هل تعلم أنك إن كنت تعمل أو مقيم بالخارج فإنه بإمكانك الحصول على 3 مليون جنيه ، وذلك لأن البنك الأهلي أعلن خلال الساعات الأخيرة عن قرض جديد للمصريين بالخارج لكن ما هي تفاصيل القرض؟ وما مدته وشروطه؟..تابعونا لمعرفة التفاصيل:
ناس كتير بتسعى دلوقتي أنها تقدم على قرض سواء بقى كان قرض شخصي أو تمويل عقاري وده طبعا بسبب الظروف الاقتصادية اللي احنا فيها، بس أنت لو فاكر إن القروض دي بتقتصر على المصريين جوا البلد تبقى غلطان
وده لأنك ممكن تاخد القرض اللي أنت عايزه حتى لو عايش بره مصر، أيوة زي ما سمعت كده هتاخد القرض من مصر حتى لو انت عايش بره، لكن ازاي؟
شوف يا سيدي، حسب موقع مصراوي، البنك الأهلي كان أعلن من ساعات عن قرض شخصي للمصريين العاملين بالخارج وده بضمان تحويل قيمة القسط بالعملة الأجنبية من الخارج.وقال كمان إن الحد الأدنى للقرض ده هو 50 ألف جنيه وبحد أقصى 3 مليون جنيه
شروط القرض
أنا أقولك، شروط القرض ده تقريبا نفس شروط معظم القروض في أي بنك في مصر وهي أن يكون عمرك مش أقل من 21 سنة وأن يكون سنك لحد أخر قسط هو 60 سنة
بس الاختلاف في قرض المصريين العاملين بالخارج ان تسديد الاقساط هيكون بالعملة الأجنبية حسب سعر الصرف المعلن في البنك وقت السداد.
والميزة الأكبر ان سعر الفايدة عليها أقل ب2.25% من سعر الإقراض في البنك المركزي، وعلى فكرة مدة القرض ده 4 سنين وكمان من غير أي مصاريف إدارية وبتاخد تأمين مجاني على الحياة يعني قرض ولا في الأحلام
أما بقى عن المستندات المطلوبة هنا البنك قال إن هيتم الإعلان عن كل المستندات المطلوبة بالتفصيل عن طريق الموقع الالكتروني للبنك، بس العميل بيوقع على كل الأوراق المطلوبة في أي فرع من فروع البنك أو أي قنوات اضافية هيتم الاعلان عنها قريب
وعلى فكرة بنك مصر أعلن برضو عن نفس القرض للمصريين العاملين بالخارج، يعني انت دلوقتي تقدر تقدم عليه في البنك الأهلي او مصر لانه تقريبا بنفس القيمة والمدة كمان
ده كمان أعلن عن قرض التمويل العقاري للمصريين العاملين بالخارج وده لتمويل كافة الوحدات السكنية، بأكبر نسبة تمويل بتوصل ل 80% من قيمة الوحدة السكنية، وبأطول فترة سداد بتوصل ل 15 سنة
مش بس كده ده كمان البنك الأهلي أعلن عن طرح شهادتين دولارية جديدة مدتهم 3سنين هيتم العمل بيهم خلال الساعات الجاية وده عشان تلبي رغبات العملا في استثمار مدخراتهم من العملات الأجنبية في وعاء ادخاري بعائد مميز يحافظ عليها وكمان يزودها
أول شهادة البنك أعلن عنها هي شهادة ” الأهلي بلس”، ودي مدتها 3 سنين بعائد سنوي 7% وكمان ممكن تقترض بضمانها لأغراض استثمارية لحد 50% من قيمتها بالجنيه المصري، وبحد أقصى 10 مليون جنيه وبسعر عائد 2.25%
أما الشهادة الدولارية التانية فهي أسمها ” الأهلي فورا” ودي مدتها 3 سنين وبعائد سنوي 9% بيصرف مقدما بما يعادل الجنيه المصري عن الفترة كلها بواقع 27% من قيمة الشهادة عن إجمالي مدتها
لكن للأسف مش هتقدر تقترض بضمانها، وبتقدر تسترد الشهادة دي في تاريخ استحقاقها بالدولار الأمريكي
و فئات الشهادات دي هي 1000 دولار امريكي وممكن تستردها بعد 6 شهور من شرائها وفقا للقواعد المعمول بيها
ودلوقتي قولنا رأيك في قرض المصريين بالخارج؟