عايز تشتري الذهب ب3200 جنيه ، يعني أقل من سعره الحالي ب400 جنيه في الجرام.. يتابعنا خلال التقرير التالي وتعرف على ما سيحدث الفترة القادمة.
في الأول خلينا متفقين ان الدهب اثبت إنه أول اختيار صح لو بتدور إزاي تحافظ على فلوسك، وكله بالتجربة.يعني لو بصيت على سعر الدهب في أول 2023 ودلوقتي.. هتلاقي سعره زاد جدا.
والشطارة كلها بقى انك تشتري الدهب في وقت انخفاضه عشان لما تمنه يزيد تبقى انت الكسبان.
وطبعا الفترة الأخيرة، اللي كان بيحصل في أسعار الدهب كان جديد على السوق في مصر، وفي لحظة معينة سعر الجرام عيار 21 عدى ال 4000 جنيه، بس دلوقتي السعر في منطقة 3600 جنيه وبيزيد أو بيقل حاجات بسيطة.
عشان كده الناس محتارة تشتري ولا تستنى يمكن الأسعار تنزل أكتر؟
بص ياسيدي، ناجي فرج، مستشار وزير التموين لشؤون الدهب، بيقولك اصبر واستنى لأن أسعار الدهب الفترة اللي فاتت كان مبالغ فيها، والدليل انها نزلت ولسة هتنزل.
ولازم تبقى عارف إن سعر الدهب في مصر مبني على 3 حاجات هي سعر الدهب في البورصة العالمية، وسعر الدولار في السوق الموازية، وكمان حجم العرض والطلب.
وحسب كلامه، اللي بيحصل دلوقتي في السوق هو حركة تصحيح للدهب، وهيفضل سعره يقل لغاية مايوصل للسعر العادل للجرام عند 3200 جنيه لعيار 21, وساعتها تقدر تشتري.
والزيادة اللي حصلت الفترة اللي فاتت دي كان سببها إقبال المصريين على شراء الدهب بكميات كبيرة، خصوصا مع الأخبار الكتيرة بخصوص اقتراب التعويم الخامس للجنيه
طيب افرض انت سمعت الكلام ده، بس لسة قلقان برضه وخايف تحصل حركة مفاجئة والدهب يطلع مرة تانية.. تعمل إيه؟
في الحالة دي اقسم البلد نصين، يعني تقسم الفلوس اللي معاك وتشتري بجزء منها على سعر النهاردة، وتسيب المبلغ الباقي على اساس تشتري كل مايحصل انخفاض في أسعار الدهب.
وبكده تبقى اشتريت بأسعار مختلفة بحيث انك تبقى اشتريت بقيمة كويسة.بس طبعا قبل ماتحط فلوسك في دهب , 3 حاجات لازم تحطهم قدام عينيك:
1: الدهب وسيلة ادخار طويلة ومتوسطة الأجل، يعني مش هتشتريه النهاردة وتبيع بعد شهر ولا حتى 6 شهور.
انت محتاج تصبر سنة على الأقل عشان تبدأ تفكر في البيع، يعني متشتريش بمبلغ انت عارف انك هتحتاجه بعد فترة قصيرة، ودايما اشتري بالمبلغ اللي يزيد عن احتياجاتك.
بس افرض عملت كل ده وفي الآخر اتزنقت ومحتاج سيولة.. هتتصرف إزاي؟
ده ياخدتا للنقطة رقم 2، ودي ليها علاقة بنوع ووزن الدهب اللي بتشتريه، يعني خلي السبايك بأوزان صغيرة ومتوسطة هي اختيارك الأول.
وبرضه تقدر تشتري المشغولات الدهب زي الغوايش والخاتم، بس اختار القطع اللي الشغل فيها قليل لأن مصنعيتها هتبقى أقل، وانت أولى بكل جنيه، خصوصا لو انت شاري الدهب بغرض الادخار مش زينة للمدام.
وفي الحالة دي لو اتزنقت هتبيع اللي يغطي المبلغ اللي انت محتاجه بس، ومش هتضطر تبيع الدهب كله بخسارة.
أما بقى النقطة التالتة فهي المكان اللي هتشتري منه، ودايما خليك في الأمان واشتري من حد معروف في منطقتك ولازم الفاتورة اللي تاخدها يبقى مكتوب فيها كل التفاصيل.
ودلوقتي بقى قولنا هل شايف إن الدهب أفضل استثمار موجود في مصر فعلا؟ وإيه توقعاتك للأسعار الفترة الجاية؟
