ماذا سيحدث لأسعار الذهب يعد العيد؟ وهل ستشهد ارتفاعا جديد أم ستواصل الانخفاض؟ هذه الأسئلة تشغل بال العديد من المواطنين، لكن شعبة الذهب خرجت وحسمت الجدل وأعلنت مفاجأة بشأن مستقبل الأسعار، تابعونا لمعرفة التفاصيل من خلال التقرير التالي:
خلال الفترة الأخيرة البنك الفيدرالي كان أعلن تثبيت سعر الفايدة، وده بالتالي هيرفع أسعار الدهب عالميا ومحليا، ده كمان مع دخول موسم الأعياد أسعاره برضو بترتفع، لكن اللي حصل الفترة الأخيرة إن الأسعار مرتفعتش وبقت تنخفض كل يوم والتاني
وده خلى كتير من الناس بقت عايزة تعرف إيه مصير أسعار الدهب الفترة الجاية وخصوصًا بعد عيد الأضحى
بص يا سيدي، بحسب هاني ميلاد رئيس شعبة الدهب الغرف التجارية في برنامج صالة التحرير، إن أسعار الدهب هترتفع بعد العيد بسبب زيادة الاقبال بعد إجازة العيد
وقال كمان إن عادة أوقات المناسبات والأعياد بيكون في إقبال على الدهب، لكن دلوقتي الإقبال متوسط
وقال إن سبب عدم إقبال الناس على شرا الدهب في الوقت الحالي بشكل كبير يرجع بسبب تركيزهم مع أضاحي العيد، وبسبب الانخفاض على الشرا أسعار الدهب انخفضت
وده خلي الناس تفتكر إن الدهب هينخفض أكتر الفترة الجاية، بس قال إن سعر الدهب دلوقتي منخفض جدا وده انسب وقت للاستثمار فيه
وكمل وقال بناء على خبرتي، أسعار الدهب مش هتنخفض تاني لأنه وصل لأقل نقطة وبقى مساوي للسعر العالمي
وبحسب تصريحات حسام العجمي، رئيس قسم أبحاث أسواق الدهب في شركة جولد بيليون لتداول الدهب فيجريدة الوطن، إن أسعار الدهب الفترة الجاية هتنخفض نسبيا الفترة الجاية لحد عيد الأضحى
وقال إن سبب الانخفاض ده في الوقت الحالي، يجي بسبب قلة الطلب على شرا الدهب لأن المواطنين دلوقتي بيتجهوا لشرا لوازم العيد من لحوم وأضاحي وده سبب انخفاضه بالإضافة لانخفاض الأسعار العالمية بسبب استقرار سعر الدولار
أما بقى بالنسبة لأسعار الدهب بعد العيد، قال إن أنها ممكن ترتفع ارتفاع بسيط ومش بقوة زي ما حصل قبل كده، وده بسبب زيادة الطلب بشكل عام في الصيف على الدهب، خصوصا مع كتر موسم الخطوبات الزواج في الوقت ده ، بس دي هتكون تحركات بسيطة ومش مرتفعة
وده نفس الكلام اللي قاله أمير رزق، خبير المشغولات الدهبية للمصري اليوم، إن أسعار الدهب هترتفع بعد عيد الأضحى عشان كده نصح الناس تشتري في الوقت الحالي قبل موجة الارتفاعات اللي جاية
وقال كمان، إن سبب انخفاض أسعار الدهب في مصر في الوقت الحالي يرجع لانخفاضه عالميا، بالإضافة لقرار مجلس الوزرا بإعفاء الواردين من الخارج من الجمارك
وبحسب عمرو المغربي عضو مجلس إدارة شعبة الدهب في الغرف التجارية، للمصري اليوم، إن أسعار الدهب دايما قبل الأعياد بترتفع بسبب زيادة الطلب عليه ونقص المعروض
لكن المرة دي الوضع مختلف وده لأن في استقرار واضح وانخفاض في الأسعار خلال الأسابيع الأخيرة وده بعد ارتفاعات تاريخية حققها المعدن الأصفر
وقال إن ممكن يكون سبب الانخفاض ده هو قرار الحكومة بالسماح بدخول الدهب من غير جمارك، عشان كده في 215 كيلو دهب دخل السوق المصري وده رقم كبير جدا
ودلوقتي قولنا شايف إن أسعار بعد العيد هتنخفض ولا لا؟
