حيتان تطير في السماء وابراج بارتفاعات شاهقة لا تجد مثلها في أوروبا ، هذا كله نقطة من بحر خلف الحبتور، الملياردير الإماراتي ، الذي اسمه يهم كل المصريين.
فياترب إيه خطته لإنقاذ مصر من الديون؟ وليه حاطط عينه على شارع صالح سالم في مصر؟ وليه موجود ف العلمين دلوقتي؟ وإيه الرسالة المهمة اللي بعتها من هناك؟ وإزاي هيدخل مليارات الدولارات لمصر؟
اسئلة كتير أوي عن خلف الخبتور وخططه جوة مصر، هتعرفوا اجابتها في التقرير التالي:
لو تفتكروا من فترة ظهر فيديو علي النت لحيتان طايرة في سماء الإمارات حوالين برج كبير، اهو البرج ده بقى تبع مشروع الحبتور سيتي، المملوك لرجل الأعمال خلف الحبتور اللي زيارته لمصر قالبة الدنيا، لأن لما حد بحجم الملياردير الإماراتي الحبتور يقول رأيه عن البلد، هياخد التركيز كله..
واهو دلوقتي خلف الحبتور موجود بمدينة العلمين في الساحل الشمالي واللي قاله عنه شد تحته مليون خط، طيب ليه؟
بص ياسيدي، الراجل بيزور مصر بدعوة من صديقه رجل الأعمال حمدي سليمان، ومن ساعة وصوله لمصر وهو كل شوية بينزل فيديو يشكر في جمال الساحل الشمالي وخدمته الهايلة..
ده حتى خدله جولة في واحد من الفنادق بالعلمين وانبهر بالطقم اللي شغال هناك والنظام اللي ماشيين ليه وخد الكبيرة بقى: الملياريد الإماراتي قالك انا شفت جودة وكمية اكل متنوع في البوفيه مشفوتهوش في فنادق أوروبا ولا أغلب فنادق العالم.
وأظن مفيش دعايا أحسن من كده للسياحة في مصر، في وقت البلد بتدور فيه إزاي تدخل دولار من كل حتة، بس بخلاف الدعايا :هل ممكن نشوف استثمارات الحبتور في مصر؟
الملياردير الإماراتي سبق وكشف مع احمد موسى عن فكرة مشروع عمل ضجة في مصر كلها، لأنه طلب من الحكومة تديله صلاح سالم وهو هيعمل هناك مشروع يحوله لجنة الدنيا في الأرض، وإيرادات المشروع ده هتسدد ديون مصر وتخلينا نقول باي باي للقروض.
تفاصيل المشروع
الصراحة الحبتور مقالش تفاصيل مع احمد موسى بس اللي تحت ايدينا تصريحاته السابقة لموقع العربية، عن مشروع ضخم في مصر بقيمة 8.5 مليار دولار عشان يبقى نسخة من الحبتور سيتي في الإمارات.
ده ده كمان الحكومه اعلنت قبل كده عن رغبه الحبتور في الاستثمار جوه مدينه العلمين الجديده وكمان ارض المعارض اللي موجودة على طريق صلاح سالم، حسب المصري اليوم.
وده يخليك تسأل مين هو خلف الحبتور اللي بيتكلم بقلب جامد قوي كده عن استثمارات بمليارات الدولارات؟!
هو بدأ موظف بسيط في شركة اماراتية وبعدها استقال وبدأ شغله الخاص ودلوقتي عنده مجموعه اقتصاديه دايسه في كل حاجة تقريبا: سيارات فارهة، شغل فنادق، ابراج سكنيه، تعليم، وغيره وغيره.
وعلي فكرة الحبتور عنده مبدأ مهم ماشي بيه: ما اشتغلش في حاجه ما عرفهاش، عشان كده لما لميس الحديدي سألته من كام سنه عن نوعيه الاستثمارات اللي ممكن يدخل بيها مصر اتكلم عن الفنادق الحكوميه وقال انه ممكن يشتري فيها أو يدخل مساهم مع الحكومة بس يمسك الإدارة.
بس الجديد بقى الكلام المنتشر عن تقديمه عرض رسمي لشراء نادي الزمالك مع وعود ببناء مدينة رياضيه واستاد كبير لنادي الزمالك حسب موقع فوتبول الرياضي.
فهل تفتكروا زياره الحبتور المره دي لمصر مش هتكون للترفيه وبس، وهنشوف فيها اخبار كلها فلوس في فلوس؟ قولوا يا رب