أمْ البنات اللي قدرت تحققت شهرة كبيرة جدًا في الإعلام.. فيديو النهاردة هنتكلم فيه عن أسرار وكواليس في حياة الإعلامية منى الشاذلي اللي قررت تبعد حياتها الشخصية عن الأنظار خالص.. لكن في كواليس وحكايات مينفعش تستخبى.. مين جوزها اللي يعتبر شخصية مهمة جدًا في مجال الإعلام؟.. وليه كان هيجيبلها رضوى الشربيني تكون ضُرة ليها؟.. وإيه حكايتها مع بناتها التوأم اللي سابت الشغل عشانهم؟.. وليه شايفة نفسها أمْ مش ديمقراطية خالص.. يلا بينا.
منى الشاذلي شايفة إن الخصوصية في الحياة بتساهم في نجاحها وعشان كده قررت تكون حياتها مع جوزها وبناتها بعيد عن الأنظار.. لكن شهرة منى خلت الناس نفسها تعرف أسرار عن حياتها طبعًا مش هي بتعرف تكشف أسرار المشاهير في برنامجها الأشهر “معكم” وبتقدر تقدم للجمهور الكواليس والأسرار اللي بيستناها دايمًا عن المشاهير اللي بيحبهم؟.. وعشان كده قررنا نعمل الفيديو ده نقول فيه الأسرار والكواليس اللي مستخبية.
انطلاقة منى الشاذلي
والإعلامية منى الشاذلي زيها زي أي إعلامية بدأت ببرامج محققتش شهرة أوي ومع الوقت بدأت تغير خريطة شغلها وتحقق النجاحات اللي أي واحد طموح بيتمناها.. ومنى اتولدت يوم 23 ديسمبر سنة 1973.
ودرست الإعلام في الجامعة الأمريكية في القاهرة وبعد ما اتخرجت مبدأتش حياتها إعلامية كده علطول لأ دي قعدت فترة تشتغل في العلاقات العامة في شركة المقاولون العرب.
وبعدها بفترة دخلت مسابقة اختيار مذيعات جدد في شبكة راديو وتلفزيون العرب واللي كانت وقتها الشبكة الأشهر في مصر.
كمان منى الشاذلي اشتغلت مراسلة تلفزيونية في قناة ART طبعًا الطموح موقفش لحد هنا وبدأت شغلها في البرامج يعني قدمت برنامج مهم زي “القضية لم تحسم بعد” و”لا أرى لا أسمع لا اتكلم” و”لا تذهب هذا المساء” بس كل ده مكانتش حققت الشهرة المطلوبة والانطلاقة الصح في الشهرة كانت في برنامج “العاشرة مساء” واللي يعتبر أجرأ وأشهر برنامج في مصر.. بس بعدها بعدت عن السياسة خالص وقدمت برنامج المنوعات “معكم” ولحد دلوقتي مستمرة في تقديمه.
أمْ البنات
منى الشاذلى تبقى أمْ البنات وشايفة نفسها أمْ مش ديمقراطية خالص.. ومنى معاها 3 بنات الأولانية كبيرة وخلصت دراسة والاتنين التانيين توأم ولسه بيدرسوا.. ومنى شايفة إنها مش ديمقراطية من فراغ كده وده عشان هي شايفة إن في أساسيات في التربية ومش كل حاجة سداح مداح كده وكمان دول بنات لازم يكون في حزم شوية ومينفعش تسيبلهم كل حاجة يكون فيها حرية وكمان الأمومة بالنسبة ليها مقدسة.
وعادي عندها تسيب الشغل شوية عشان بناتها وممكن تروح تطمن على بناتها في البيت وقت البريك اللي بتاخده من شغلها لدرجة إنها ممكن تروح البيت مخصوص عشان في واجب متعملش.. أو واحدة منهم راجعة من المدرسة بتعيط وكمان هي بتطبخ لبناتها في البيت بنفسها.
زوجة رجل مهم
الجوازة الوحيدة في حياة منى الشاذلي مستمرة لحد دلوقتي وهي من رجل مهم في مجال الإعلام وهو رجل الأعمال سمير يوسف وهو مدير عام شركة آدم للإنتاج الإعلامي وكمان هو من مؤسسي شبكة راديو وتلفزيون العرب والمدير التنفيذي لوكالة الأخبار العربية والرئيس التنفيذي لقنوات سي بي سي.
طبعًا الحياة بينهم حلوة ومستقرة لحد ما جت الهزة اللي ممكن تيجي لأي بيت مستقر واتقال إن جوز منى الشاذلي قرر يجيب ليها ضُرة وإنه اتجوز الإعلامية رضوى الشربيني وطبعًا لا منى ردت ولا جوزها طلع يحكي في اللي اتقال والطرف التالت رضوى هي اللي قررت تطلع تدافع عن نفسها وتنفي أي كلام اتقال عنها بخصوص إنها لهفت جوز منى الشاذلي واتجوزته.
اكتبولنا في الكومنتات آرائكم في الحياة الشخصية اللي رسماها منى الشاذلي لنفسها وإيه أكتر برنامج حبيتوه ليها؟