أسعار الذهب الأيام الأخيرة ارتفعت بشكل كبير جدا، وهذا في الوقت الذي أعلنت فيه وزارة التموين اعتبار السبايك التي وزنها 100 جرام وأقل من المشغولات الذهبية وهذا جاء في نفس الوقت التي أعلنت فيه الغرف التجارية تطبيق زيادة قيمة مصنوعية بقيمة 10%.
بس يا ترا قرار زيادة المصنوعية هيطبق أمتى؟ وهل ليه علاقة بارتفاع أسعار الدهب الفترة الأخيرة؟ وازاي هيأثر على سوق الدهب؟
شعبة الذهب كانت أعلنت من أيام عن قرار بزيادة مصنعية قيمة الذهب بقيمة 10%، وهذا جعل ناس كثيرة تسأل هو قرار الزيادة سيطبق من امتى؟
بص يا سيدي، شعبة الدهب كشفت عن تفاصيل مهمة بخصوص قرار زيادة قيمة المصنوعية على المشغولات الدهبية، وخلاص المفروض ان القرار اطبق من أول يوليو، يعني بقى رسمي خلال الساعات اللي فاتت.
دي قالت كمان أن القرار ده جه بناءًا على بروتوكول المحاسبة الضريبية الموقع بين الشعبة ومصلحة الضرايب لوضع أسس المحاسبة لتجارة المشغولات الدهبية.
وبحسب هاني ميلاد رئيس الشعبة العامة للدهب و المجوهرات، لموقع الجمهورية، أن الزيادة المقررة مش هتحرك أسعار الدهب ولا هتشكل أي عبئ على المستهلك، وده لأن قيمتها مش هتتخطى 2 جنيه بحد أقصى على كافة عيارات الدهب
بس الفكرة هنا بقى في قرار وزير التموين والتجارة الداخلية باعتبار السبايك اللي وزنها 100 جرام أول أقل من المشغولات الدهبية، وقال إن القرار ده رفع من وزن الحد الأدنى لوصف السبايك من الدهب الخام واعتبارها من المشغولات الدهبية بدل من أونصة، وده هيخليها تخضع للمعاملة الضريبية الخاصة بالمشغولات
لكن إيه حكاية قرار وزير التموين باعتبار السبايك من المشغولات الدهبية؟
أنا أٌقولك، حسب جريدة الوطن، الدكتور علي المصيلحي وزير التموين، كان أصدر من أيام قرار باعتبار السبايك اللي وزنها 100 جرام فأقل من المشغولات الدهبية لكن ده بيكون بضوابط وقواعد معينة، وده عشان يوضح المصطلحات و التعريفات الخاصة بمنتجات الدهب من الخام و المشغولات الدهبية و النص مشغولة والغير مشغولة.
وحسب تصريحات ميلاد، في برنامج الحكاية، إنه هيتم تحصيل 14% ضريبة قيمة مضافة على السبايك الدهبية اللي وزنها بحد أقصى 100 جرام وده بعد ما وزير التموين قرر اعتبارها من المشغولات الدهبية.
وقال إن السبيكة اللي وزنها 100 جرام هتزيد بقيمة 1200 جنيه بعد تطبيق القيمة المضافة عليها، أما بقى بالنسبة للمشغولات الدهبية فالقيمة المضافة هتكون بقيمة جنيه على كل جرام.
اما ناجي فرج، مستشار وزير التموين لشؤون الدهب، قال إن قرار ضريبة الـ 14% على السبايك كقيمة مضافة أدى لانتعاشة في سوق المشغولات الدهبية وخلت في توازن بين المشغولات و السبايك والجنيهات في زيادة الطلب عليهم
ده قال كمان إن القرار ده أدى لزيادة عمل الورش و الصاغة وانتعاش الحركة في السوق من جديد، ده قال كمان أن بعد تطبيق القرار ده مأثرش على الطلب في السوق بالعكس بقى في زيادة على الطلب بنسبة 50% على سوق المشغولات
بس ياترا أسعار الدهب وصلت لكام بعد تطبيق قرار زيادة قيمة المصنعية؟
بحسب اليوم السابع، كان في تذبذب في أسعار الدهب خلال الساعات الأخيرة ودلوقتي عيار 24 وصل لـ 2628 جنيه، أما عيار 21 فهو وصل لـ 2300 جنيه وعيار 18 فهو دلوقتي وصل لـ ، 1971 أما الجنيه الدهب فهو بقى بـ 18 ألف و 400جنيه
ودلوقتي قولنا رأيك في قرار زيادة مصنعية الدهب؟
