اتحصرت في أدوار الإغراء والأدوار التي فيها جرأة، وعادل إمام هو تميمة حظها، وجمالها في فترة التمانينات كان أوروبي عملت راقصة وأختها أيضا كانت راقصة معروفة.. غيّرت اسمها لاسم فني جميل ملئ حكمة وعقل وجميع الحرف اليدوية ومهارات الفنون عند قدماء الرومان، إنها الفنانة منيرة أحمد خشبة واسمها الفني منيرفا.
فيلم سلام يا صاحبي مع عادل إمام وسعيد صالح أهم أفلامها وكانت عاملة دور سكرتيرة الكينج الفتاة اللعوب.. وشاركت بردوا في أعمال كتير بس هي اختفت فجأة!.. طيب بعد أكتر من 35 سنة من عرض فيلم سلام يا صاحبي.. وبعد حوالي 30 سنة من اعتزالها يا ترى فين منيرفا وبقى شكلها إيه دلوقتي؟.. ومين هي أختها الرقاصة الشهيرة؟.. كل ده وأكتر حقولكم عليه في التقرير التالي:
عارفين إن فيلم سلام يا صاحبي لـ عادل إمام وسعيد صالح، وإخراج نادر جلال، مليان تلات أرباع مخزون العالم من الأفورة والكليشيهات.. لكنه أيقونة أفلام فترة الثمانينات ونجح بشكل كبير في دور العرض ورغم بساطة قصته ونقلها بالمسطرة من الفيلم الفرنسي الايطالي borsalino اللي صدر سنة 1970 وبطولة آلان ديلون.. لكن منيرفا حققت نجاح منفرد في الفيلم ده وهو صدر سنة 1987 يعني عدى عليه 35 سنة.
مساعدة الكينج
وقدمت منيرفا دور مساعدة الكينج أو سكرتيرة الكينج اللي جسده الفنان محمد الدفراوي وطبعًا كانت سكرتيرة لعوب تغري الراجل اللي شغالة معاه وتعيش معاه علاقة مش ولابد.. وهكذا لحد ما تغدر بالكينج وتشتغل مع عادل إمام.. ومنيرفا أو منيرة أحمد خشبة تبقى ممثلة وراقصة مصرية ده تصنيفها.. وبدأت مسيرتها أواخر السبعينات لما شاركت في فيلم “أنقذوا هذه العائلة” سنة 1979، وبعدين فيلم “ليلة بكى فيها القمر” مع الفنانة صباح.
اعتزال الفن
مش بس فيلم سلام يا صاحبي اللي شاركت فيه منيرفا آه هو بداية شهرتها والناس عرفتها بس قبلخا شاركت سمير غانم في فيلم “احترس عصابة النساء” سنة 1986 وكان معاها إلهام شاهين، وفيلم “عفوا زوجتي العزيزة” مع وحيد سيف وأحمد راتب سنة 1990، واشتغلت تاني مع الزعيم في فيلم “مين فينا الحرامي”، وهي قدمت 33 عمل فني بين السينما والتلفزيون، آخرها كان مسلسل “الطوفان” سنة 1994، لحد ما اعتزلت الفن في نص التسعينات وكان آخر أعمالها السينمائية فيلم “قدارة” سنة 1994 مع فيفي عبده ورغم أدوارها الجريئة والشهرة اعتزلت الفن ومكملتش خالص.
فين أراضيها؟
رغم الشغل اللي قدمته منيرفا واعتزالها الفن سنة 1994 بس هي غابت عن الأضواء وقطعت أخبارها بالصحافة والإعلام ومحدش يقدر يقول هي على قيد الحياة ولا رحلت.. وكمان محدش يعرف هي عايشة في مصر ولا هاجرت بره مصر مع موجة الهجرات في التسعينات اللي حصلت القرن الماضي مع ظهور نموذج الحلم الأمريكي.. وكل اللي اتقال عنها في الصحافة إنها تبقى أخت الرقاصة المصرية حنان بس موقع صدى البلد نشر عنها إنها اتجوزت وهاجرت مع جوزها على الولايات المتحدة الأمريكية ومرجعتش لحد دلوقتي.