الست كوريا و ميس انشراح و عزيزة كلها أسامي شخصيات قدمتها حنان الطويل .. و التي بالرغم من انه أدوار قليلة الا ان ناس كثير يحبوها ويحبوا الأدوار التي قدمتها.
.. حنان الطويل عرفت تخلي الناس تضحك أمًا اشوفها .. بس معرفتش تعيش وسطهم وهي حنان .. ومحدش هيصدق ان اللي بتعرف تقدم الادوار الكوميدية ديه عاشت حياة مأساوية جدا .. من ساعة ولادتها لحد وفاتها .. اللي هي لغز بردو .. بس ليه حياتها كانت صعبة و ليه وفاتها محيرة ناس كتير .. هنعرف أكتر مع بعض.
في سنة ١٩٩٩ ظهرت بنت في فيلم عبود على الحدود. طلعت مشهد في محل الكوافير و شعرها بيتحرق .. بس بالمشهد ده الناس بقت عاوزة تعرف هي مين. حنان الطويل. اللي معروفة باسامي شخصياتها زي ميس انشراح و الست كوريا و عزيزة وغيرهم، فقليل اوي اللي يعرف ان اسمها حنان و مش كتير يعرفوا ان حنان كانت طارق.
والحكاية بدأت من ساعة ولادته سنة ١٩٦٦.. و كان طفل مختلف عن باقي اللي في سنه. وكل ما يكبر كل ما يحس انه مش زي باقي الولاد ، لحد مرحلة الشباب و تصرفاته و ردود أفعاله كلها زي البنات، و من هنا بدأ المشاكل بينه و بين عيلته .. و اللي أول ما عرض عليهم فكرة انه يكشف حصلت الصدامات الكتيرة بينهم ، و اللي ساعتها قرر طارق انه يمشي في الطريق ده لواحده .
وفعلا بعد الكشف كان لازم يعمل عملية تحول جنسي، و سافر برة مصر و عملها ، و غير اسمه و بقى حنان .. في أول مرة أهله شافوه بعد العملية رفضوا وجوده. أو وجودها و مش بس أهلها ، ده كمان الجيران اللي بقوا يعيروها في الرايحة و الجاية .. شوية بالنظرات و شوية تانيين بالكلام ، لحد ما حصلت خناقة كبيرة بينهم، وبسببها قررت حنان تسيب المكان و تروح تعيش في مكان تاني مع ناس محدش يعرف عنها حاجة .
اشتركت حنان في فرقة فنون استعراضية .. و اللي بانت موهبتها معاهم في الرقص و الغنا و التمثيل ..و قدمت على انها تكون عضو في نقابة الموسيقيين و نجحت في الاختبارات .. و بقت عضوة فيها .. بس كانت دائما حاسة انها لا عاوزة تدخل التمثيل .
وكان أول مشهد ليها، في فيلم عبود على الحدود، لكن البداية الحقيقة كانت سنة ٢٠٠٠ أما ظهرت في فيلم ” الناظر” بدور ميس انشراح، و اللي اخد دلوقتي مشاهدها بتتعمل ميمز على السوشيال ميديا، بدأت تحس حنان ان الدنيا هتضحك ليها، و بعد فيلم الناظر قدمت عزيزة في فيلم ٥٥ اسعاف، و مش بس السينما. علاء ولي الدين كان شايف فيها مشروع فنانة كوميدية كبير، و خلاها تطلع معاه في مسرحية حكيم عيون .
نجاح حنان خلى المخرجين يطلبوها و ظهرت في أكتر دور الناس بتحبه ليها وهو دور الست كوريا مع الفنان محمد هنيدي في فيلم عسكر في المعسكر. وحاولت حنان انها تسيب أثر حلو في كل دور هي بتقدمه، بس فجأة بدأت تتعرض تاني للسخرية، شوية من صوتها و رجعت قصة تحولها تاني، و الناس تاخد جنب منها .
ومش بس كده جيرانها بدأو يقدموا بلاغات ضدها انها عندها اضطرابات نفسية، و بسبب ده دخلت مستشفى العباسية،و اللي مخرجتش منها غير و هي متوفية .
و بصراحة وفاتها لغز كبير لحد دلوقتي، لان في ٣ حكايات عن وفاتها .. الأولى انها كانت وهي بتاخد جلسة كهربا، و مستحملتش، و الحكاية التانية انها مقدرتش تقاوم سخرية الناس منها و معاملتهم ليها و قررت انها تنهي حياتها بنفسهاو الحكاية التالتة و اللي ناس كتير بيرجحوها انها ماتت بسبب أزمة قلبية،من الحزن أو فجأة .. الأكيد انها حست بيأس و حزن من كل اللي حواليها .
و الأصعب من كده ان في أقاويل بتقول ان أهلها رفضوا انهم يستلموها علشان تدفن .. و اللي دفنها ناس غريبة عنها .. و زي ما عاشت وحيدة ماتت بردو وحيدة .