حياة النجوم لا تخلى من المواقف المحرجة ، لكن ان شخص يدخل على نجمة كبيرة غرفة النوم ويوقظها لكي يسألها على أغنية هذا أمر لا يصدقه أحد فهو بالطبع شخص مجنون، ولكن هذا ما حدث بالفعل مع الفنانة إليسا.
مفيش حد في الوطن العربي مبيحبش صوت اليسا واحساسها ، وكلنا بنستنى البوماتها كل سنة ، وفي 2022 سافرت اليسا للكويت عشان تعمل حفلة كبيرة هناك ، وطبعا كانت نازلة في اوتيل ، وفجأة انتشر ليها فيديو وهي نايمة وفي واحد داخل بيصورها في اوضتها .. ايه اللي حصل ؟
دخل معجب على اليسا اوضة نومها في الأوتيل، وهي كانت نايمة وهز دراعها عشان يصحيها ، وهي قامت بصتله ومتفاجئة من اللي بيحصل ، فقام سائلها المعجب ده وقالها : امتى هينزل الألبوم ؟” ، وردت عليه اليسا بعد مافاقت وقالتله : البوم ايه احنا عندنا حفلة ، سبوني انام شوية ، ورجعت اليسا غطت وشها باللحاف وكملت نوم عشان تستعد لحفلتها بالليل في الكويت.
المفاجآة ان اليسا اصلا مضايقتش من الحركة ولا ان في واحد دخل عليها الاوضة وهي نايمة وفتح النور وصحاها وصور كل ده ، لا بالعكس نشرت الفيديو على حسابها على انستجرام مع جزء من حفلتها ، وكتبت عليه 24 ساعة في الكويت
وطبعا كل ده كان متفق عليه ما بين اليسا وفريق العمل اللي شغال معاها ، وده نوع من الدعايا اللي عملتها لحفلتها بالكويت ، وحد اقترح عليها الفكرة واتعملت بالشكل ده ، خاصة وان اليسا عندها تفاعل كبير مع جمهورها على السوشيال ميديا ونشرت الفيديو على انستجرام وكان عليه تفاعل كبير.
الناس في الاول كانت فاكرة ان في حد اقتحم اوضة اليسا واتعرضت لموقف محرج او سخيف لكن الموضوع مش كدا ، وهي كانت بتهزر وتضحك معاه في الفيديو بدليل انها قالتله البوم ايه انا عندي حفلة وعايزة انام شوية كمان
وجايز مكنتش بتفكر انها تنزل الفيديو ده ، لكنه اتنشر بعد ما الحفلة اتعملت ودمجت معاه جزء من اغنية ليها على المسرح في الكويت.
وبعد الفيديو بتاع اوضة النوم ده ، نشرت اليسا فيديو برضه لنفس الشخص وهو داخل عليها وهي قاعدة في السرير بتاكل حاجة حلوة ويسألها بتاكلي ايه ،، وده طبعا كله جزء من الحملة الدعائية لحفلة اليسا وزيارتها للكويت.
السؤال اللي بيدور حولين اليسا دايما هو عن حياتها الشخصية وليه متجوزتش لحد دلوقتي رغم ان سنها تخطى الاربعين سنة.
بس هي عندها وجهة نظر في الموضوع ده ودايما بتعرضها لانتقادات كتيرة ، وهي ان الجواز مش شرط يتم لكن الاهم انها تعيش قصة حب حقيقة وتشبع رغبتها العاطفية.
ومرة اتكلمت اليسا عن حبيبها وقالت انها عايشة قصة حب ومبسوطة معاه لكن علاقتهم متسمحش بالجواز ، وقالت : انا مبدخلش علاقة حب عشان اتجوز لكن عايزة اكون انثى عندها مشاعر عايشة بيها والجواز ممكن يحصل وممكن لا ، المهم اني عايشة الحب.
ووقتها مرضيتش اليسا تقول هو مين حبيبها ده ، لكن اكتفت بتشويق جمهورها وقالت : اكيد مش عربي، انا بحب الشباب الحلوة.
اليسا مش بتفكر في الجواز خالص ومش هي دي قضيتها الاولى ، لكن والدتها كانت دايما بتكلمها في الموضوع ده ونفسها تطمن على بنتها زي اي ام ، لكن والدها كان العكس خالص و بيشجعها على الدراسة والشغل وانها ازاي تكون مستقلة مادية ، وده اللي قدرت تعمله اليسا ونسيت خالص قصة الجواز.