سباق شهادات الادخار بين البنوك عاد من جديد، لأنه بعد ساعات من طرح الشهادات الدولارية في بنك مصر والبنك الأهلي، دلوقتي تم الإعلان عن أجدد شهادة في مصر وبأعلى عائد في البنوك كلها بنسبة 40 ٪ مقدما.
فياترى إيه تفاصيل شهادة ال40٪؟ وموجودة في بنك إيه؟ وإيه المطلوب عشان تشتريها؟وايه الفرق ما بينها وما بين الشهادات الدولاريه اللي بنك مصر والبنك الاهلي طرحوها خلال الساعات الاخيره؟
من ساعات أعلن البنك العربي الافريقي عن أحدث شهادة ادخارية في مصر، في مفاجأة للكل وهذه هي التفاصيل:الشهادة مدتها 3 سنين زيها زي كتير من شهادات الادخار الموجوده في البنوك. والحد الأدنى للشراء 5000 جنيه ومضاعفاتها من غير حد أقصى.
أما بقى الميزة الأكبر فهو العائد اللي كشف عنه البنك العربي الافريقي، واحنا هنا بنتكلم عن عائد 40% مدفوع مقدما يعني لو استثمرت فيها 100 الف جنيه هتاخد 40 الف جنيه مقدم، وبعد انتهاء مدة الشهادة اللي هي 3 سنين هتاخد ال 100 الف بتوعك تاني بالتمام والكمال.
وسواء كنت متابع أو لأ، ضروري تعرف إن البنك الأهلي وبنك مصر، أكبر بنوك حكومية في البلد هم كمان خلال الساعات الأخيرة طرحوا شهادات دولارية جديده بعائد يوصل ل 27%.
فياترى إيه الفرق بين شهادات البنك الاهلي وبنك مصر وشهاده البنك العربي الأفريقي؟ بصي يا سيدي أهم حاجة إن شهادة البنك العربي الافريقي هتشتريها بالجنيه المصري وهتقبض العائد بالجنيه المصري.
تعالى بقى بص على شهادات البنك الاهلي وبنك مصر هتلاقيهم طرحوا نوعين من الشهادات الدولارية لمدة 3 سنين برضه. بس الفكرة هنا ان النوع الاول بيديك فايده 7% والعائد عليها بيتصرف كل 3 شهور بالدولار.
والنوع ده موجودة في البنك الاهلي باسم “الاهلي بلس” وفي بنك مصر باسم “شهاده ايليت”
أما النوع التاني فهو الشهادة الدولارية بفائدة 9% بس بشرط عائد ال3 سنين بتصرفه مقدما بنسبة 27% من قيمه الشهادة وبالجنيه المصري.
وطبعا كده الفرق بين شهاده البنك العربي الأفريقي مشاهدات البنك الاهلي وبنك مصر بقى أوضح لأن شهاده البنك العربي الافريقي زي ما قلنا تقدر تشتريها بالجنيه وهتاخذ العائد بالجنيه.
انما شهادات البنك الاهلي وبنك مصر لازم تشتريها بالدولار بحد ادنى 1000 دولار،وفي نهايه المدة هتستلم فلوسك برضه بالدولار.
وعلى فكره دلوقتي تقدر تشتري شهادات الدولاريه من فروع البنك الاهلي او بنك مصر ولو مش عاوز تضرب المشوار تقدر تشتريها عن طريق الموقع الالكتروني لكل بنك او من خلال تطبيقات الانترنت البنكي التابعه لكل بنك فيهم.
وخد بالك ان طرح شهادات الداخليه بفائده عاليه سواء كانت بالجنيه المصري او بالدولار بيحصل قبل أيام من اجتماع البنك المركزي في 3 اغسطس الجاي لتحديد مصير اسعار الفائده، فقولولنا بقى ايه رايكم الشهادات الجديدة اللي نزلت في البنوك؟ وهل شايفين ليها علاقه اجتماع البنك المركزي الجاي؟
