لو كنت تفكر في مشروع او تريد أن تشتري شقة جديدة أو سيارة وتحتاج لقرض لكن طبيعة شغلك غير ثابتة ولا تعرف ماذا تفعل؟ تابعنا في التقرير التالي سنوضح لك كيفية الحصول على قرض من البنك الأهلي أو بنك مصر دون الحاجة إلى تقديم إثبات للدخل.
لو انت ماتعرفش فـ البنك الأهلي وبنك مصر بيقدموا نوع من القروض اللي تقدر تاخده كاش واسمه القرض الشخصي
والمفاجأة إنك لو كنت عميل في اي بنك من دول هتقدر تاخد القرض ده بضمان أوعية الادخار زي الشهادات والودائع، وده من غير ما تحتاج تقدم ضمان إثبات الدخل الشهري عشان تسدد القسط الشهري
والقروض اللي بتكون بضمان أوعية الادخار بتعتبر من ضمن برامج القروض المتاحة في بنكي الأهلي ومصر وبنوك تانيه كتير، والجميل إن البنك مش بيحتاج لأي أوراق عشان يصرف القرض
وده بيكون مقابل توقيع العميل على موافقة منه بحظر البنك قيمة الشهادة لحد ما يخلص آخر قسط من القرض.
أحدث شهادات البنك الأهلي ومصر
فبتعتبر الشهادة أجل 3 سنوات للعائد الثابت 19% سنويا ويصرف العائد شهريا المطروحة في بنكي الأهلي ومصر من أكثر الشهادات طلبا بين العملاء .وده لأنها تعتبر من أهم الشهادات اللي بتقدم أعلى عائد مقدم على أوعية الادخار في السوق
والمفاجأة إنه خلال فترة القرض بضمان أوعية الادخار بيحصل العميل على عائد الشهادة بشكل منتظم مع التزامه بسداد قسط وفوائد القرض في ميعادها شهريا، وفي حال وجود أي تأخير في السداد عن الوقت المحدد يتم توقيع غرامة عليه زي كل برامج القروض.
كمان البنك بيحسب الحد الأقصى للقرض بناء على قيمة أوعية الادخار للعميل بحيث إنه ماتزدش قيمته عن 90% من إجمالي قيمة مدخراته في البنك
أما بقا تحديد قيمة القسط الشهري فبيتم حسب قيمة القرض وفترة سداده واللي بتتراوح من 6 شهور إلى 10 سنوات.
وبيعتبر القرض الشخصي من أكثر برامج القروض طلبا في البنوك وده بسبب سهولة الحصول عليه نقدا من غير ما يحتاج العميل إنه يثبت الغرض من صرفه أو نوع السلعة اللي هيشتريها
ومش بس كده ده كمان بيتميز إن نسبة الفائدة المقدمة عليه أقل كتير بالمقارنة بباقي القروض الاستهلاكية الأخرى زي السيارات والسلع المعمرة وخلافه.
طيب إيه هي تفاصيل الحصول على قرض شخصي بضمان الشهادة الثلاثية 3 سنوات للعائد السنوي 19% في بنكي الأهلي ومصر؟
هقولك ياسيدي بالنسبة للبنك الأهلي فبتكون نسبة الفائدة: زيادة 2% عن سعر الشهادة أو الوديعة (أي 21% سنويا على الاقتراض بضمان الشهادة بفائدة 19%).
ومدة التمويل بتصوصل لـ 7 سنوات كحد أقصى.كمان نسبة التمويل بتوصل تصل إلى 90% من إجمالي قيمة الشهادة
فمثلا بيقدر ياخد العميل قرض بقيمة 90 ألف جنيه مقابل الشهادة التي قيمتها 100 ألف جنيه.ونسبة المصاريف الإدارية 1% من إجمالي قيمة القرض ويتم خصمها مرة واحدة.
أما بالنسبة لبنك مصر فنسبة الفائدة بتكون زيادة 2% عن سعر الشهادة أو الوديعة (يعني 21% سنويا على الاقتراض بضمان الشهادة بفائدة 19%).
ونسبة التمويل بتوصل لـ 90% من إجمالي قيمة الشهادة.ومدة التمويل بتبدأ من 12 شهرا وتوصل لـ 10 سنوات كحد أقصى.أما المصاريف الإدارية فبتكون 1% من إجمالي قيمة القرض تخصم مرة واحدة.
دلوقتي قولنا رأيك في القرض الشخصي من بنك مصر والأهلي وهل جربت تقدم عليه؟
