ماذا يحدث للدولار في مصر ولماذا تراجع سعره في السوق السوداء؟ وياترى هل فعلا المضاربين خسروا فلوس كثيرة الفترة الماضية، وما علاقة كل كل ما يحدث بتصريحات الرئيس السيسي الأخيرة؟
كواليس كتيرة تهمك حصلت الفترة اللي فاتت واللي أكيد بتأثر على كل حاجة حولينا فخليك معانا عشان تعرف إيه حصل :
متعاملين في السوق السوداء اتكلموا مع موقع العربية وقالوا إن في تراجع فـ الطلب على الدولار بنسب كتيرة الفترة اللي فاتت
خاصة بعد ما اتكلم الرئيس عبد الفتاح السيسي في مؤتمر للشباب وأكد في كلامه عن إن مفيش أي تخفيض جديد في قيمة الجنيه مقابل الدولار في الفترة الحالية، وده لأنه شايف إن الخطوة دي ممكن تضر بالأمن القومي وبالمصريين
وحسب كلام واحد من التجار للعربية قال إنه في الوقت الحالي الطلب على الريال السعودي في ارتفاع خصوصًا بقا إننا دخلنا في موسم الحج وفي زيارات كتيرة للملكة العربية السعودية وده اللي خلى الطلب عليه يسجل ارتفاعات قياسية وصلت لـ 12 جنيه في السوق السوداء مقابل 8.25 جنيه في السوق الرسمي.
لكن على الناحية التانيه تراجع الطلب على الدولار وعشان كده أسعاره نزلت في السوق السوداء وبعد ما كانت سجل مستوى 40 جنيه في بداية شهر يونيو وصلت لمستوى 34 جنيه وده اللي اتسبب في تكبد كتير من التجار خساير كبيرة جدا.
مش بس كده ده كمان الدولار الأمريكي سجل تراجع قدام الجنيه بشكل ملحوظ في العقود الآجلة غير القابلة للتسليم خلال الأسابيع اللي فاتت.
ووصل لـ مستوى الـ 40 جنيه للدولار الواحد لأجل 12 شهر، وده بعد ما كانت عدت الـ45 جنيه للدولار الواحد الفترة اللي فاتت وده اللي أعلنته وكالة بلومبرج
وعشان تفهم أكتر فـ العقود الأجلة دي هي عقود بتتم بين طرفين وكل واحد فيهم بيحط زي رهان في العقد على السعر اللي هيوصل ليه الجنيه بعد سنة من دلوقتي
وعشان كده لو العقود دي توقعت ارتفاع بالدولار ده بيكون مؤشر مش كويس وبيخلينا نفهم إن في مخاطر حوالين الجنيه والعكس صحيح .
وفي نفس الوقت كشف تقرير حديث لـ دويتشه بنك” إن خفض الجنيه مقابل الدولار في الوقت الحالي مش هيحل الأزمة ولا هتكون خطوة مجدية في زيادة التدفقات الدولارية.
وده لأن البنك الألماني كان متوقع إن سعر الصرف لحد منتصف 2023 هيفضل عند مستوى 31 جنيه لكن توقع إنه مع نهاية 2023 هيكون في تخفيض للجنيه وده اللي هيخلصة هيوصل لـ 37 جنيه .
لكن دويتشه بنك كان شايف إن في تحديات رئيسية قدام الحكومة مصريه أهمها إن التدفقات الدولارية ترجع تزيد تاني
والحقيقية بقا الحكومة المصرية مش ساكتة وبتحاول في كل فرصة إنها تعالج أزمة نقص الدولار
وعشان كده الفترة اللي فاتت أعلنت عن تشكيل وحدة خاصة عشان تسرع برنامج الطروحات واللي أعلنت عنه وكان متضمن طرح 32 شركة مملوكة للدولة في البورصة المصرية أو لمستثمريين استراتيجين
وحسب تصريحات الدكتور مصطفى بدرة الخبير الاقتصادي،لـ صدى البلد فقال إن الأموال الساخنة هترجع لمصر خلال العالم الحالي، واللي كانت خرجت وأثرت بشكل سلبي على الاقتصاد المصري.
وخلي بالك الحكومة بتستهدف إن بيع الشركات دي يتم بحلول مارس 2024
وحسب تصريحات الدكتورة هالة السعيد وزيرة التخطيط واللي نشرها موقع صدى البلد فـ برنامج الطروحات بيستهدف حصيلة إجمالية 6 مليار دولار
دلوقتي قولنا رأيك في اللي الحكومة بتعمله وهل شايف إنها بتتحرك بخطوات ثابته وقوية؟