“مصر عندها وفر في الكهرباء 25%” هذا ما أعلنته وزاره الكهرباء منذ عدة أشهر، لذلك فإن الناس في حيرة هذه الأيام من سبب انقطاع الكهرباء أكثر من مرة في اليوم.
ورغم ان رئيس الوزراء طلع وضح الاسباب خلال الساعات اللي فاتت، لكن لسه الناس عندها اسئله كتير، ومن ضمنها سؤال مهم:هل احنا طورنا محطات الكهرباء الرئيسيه ونسينا شبكات النقل والتوزيع اللي مش قادره تستحمل الشغل في الحر؟
كل الاسئله اللي بتدور في بالك وبال كتير من المصريين، وزير الكهرباء طلع يرد عليها عشان يقطع الشك باليقين فتعالوا نشوف قال ايه وإمتى الأزمة هتنتهي بالظبط؟
الصيف السنة دي داخل علينا بتقله والجو بقى مولع ومحدش قادر يستحمل خصوصا ان الايام الأخيرة الكهربا بقت تقطع بالساعات.
بس لو رجعت لبيانات وزاره الكهرباء في شهر فبراير 2023, هتلاقي الدكتور ايمن حمزه المتحدث باسم وزاره الكهرباء قال إن مصر عندها فائض في إنتاج الكهرباء يصل لأكتر من 13 ألف ميجا وات، مشيرًا إلى أن حجم الوفرة يقدر بـ25%، وده طبعا انجاز كبير لأن مصر كانت تعاني من عجز بنسبة 20%.
والمسألة مش ان احنا عندنا وفره وبس، لأ ده احنا بنصدر كهرباء أصلا، وده حسب تقرير جهاز المركزي الاحصاء اللي نشرته جريدة اخبار اليوم.
وحسب التقرير ده: قيمة صادرات مصر من الكهربا زادت بنسبة 52.7% في 2022 مقارنة بالسنة اللي قبلها. وده يخلي أي حد فينا يحتار أكتر ويسأل إيه اللي تغير وليه الكهربا بتقطع؟
أهو الدكتور محمد شاكر وزير الكهربا رد في برنامج اخر النهار، على كل تساؤلات المواطنين ويحسم الجدل.
عشان كده قال ان منظومه انتاج الكهرباء بخير من اول المحطات لغايه شبكات النقل وما فيش فيها اي مشاكل، لكن المشكله الرئيسيه هي في حجم الوقود، طب ازاي؟
ببساطه كده المحطات بتحتاج وقود عشان تشتغل وتطلع كهربا، فانت مع موجه الحر الشديد زودت استهلاك الكهرباء فزاد استهلاك الغاز وده قلل الضغط في الشبكات الغاز الخاصه بمحطات الكهرباء، يعني تقدر تقول ان انتاج الكهرباء معتمد على حجم الوقود المتاح لتشغيل المحطات؟
وده ياخدنا لسؤال تاني مهم جدا: فين غاز مصر؟ وهل اتجاه الحكومة للتصديره خلال الشهور الأخيرة كان ليه تأثير علينا؟..
الاجابه المرة دي عند وزير البترول طارق الملا، واللي اكد ان انتاج مصر من الغاز في الصيف رايح كله للاستهلاك المحلي، والبلد من اول يونيو اللي فات مصدرتش غاز.
لكن في الشتاء بيكون فيه فائض، عشان كده الدولة ناويه تبدأ تصدر الغاز من أكتوبر الجاي، يعني كل الغاز اللي بيتم إنتاجه دلوقتي رايح للبلد، والتصدير بيكون في موسم الشتا لما يكون عندك فائض حسب اخبار اليوم.
وبعد ما فهمنا الحكايه ماشيه ازاي نيجي بقى السؤال المهم قوي امتى الازمه دي هتخلص؟وزير الكهرباء قال انهم بيحاولوا دلوقتي يعملوا توزيع عادل للكهرباء عشان نخفف الاحمال ومن المتوقع انتهاء الازمه خلال 3 ايام
وبالمناسبة وزارة الكهربا كانت طلعت من فترة بيان كشفت فيه عن تزايد الأحمال ووصولها لرقم 34650 ميجا وات وده رقم قياسي ومحصلش قبل كده على مدار السنين اللي فاتت.
ودلوقتي قولنا الكهربا بتقطع عندك ولا لا؟