من ساعات أعلنت الداخلية خبر القبض على سيدة في قضيه نصب ب ٢٥ مليون جنيه ملاة واحدة..فياترى كيف نصبت عليهم وكيف تم القبض عليها ؟ تابعوونا من أجل معرفة التفاصيل:
طول عمرنا بنسمع عن قضايا نصب كتير وغالبا اللي كانوا بينفذوها رجالة، وكان الواحد منهم يعمل العملية وياخد المبلغ ويجري برا مصر، ولو كان المبلغ كبير يبقي لازم يكون فيه مجموعه هى اللي تقوم بالعملية عشان تبقي محكمة
إنما قضيه النهاردة عملتها واحدة ست ! لا وايه نصبت علي الناس في اكتر من ٢٥ مليون جنيه ولوحدها ..لا الصراحه جباره ..عشان تخلي الداخليه بحالها تشتغل للقبض عليها
وحسب اليوم السابع، الواقعة حصلت في القاهرة والست اللي قامت بعمليات النصب دي ، كانت بتفهم ضحاياها إنها ممكن تاخد مبلغ مالي وتوظفهم في أي مشروع كبير.
زي انها تشتري سيارات أو الملابس أو تأسيس شركات أو تنظيم حفلات، المهم يبقي أي مشروع كبير تقنع بيه الزبون وطبعا كانت بتعمل البحر طحينه لكل واحد عشان يطلع كل اللي في جيوبه بسهولة.
واللعبة بقى انها أول ماتاخد الفلوس مترجعش حاجه لا الاارباح ولا حتى المبلغ الأصلي، ويعني لامواخذه والدة حضرتك في العشة ولا طارت!
ويفضل كل واخد بقى يسأل ويدور فين فلوسه، وطبعا لا حياة لمن تنادي ويرسى بيه الأمر إنه يرفع قضيه لكن القانون لايحمي المغفلين، ولما كانوا الناس بيحاولوا يقابلوها يسألوها فين الفلوس مكانوش بيلاقوها اصلا !
دي كمان كانت بتحط الفلوس بتوزع الفلوس على حسابات بنكية خاصة بيها وبأهلها ، وده عشان تخفيها عن العيون، ومتتسألش من أين لك هذا بس طبعا لما زاد البلاغات ضدها، الداخلية اتحركت واتقبض عليها واتعملها قضيه تقدر ب٢٥ مليون جنيه حته واحده.
ولو انت فاكر، من كام شهر للشباب اللي فحروا تحت بيتهم مقبرة فرعونيه وعملوا نقوشات وجابوا أواني نحاس وفخار كأنها مقبرة فرعونية حقيقية.
ونصبوا على ناس ياما من ورا المقبرة دي بس الناس كانت معاها حق لان المقبرة بتفاصيلها تبان كأنها حقيقية، ده حتى هيئه الآثار للوهله الأولى شكوا ان دي مقبرة بجد مابالك الناس العاديين !!
بس دول كان معاهم عذرهم لكن ياترى عذر الناس التانيه ايه اللي نصبت عليهم وجمعت مبلغ ٢٥مليون جنيه ! انت عارف ده يفكرك بإيه؟ بفيلم العتبه الخضراء لما كان احمد مظهر عاوز يبيع العتبه للإسماعيل يس.
والنكتة هنا ان الفيلم كان بيحكي قصة حقيقية لشاب قروى بسيط وقع في الفخ بعد ماقابل شاب في القاهرة ضحك عليه، وقال ايه باعله تروماي العتبة.
وصاحبنا اللي جاي من القرية مكتشفش الواقعة الا بعد ما اتخانق مع الكمسري عشان طلب منه أجرة التروماي، اللي هو ازاي يدفع أجرة وهو شاري التروماي اصلا، وكان واقعة قلبت جرايد مصر كلها.
بس يظهر إن فكرة اللي اشترى تروماي لسه موجوده وهتفضل موجوده طول مافيه ناس بيصدقوا الوهم وبيشتروه بفلوسهم، وانت قولنا هتعمل ايه لو جتلك واحده ست وقالتلك هات اشغلك فلوسك ياترى هتوافق ؟! ولا هتفتكر احمد مظهر فيلم العتبه الخضراء والمقبرة الفرعونية ؟!
متنساش تقولنا رايك في التعليقات.
