اعملوا حسابكم على طريقة جديدة لبيع الدهب في مصر!هذا ما كشفته وزارة التموين خلال الساعات الأخيرة عندما سئلت عن إجراءات الحكومة الحالية لضبط اسعار الدهب بعد موجة الارتفاع الأخيرة.
فياترى إيه حكاية طرح الدهب في البورصة السلعية؟ وهل ده هيخفض الأسعار؟ وايه مصير اسعاره الفترة الجاية؟ وايه حجم الدهب اللي دخل البلد من بداية مبادرة زيرو جمارك؟ وهل الحكومة ممكن تجدد المبادرة دي؟
بعد ما الناس فرحت بانخفاض أسعار الدهب في فترة من الفترات، الدهب رجع يرتفع تاني وبقوة، وإذ بعدها نفاجأ برضه ان الأسعار بتنزل ومبقاش حد فاهم حاجة ولا عارف مصير الدهب هيكون ايه؟
لكن الحكومة مع ذلك مش بتسكت ومن وقت للتاني بتصدر بعض القرارات عشان تقدر تسيطر على أسعار الدهب زي مبادرة زيرو جمارك وتخفيضات على مصنوعية الدهب وغيره.
وكانت أخر المبادرات دي هي اللي أعلن عنها مساعد وزير التموين، بس ياترى هو قال ايه؟شوف يا سيدي، الدكتور إبراهيم عشماوي، مساعد أول وزير التموين ورئيس قطاع التجارة الداخلية، أعلن في برنامج على مسئوليتي، عن انتهاء الوزارة من المفاوضات الجارية مع الجهات المعنية بخصوص طرح الدهب في البورصة المصرية للسلع
وقال كمان إن هيتم البدء في طرح الدهب سواء سبايك أو جنيهات من خلال البورصة خلال شهر سبتمبر الجاي، بس مش هيكون فيه في الطرح ده مشغولات دهبية
بس في نفس، وزير التموين وجه بإعادة طرح مضبوطات مصلحة الجمارك من «الدهب- الفضة- المعادن النفيسة- المشغولات» على البورصة المصرية للسلع في صورة مزادات، والمفروض إن مصلحة الدمغة الموازين هي اللي هتتولى إجراء مزادات مضبوطات الجمارك في الوقت الحالي.
وبالمناسبة طرح الدهب في البورصة الهدف منه إعادة ضبط الأسعار في السوق المحلي عشان تتواكب مع الأسعار العالمية، لان السعر المحلى كان في وقت من الأوقات مرتفع عن نظيره العالمي ب1200 جنيه تقريبا، وده حسب عشماوي
وقال إن التموين عقدت أكتر من 50 جلسة مع تجار الدهب للتوصل لصيغة عادلة بخصوص طرح الدهب في البورصة
وقال كمان أن البورصة المصرية للسلع هتكون إضافة كبيرة في عمليات التبادل التجاري لدول مجموعة البريكس، من خلال ربط البورصات السلعية لدول التحالف ببعضها
ده كمان أعلن عن ارتفاع إجمالي قيمة واردات الدهب من الخارج المعفاة من الضرايب والرسوم الجمركية ل600 كيلو جرام من بداية المبادرة في مايو لحد دلوقتي، عشان كده مجلس الوزراء بيدرس مد المبادرة فترة تانية.
وحسب تصريحات عمرو المغربى، عضو مجلس إدارة شعبة الذهب بالغرفة التجارية، إن مبادرة زيرو جمارك على واردات الدهب مستمرة لحد شهر نوفمبر المقبل.
ولما إتسال هل هيتم مد المبادرة تاني ولا لأ؟ قال إن مجلس الوزراء بيدرس مد المبادرة والموضوع لسه تحت الدراسة ولحد دلوقتي مفيش قرر نهائي هل هيتم مد المبادرة ولا هنكتفي بالفترة المعلنة.
وقال إن بفضل المبادرة دي فيه 193 كيلو دهب دخلوا مصر في أول شهرين من بدايتها والرقم ده اتخطى حاجز الـ600 كيلو لحد دلوقتي.
وقال كمان إن المتحكم في سعر الدهب هو العرض والطلب، وأن أسعار الذهب شهدت ارتفاع كبير في 2022 لكن انخفضت حاليا بعد تطبيق مبادرة زيرو جمارك.
وقال إن الانخفاض ده هيكون ليه تأثير إيجابي على التجار لانه هيزود مبيعاتهم وده عكس ما الناس فاكرة أن زيادة أسعار الدهب هتيجي بالنفع على التاجر.
وطبعا انت دلوقتي عاوز تعرف إجابة سؤال واحد: لو معاك قرشين دلوقتي تشتري بيهم دهب ولا تستنى؟ نصيحة شعبة الذهب ان الوقت الحالي مناسب للشراء.. وعموما انت ممكن تشتري بجزء من الفلوس اللي معاك ومع كل انخفاض في اسعاره تشتري باللي تقدر عليه.
ودلوقتي قولنا شايف إن عرض الدهب في البورصة هيقلل سعره؟
