بسبب أزمة الكهرباء، الحكومة أعلنت إن بعض الموظفين سيؤدون عملهمو “أون لاين” من البيت يوم الأحد من كل أسبوع. وهذا من أجل تخفيف الأحمال لحل مشكلة الكهرباء.
بس لو انت فاكر إن القرار ده هيشمل كل الموظفين، لأ تعالى هنا بقا لأن الكلام ده مش مظبوط وفي فئات معينة هيشملها تطبيق القرار ده.
رئيس الوزراء الدكتور مصطفى مدبولي طلع في مؤتمر صحفي للحكومة في مدينة العلمين وأعلن عن إجراءات جديدة عشان نواجه بيها مشكلة الكهرباء اللي بتمر بيها مصر الفترة دي.
وده عشان تخفف بيها الأحمال وأهمهم إن الموظفين في القطاع الحكومي هيشتغلوا يوم الأحد أون لاين من البيت وده عشان نوفر أحمال الكهرباء، بس ده في شهر أغسطس بس، والبداية من تاريخ 6 أغسطس!
طيب ياترى الكلام هيطبق على مين بظبط ؟
مصدر حكومي اتكلم مع جريدة الوطن وقال إن في جهات حكومية كتيرة هتقدر تنفذ قرار الحكومة وتشتغل أون لاين يوم الأحد
وأهمهم الجهات اللي مش مرتبط شغلها بتقديم الخدامت للمواطنين بشكل مباشر زي الأحياء ومجالس المدينة
ولو فاكر إن حكومتنا لسه ماشية بدفاتر وأوراق تبقى غلطان!
وده لأن المصدر أكد إن معظم الجهات الحكومية عندها منظومة تكنولوجية تخليها تقدر تؤدي المهام بتاعتها أون لاين والموظفين بتوعها مش مضطرين يروحوا الشغل أصلا وممكن يشتغلوا من البيت اليوم ده.
والموظفين اللي هيشتغلوا أون لاين هما موظفين 18 جهة وعد معايا:
ديوان عام وزارة التخطيط والقطاعات التابعة لها .
و وزارة العمل.
و مديريات العمل بالمحافظات.
-و قطاعات وزارة التنمية الإدارية.
-وكمان موظفين الجهاز المركزي للتنظيم والإدارة.
– و مديريات التنظيم والإدارة بالمحافظات.
– و ديوان عام وزارة التنمية المحلية.
– و الجهاز المركزي للمحاسبات
– والموظفين في الجهاز المركزي للتعبئة العامة والإحصاء.
– و قطاعات وزارة البترول الإدارية.
– و ديوان عام وزارة الاتصالات.
– و ديوان عام وزارة الزراعة.
– و وزارة الاستثمار.
– و وزارة الثقافة.
– و وزارة الشباب والرياضة.
– و مديريات الشباب والرياضة بالمحافظات.
– وكمان موظفين وزارة التضامن الاجتماعي.
– وأخيرا وزارة الصناعة والتجارة الخارجية.
بس دلوقتي هيجي حد يقولي ما الحكومة أعلنت إن الأزمة هتنتهي نص الأسبوع اللي فات ودلوقتي الكلام اتغير!واشمعنا يعني قرار عمل الموظفين يوم الحد أون لاين هيطبق في أغسطس؟
هقولك ياسيدي حسب تصريحات الدكتور مصطفى مدبولي فـ فعلا الحكومة ادت نفسها الوقت ده على اعتبار يعني إن موجة ارتفاعات الحرارة الشديدة دي هتنتهي لكن اللي حصل إنها منتهتش وواضح إنها مكملة معانا شوية ده غير كمان إن الارصاد أعلنت إن أغسطس الجاي هيشهد درجات حرارة مرتفعة مشوفنهاش قبل كده
وطبعا بناء على الكلام ده، الحكومة قررت تستمر في آلية تخفيف الأحمال وده لأنه حسب تصريحات رئيس الوزراء المشكلة مش مرتبطة بس بتوفير كميات الوقود عشان تشغل المحطات الكهربائية
لكن المشكلة إن التوربينات اللي بيستخدموها عشان تشغل المحطات الكهربائية بتحتاج تستهلك وقود أكبر لما درجة الحرارة بتزيد عند درحة معينة وده عشان تشتغل بنفس معدل الكفاءه، وعشان كده الحكومة هتستمر في آلية تخفيف الأحمال
والجديد بقى إن الحكومة هتنزل جداول بمواعيد قطع الكهرباء في كل حي، والجدوال دي هتنزل بحد أقصى يوم الاتنين.
ودلوقتي بقى قولنا رأيك في قرار الحكومة وهل شايف إنه هيساعد في حل الأزمة؟