“عندي معلومات مهمة وفي مؤتمر مهم بخصوص انقطاع الكهربا” هذا ما قاله عمرو اديب الساعات الاخيرة خلال برنامجه
فياترى ما سيناريوهات هذا المؤتمر؟ وماذا قال عمرو أديب؟ ومتى تحل ازمة الكهرباء؟ وما سر الاجتماع الأخير وزارة الكهربا والبترول؟
كل يوم والتاني الحكومة وتحديدا وزارة الكهربا بتعقد اجتماعات وتصدر بيانات بخصوص ازمة الكهربا اللي الكل اشتكى منها، لكن لحد دلوقتي للاسف الازمة متحلتش والناس بتشتكي من النور
وكانت اخر الاجتماعات دي هو الاجتماع اللي اعلن عنه عمرو اديب في الساعات الاخيرة، بس ايه حكاية الاجتماع ده؟
شوف يا سيدي، عمرو اديب كان قال في برنامجه الحكاية، ان وزير الكهربا والبترول عقدوا اجتماع بالعاصمة الإدارية من أيام، لمناقشة حلول أزمة انقطاع الكهربا ،بس قال انه ميعرفش اللي حصل في الاجتماع ده والمواطن كمان ميهموش اللي حصل هو المهم عنده النور والمياه.
وقال كمان أن عنده معلومة أن في مؤتمر للحكومة عالي المستوى هيكون بكره او بعد بكره ، وده عشان يكشفوا تفاصيل الأزمة ويقولوا الحلول اللي توصلوا ليها، وقال انه من المتوقع انهم يعلنوا عن حل الازمة دي بشكل نهائي او انهم هيعلنوا عن تقليل قطع الكهربا تدريجيا لحد ما الأزمة تنتهي خالص.
وقال كمان ان السبب الرئيسي في ازمة الكهربا هو نقص الوقود، وان المحطات محتاجة وقود، لان جايز كانت الدولة عايزه تصدر الغاز وتجيب منه فلوس أكتر، أي كان الأسباب في نقص.
وعلى فكرة ده قال ان 60% من الكهربا في مصر بتتوجه لمصانع ومرافق حيوية، اما بقى المنازل والمنشآت التانية فبتستهلك 40%، وقال “ان اللي حظه حلو النور بيقطع عنده مرتين، وأنا النور بيقطع عندي في أوقات النار”.
وفي تصريحات سابقة لعمرو اديب في برنامج الحكاية، قال ” إن مفيش وقود والوقود عند وزير البترول، وأنا مش شايف إن وزير الكهربا غلطان ولا وزير البترول غلطان، الغلط في عدم التنسيق بينهم والمفروض يبقى فيه تخطيط وتنسيق ما بينهم اكتر من كده، إلا إذا انت محتاج تصدر الغاز علشان توفر دولار وهنا يبقى الله غالب ونمشي نفسنا بالظروف الحالية”.
وكمل وقال “كلام وزير الكهرباء كان واضح عندنا نقص في الوقود أو الغاز بالتحديد، وعلى الجانب التاني في البترول فهمت إن الغاز اللي عندهم هيروح حتة تانية”.
وحسب تصريحات الدكتور أيمن حمزة المتحدث باسم وزارة الكهرباء، في برنامج صالة التحرير، أن الكل دلوقتي في غاية الاهتمام لحل أزمة انقطاع التيار الكهربائي، عشان كده بطمن المواطنين وبقول المشكلة عارضة وإن شاء الله مش هتكرر تاني.
وقال ان خلاص الازمة دي هتتحل بشكل نهائي خلال الأيام جاية زي ما قال الدكتور مصطفى مدبولي رئيس مجلس الوزرا، وإن أزمة الكهربا هي أزمة طارئة وكان يهمنا التجاوب مع أي ملاحظات وأي ردود أفعال عشان نتجاوز الأزمة دي.
وبالمناسبة وزارة الكهربا انت أصدرت بيان من أيام قالت فيه أنها هتطبق برنامج لتخفيف الأحمال، وإن النور هيقطع على راس الساعة أو قبلها بـ 10 دقايق أو بعدها بـ 10 دقايق.
ودلوقتي قولنا الكهربا بتقطع عندك ولا لا؟
