طول الوقت مصر تحتضن وتستقبل نجوم في مجالات مختلفة يأتوا إلى مصر ويحققوا الشهرة، وهذا نراه خاصة في مجال الفنون، خصوصا التمثيل والغناء والرقص، وفي التمثيل مثلا نرى نجوم كثيرة خاصة من دول الشام ومن شمال إفريقيا، وفي الغناء أيضا ، ولكن على مستوى الرقص بقينا نشوف الروس والأرمن، ولكن الملفت هو غياب المصريات.
مصر تعتبر هي هوليود الشرق ومنها بينجح ناس كتير ويتعرف اسمهم، خصوصا إن نوع الفن اللي بيتقدم في مصر هو فن جامع بيقدر يكون مفهوم ومحبب من كل بيت في الوطن العربي، وبالتالي اللي بيقدر يلاقي لنفسه مساحة إنه يشتغل في مصر في مجال الفنون بيكون كأنه معاه تذكرة دخول كل البيوت العربية.
والشغل في مصر في مجال الفن باللهجة المصري والأسلوب المصري بيكون صك النجاح لأي نجم أو فنان، والرقص الشرقي يعتبر من الفنون اللي مصر كانت بتتربع فيها على العرش وكانت بتخرج مجموعة من أهم راقصات الشرق الأسوط واللي بيقدموا عروض عالمية، وفوق كل ده كانوا نجمات في السينما والدراما، ويمكن عندنا من دول أمثلة كتر من زمان زي سامية جمال وتحية كاريوكة ونعيمة عاكف وسهير زكي، وبعد كدة الأجيال الأحدث شوية زي فيفي عبده ولوسي وآخرهم دينا.
ولكن الملاحظ إن أغلب نجمات الرقص الشرقي دلوقتي بقوا كلهم مش مصريات زي أوكسانا وبدرة ولورديانا وجوهرة وإنستازيا، وغيرهم من النجمات اللي جايين من دول أوروبا، ولكن في مصر مبقاش في اسم نقدر نقول ده اللي بيكمل خطوات الأجيال اللي قبله.
يمكن مفيش غير الراقصة المصرية إيمي سلطان، دي الوحيدة اللي بنشوفها بين المشاهير في مجال الرقص، ولو راجعنا قايمة أغلى الراقصات في الحفلات، هنلاقي مفيش غير دينا وإيمي سلطان، حتى الراقصة صوفينار لما ابتدت تتعلم مصري وتكتسب الطابع المصري وطريقة الحياة بتاعة المصريين، مبقاش ليها نفس النجاح ومبقيناش نسمع عنها كتير، خصوصا كمان مشاكلها مع الرقابة والمشاكل القانونية اللي عندها.
أغلب الراقصات الأجانب اللي بيقنا نشوفهم في مصر وبيبقوا مشاهير ده بيكون عن طريق أعمال فنية بيجيبهم المنتجين يشتغلوا فيها، وبعد كدة يبقوا مشاهير، ولكن غابت خلال السنين الأخيرة مصر عن ساحة الرقص تماما.
بالتأكيد في راقصات مصريات، ولكن مش معروفين أو نجوم وبيكونوا بيرقصوا في فنادق وكازينوهات مش نجمات معروفين، ويمكن ده راجع لإن الثقافة المصرية مبتتقبلش فكرة إن البنت تكون راقصة محترفة، وبالتالي مبيروحش للطريق ده غير ناس بتكون ظروفهم الحياتية صعبة، وبيلجأوا للطريق ده كوسيلة للربح وده عادة ما بيكونش عن دراسة أو تدريب حقيقي.
يمكن في ناس بتروح تتعلم الرقص ولكن بيكون لغرض شخصي وعادة بتكون رقصات أجنبية باردو، وحتى اللي بيتعلم شرقي مبيكونش ناوي يحترف الموضوع ده.
طبعا الرقص من الأمور اللي هيكو عليها خلاف طول الوقت بين المصريين، أو حتى في الشعوب العربية، بين ناس هتقول ده جرام ومينفعش، وناس هتقول ده فن، ويمكن ده باردو الشيء اللي بسببه مش بنشوف راقصات من جنسيات عربية بيجوا مصر، وإن كنا بنشوف لبنانيات وعربيات باردو بيجوا مصر بيقدموا نفس الشيء ولكن مش تحت مسمى راقصة.
لحد دلوقتي الواضح إن مصر بقت خارج سباق الراقصات وبقت بتعتمد على استيراد المواهب من برة، ومحدش عارف بعد ما دينا تعتزل، هل إيمي سلطان هتكون لوحدها ولا في ناس تاني ممكن تطلع؟ الأيام هي اللي هتجاوب.
