشهري للفرد 40 ألف جنيه، وللأسرة 50 ألف.
وكمان يكون الحد الأقصى لسعر الوحدة 2 مليون وربع، والحد الأدنى للمقدم المسدد 20%، والحد الأقصى لنسبة التمويل 80%.
دي كمان من ضمن الشروط عدم استفادة المتقدم من أي مبادرات أومشروعات الإسكان الاجتماعي، وبالنسبة للقسط الشهري فهو بيكون بنسبة 40% من الدخل الشهري.
المستندات المطلوبة
بص يا سيدي، بالنسبة للموظفين، فأنت بتقدم تعهد بتحويل مرتبك على البنك، وبتقدم كمان بطاقة الرقم القومي للزوج أو الزوجة، ده كمان بتقدم صورة من قسيمة الجواز وعقد إيجار أو تمليك محل الإقامة وإيصال مرافق حديث لمحل الإقامة، وكشف حساب لمدة 6شهور على الأقل.
أما بالنسبة لأصحاب الأنشطة التجاري، فبيقدموا شهادة من محاسب قانوني بالدخل، مستخرج حديث من السجل التجاري، ده بالإضافة للبطاقة الضريبية وعقد إيجار أو تمليك مقر النشاط، وصورة البطاقة للزوج والزوجة وقسيمة جواز، بس خالي بالك كل ده بشرط مرور سنة على القيد التجاري.
ودلوقتي قولنا رأيك في مبادرات التمويل العقاري من البنوك؟
