الأسعار ستزيد كمان وكمان والكيلو هيبقى بـ 25 جنيه، ده اللي اتقال خلال الساعات الأخيرة بخصوص أسعار الطماطم اللي وصلت لأكتر من 20 جنيه في الأسواق، وده خلى المسئولين يطلعوا ويفسروا ارتفاع أسعارها بالشكل ده
فياترى إيه أسباب ارتفاع الطماطم بالشكل ده؟ وهتنحفض امتى؟ وهل فعلا هتزيد الأيام الجاية؟ وكان إيه رد وزارة الزراعة عن اللي بيحصل
أسعار الطماطم بقت محل جدل بين كتير من الناس خصوصا بعد ما ارتفعت اكتر بالنسبة لسعرها الشهر اللي فات لحد ما وصلت دلوقتي لأكتر من 20جنيه للكيلو
وده خلى ناس كتير تسأل ايه سبب ارتفاع أسعار الطماطم بالشكل ده؟
شوف يا سيدي، حسب تصريحات حسين ابو صدام نقيب الفلاحين للمصري اليوم، أن كيلو الطماطم بيتباع حاليا عند باعة التجزئة بـ20 جنيه يعني بزيادة عن سعرها الشهر اللي فات بقيمة 5 جنيه
وكمل وقال إن ارتفاع أسعار الطماطم حصل بسبب تأثر محصول الطماطم بالتغيرات المناخية نتيجة ارتفاع درجات الحرارة، وده أثر على الإنتاجيه في الوقت اللي تأخر فيه إنتاج عروة الطماطم في الصعيد بسبب الارتفاع الكبير في درجات الحرارة، وضعف نمو الشتلات
وقال أن الطماطم كانت بتتباع في سوق الجملة من شهر بأسعار تتراوح من 6 لـ8 جنيه، وحاليا بتتباع في أسواق الجملة من 8 لـ9 جنيه، لحد ما وصلت عند بياعين التجزئة من شهر لـ15 جنيه ووصلت دلوقتي لـ 20 جنيه، مش بس كده ده قال إن سعر الطماطم لسه هيرتفع تاني وهيوصل لـ 25 جنيه خلال الايام الجاية
بس حسب تصريحات محمود فوزي، رئيس الإدارة المركزية للبساتين والمحاصيل الزراعية بوزارة الزراعة، لصدى البلد، أن الارتفاع في الأسعار الطماطم مش هيستمر كتير، لأن محافظات مصر المشهورة بزراعة الطماطم بيستعدوا دلوقتي لحصاد العروة النيلى من محصول الطماطم
وقال كمان أن زيادة الأسعار جت بعد ارتفاع درجات الحرارة من بداية فصل الصيف وده أدى لتراجع الإنتاجية، لكن الاسعار من المتوقع أنها تنحفض مع بداية موسم الحصاد اللي جاي
وقال أن إجمالي المساحات المزروعة من محصول الطماطم حوالي 500 ألف فدان، بيتزرعوا على 3 عروات وهما العروة الشتوية والعروة الصيفية والعروة النيلى بإجمالي إنتاجية تتراوح ما بين 6 ل 7 مليون طن
وحسب تصريحات حاتم نجيب، نائب رئيس شعبة الخضروات بغرفة القاهرة التجارية، ان الطماطم السنة دي اتاثرت بارتفاع درجات الحرارة خصوصا انها من المحاصيل اللي مش تتحمل درجات الحرارة المرتفعة لأنها سريعة التلف، وده طبعا نتج عنه قلة في المعروض
وقال كمان إن الخطر مش في المحصول الحالي لأن التجار هيقدروا يحطوه في تلاجات ويحافظوا عليه المشكلة في المحاصيل اللي جاية اللي لسه متحصدتش اللي لأنها مهددة بالتلف وده هيأدي لخساير كبيرة للمزارعين بجانب قلة المعروض في الاسواق
عشان كده طلب من جميع المسئولين في الدولة عن قطاع الزراعة، بضرورة تكثيف الحملات الزراعية، والزيارات الميدانية للمساحات المزروعة طماطم، لتوجيه المزارعين وتوعيتهم ومساعدتهم في استخدام الطرق الحديثة اللي تمكنهم من إنقاذ محصول الطماطم من التلف
ودلوقتي قولنا بتشتري كيلو الطماطم بكام؟
