هل انسحب محمد رمضان من سباق أفلام عيد الأضحى أم أن التصوير لم يكتمل ويريد أن يأخذ وقته؟ وهل حقا سنرى في أفلام العيد سباق بين تامر حسي وكريم عبد العزيز ؟ مفاجآت عديدة سنكشفها من خلال التقرير التالي فتابعونا.
كلام كتير اتقال بخصوص إن الفنان محمد رمضان مش موجود في منافسة موسم أفلام عيد الأضحى اللي هلّ علينا اليومين دول.. في ناس بتعتبر نمبر وان مش هيقدر على المنافسة مع الفنانين اللي نازلين وعشان كده انسحب وناس تانية صدقت السبب إنه قال فيلمه الجديد “ع الزيرو” لسه مخلصش تصوير ومش هيلحق الموسم طبعًا هي أسباب بتتقال للجمهور لكن ما خفي كان أعظم.. وفي سبب تاني خالص خلى محمد رمضان يقول إنه مش أدها وفي حاجة كمان هي اللي حكمت الشركة المنتجة أصل بردوا اسم الفنان ليه دور كبير جدًا في الحكايات دي.
استنوه في يوليو
محمد رمضان من كام يوم اعتذر للجمهور وقال إنه مش هيكون موجود بفيلم ع الزيرو في موسم عيد الأضحى اللي هتكون المنافسة فيه شديدة جدًا.. طبعًا هو قال أزمة انتهاء التصوير هي السبب وعشان كده كاست الفيلم هياخد وقته في التصوير عشان يعمل شغل كويس وكمان الناس هتقدر تشوف الفيلم في شهر يوليو يعني ممكن بعد عيد الأضحى بشهر عادي الناس تشوفه.
كل ده الناس استقبلته عادي عشان ميعملش ضغط في التصوير زي ما عمل في فيلم هارلي اللي اتطرح في عيد الفطر اللي عدى ووقتها حصلت مشكلة كبيرة بسبب عدد ساعات التصوير والنقابات اتدخلت والمخرجين عملوا مشكلة وإن لازم الموضوع يكون في لايحة عشان تنظيم عملية التصوير ومجهود الناس.. وموقف رمضان جه في صالحه لما السبب بتاع التصوير والناس أشادت باللي عمله.. طيب الحمد لله خلاويص كده.. لأ لسه ده اللي جاي أحلى.
منافسات قوية
في موسم عيد الأضحى ده هيكون عندنا أفلام مميزة ونجوم تقيلة فعلًا وفي منهم اللي بدأ المنافسة كمان زي الفنان كريم عبدالعزيز اللي خلاص طرح فيلم بيت الروبي من يومين تلاتة كده والناس بتتكلم عنه كمان.. وفي انتظار إن تامر حسني ينزل بفيلم تاج واللي هيكون بردوا منافس قوي ومعاه طبعًا دينا الشربيني والكل مستني يشوف الثنائية دي هتعمل إيه؟.. مش معنى كده إن دول بس اللي هينافسوا.. ده في فيلم تانيين نازلين اللي هما البعبع بتاع أمير كرارة وياسمين صبري ومستر إكس بتاع أحمد فهمي وهنا الزاهد.. وربنا يستر بقى ونشوف منافسة حلوة وأفلام أحلى وكله في صالح الجمهور اللي بيدفع.
سبب صادم
اللي محدش يعرفه بقى إن محمد رمضان منسحب وقوته طلعت على قده خالص.. إزاي؟ بصوا الموضوع ده لخصه الناقد الفني طارق الشناوي وقال إن رمضان طالع من فيلم هارلي وهو خسران وكلمة خسران دي كبيرة هو المفروض أصلًا في عيد الفطر هو كان بينافس نفسه.. يعني اللي كان قصاده أسماء فنانين مش على نفس القوة من النجومية.. وقال طارق إن الفيلم ده خد الفرة بتاعة إجازة عيد الفطر وحقق الإيرادات دي في الأول وبعدين خلاص الفيلم وقع بمعنى وقع واللي بينافسوا قصاده سبقوه.
اللي حصل في موسم عيد الأضحى ده بقى لعبة توزيع.. والفكرة هنا بقى إننا عندنا 500 شاشة عرض سينما بس في مصر كلها ودي كارثة زي ما وصف طارق الشناوي في تصريحات ليه بالظبط وقال إن الرقم ده قليل جدًا لو اتقارن بعدد السكان في مصر الـ105 مليون.
طبعًا شركات التوزيع بتشوف مين النجم اللي اسمه يستحق يكون مسيطر على النسبة الأكبر من الـ500 شاشة وكان كريم عبدالعزيز وتامر حسني ليهم النصيب الأكبر.. طيب فين محمد رمضان منهم؟.. مش موجود اللي متابع بعد كده من شاشات قليل وكمان هو خارج من فيلم خسران هارلي وهنا صعب المجازفة لا الشركات خدته في شاشاتها كنجم أول ولا رمضان والشركة المنتجة لفيلم ع الزيرو هتقبل بعرضه على شاشات محدودة.. وده السبب اللي خلى رمضان بره المنافسة وبقى ع الزيرو بجد.
المنافسة لصالح مين؟
طارق الشناوي عنده رؤية وقال كريم عبدالعزيز فنان مقبول جدًا بأعماله وشغله للجمهور وبيت الروبي هيحقق نجاح كبير جدًا.. طبعًا هو مقدرش يقول تامر حسني مش موجود لأ ده تامر حسني موجود حتى لو هو اللي كتب وأخرج ومثل في الفيلم.. هو آه سمع نص نصيحته لما قاله تمثل بس وهات حد يكتب ويخرج بعد ما شاف فيلم بحبك بس عادي أهو كتب فيلم تاج وساب الإخراج لسارة وفيق.
هنا بقى تاج هينافس بس بيت الروبي هيعديه شوية.. والجديد كمان إنه قال كريم عبدالعزيز هينافس جوه مصر ويتصدر وتامر حسني هينافس بره مصر ويتصدر عشان تامر في الخليج ليه جماهيرية أكبر.. وده مش معناه إن الأفلام التانية مش هتنافس لأ هتنافس جدًا وهيكون ليها وجود كمان.
