متى ستنخفض أسعار السجائر؟ هذا السؤال الذي يسأله ملايين من المصريين الآن بعد ارتفاع أسعارها ووصولها لـ 80 جنيه، لذلك فإن شعبة الدخان خرجت وطمئنت المواطنين وقالت إن أسعار السجائر ستنخفض لكن في حالة واحدة.
لكن ياترى أسعار السجاير هتنخفض أمتى؟ وشعبة الدخان قالت إيه تاني؟ وإيه سبب الأزمة الموجودة؟ كل ده وأكتر سنعرفه من خلال التقرير التالي:
لسه أزمة السجاير الكل بيشتكي من ارتفاع أسعارها لأنها وصلت لـ 50 و60 و80 جنيه كمان ده طبعا غير نقصها في السوق، بس لحد دلوقتي الأزمة متحلتش وعمالة تتعقد أكتر
وده خلى ناس كتير تسأل هو إيه سبب الأزمة وهتتحل أمتى؟
شوف يا سيدي، حسب تصريحات إبراهيم إمبابي رئيس شعبة الدخان السجاير في اتحاد الصناعات لموقع مصراوي، إن أسعار السجاير في السوق الغير الرسمي ارتفعت بشكل كبير جدا الفترة اللي فاتت، ده بالإضافة لنقص بعض الأنواع في أكتر من منطقة
وقال إن سبب ارتفاع أسعارها يجي بسبب جشع التجار في بيع بضاعتهم بأسعار أعلى من سعرها الحقيقي
بس قال إن أسعار السجاير ممكن تنخفض وترجع لسعرها الطبيعي في حالة مناقشة مشروع قانون بالضرايب الجديدة على السجاير واللي هيكون في شهر اكتوبر الجاي.
أما هاني أمان الرئيس التنفيذي لشركة الشقية للدخان قال في تصيحات تليفزيونية، إن ارتفاع أسعار السجاير الموجود في السوق حاليا ده محصلش قبل كده، وإن الشركة مش مسئولة عن ارتفاع الأسعار الموجود وأنها كمان مرفعتش أسعار السجاير من شهر مارس اللي فات.
وقال كمان إن علبة السجاير بقى دلوقتي تمنها أكترمن 50 جنيه رغم إن الشركة بتطرحها بـ 24 جنيه بس، لكن الشركة مش هتسكت عن ارتفاع الأسعار وبدأت تتخذ خطوات فعلا عشان تخفضها وتعجل بانفراج الأزمة دي، وده هيبان بعد أسبوعين أو تلاتة بالكتير أوي.
وقال إن من ضمن الإجراءات اللي الشركة هتاخدها عشان تخفض الأسعار هو توفير المنتج بشكل منتظم عشان ميحصلش نقص في المعروض، بس ياترى لو الأزمة دي استمرت ومتحلتش إيه اللي هيحصل؟
أنا أقولك، إبراهيم إمبابي طلع في برنامج على مسؤوليتي وحذر من حدوث أزمة جديدة في سوق السجاير خلال الفترة الجاية وقال إن هيكون في أزمة في توفير السجاير خلال 45 يوم وبالتالي هتحصل ارتفاعات جديدة ده لو حد لاقها أصلا
وقال كمان إن في حالة تدخل مجلس النواب والحكومة الأسعار هتتراجع وسعير علبة كليوبترا هتنخفض من 50 جنيه لـ 28 جنيه وال إل إم هتنخفض من 75 لـ 52 جنيه
وقال إن اللي بيحصل دلوقتي أزمة كبيرة عشان كده لازم الجهات الرقابية تدخل للحد من الارتفاعات اللي بتحصل.
وعلى فكرة أي تاجر هيبيع السجاير بأعلى من تمنها أو يخزنها مش هياخد أي بضايع من شركة الشرقية للدخان اللي بتنتج سجاير كليوبترا.
وبالمناسبة شركة فيليب موريس مصر أعلنت في بيان ليها من أيام زيادة أسعار منتجاتها في الأسواق رسميا والزيادة هتتراوح بين 3 و5جنيه في العبوة الواحدة على أنواع ميريت ومارلبورو وإل أن أم
وحسب على كرمان المدير العام لفيليب موريس إن الزيادة كانت ضرورية عشان إنتاجنا ينتظم وميحصلش أي نقص وكمان عشان نحافظ على نفس الجودة اللي بنقدمها، ودلوقتي قولنا إزاي أزمة السجاير أثرت عليك؟
