منذ أيام والكهرباء تنقطع بالساعة والاعتين والثلاثة وهذا أمر لم يحدث من سنوات، فما السبب؟ هذا هو لسان حال الملايين من الناس بعد الانقطاع المستمر للكهرباء، والكل يسأل :ما السر؟
وهو ده اللي هتعرفوه معانا في الفيديو ده، ومن على لسان الحكومه نفسها، فياترى رئيس الوزراء برر الانقطاع المستمر ده بإيه؟ والازمة مستمرة لغايه امتى؟ والحكومه هتحلها إزاي؟ خليكم معانا وتابعوا التفاصيل.
مع الارتفاع الشديد في درجات الحرارة، الناس اتفأجات بانقطاع مستمر في الكهرباء وده مش في مكان معين لا ده على مستوى محافظات الجمهوريه كلها والشكوى بقت عامه والجدل زاد..لدرجه ان احمد موسى طلع قال مش كنا خلصنا من الموضوع ده، مطلوب من الحكومه تطلع توضح السبب.
وهنا الحكومه ما كدبتش خبر ورئيس الوزراء مصطفى مدبولي طلع يكشف السبب، وقال إنه نتيجه لموجة الحر الشديدة اللي في البلد، زاد استهلاك الطاقه الكهربائية بصوره كبيرة.
وده زود حجم استهلاك الغاز الطبيعي المستخدم في إنتاج الكهرباء وبالتالي عمل ضغط شديد على الشبكات الخاصة بيه ، وده اتسبب في انخفاض ضغوط الغاز في الشبكات الموصلة لمحطات الكهرباء.وفي اللحظه بقى دي الحكومه تعمل ايه؟
ايوه بالظبط زي مافكرت، الحكومة قررت تلجأ لخطة تخفيف الأحمال الكهرباء وبدأت فيها من يومين، وده كله عشان يوصلوا للضغوط العادية لشبكة الغاز.
وزي ما كلنا لاحظنا اليومين اللي فاتوا، الكهرباء بتقطع في مكان وتيجي في مكان تاني، وهو ده اللي اكده رئيس الوزراء لما قال ان تخفيف الاحمال هيتم بالتناوب لغايه ما الشبكات تستعيد ضغوط الغاز الطبيعية، ويفضل السؤال الاهم هنفضل في الازمه دي لغاية امتى؟..
رئيس الوزراء كان صريح في النقطة دي وقال ان احنا مستمرين في خطه تحميل تخفيف الاحمال لغايه نص الاسبوع الجاي
وختم كلامه بإن الارتفاع الشديد في درجات الحرارة عمل تأثيرات كبيرة على عدد من الدول المختلفة، واحنا دلوقتي في فترة تخفيف أحمال مؤقتة حتى استعادة الشبكة للضغوط العادية.
وخلال الساعات الأخيرة في عدد من المواطنين اشتكوا عبر مواقع التواصل الاجتماعي من الانقطاع المستمر للكهربا، خصوصا في محافظات قنا وأسوان والأقصر والمنيا والفيوم وأسيوط والغربية والمنوفية والبحر الأحمر وسوهاج وكفر الشيخ وبورسعيد.
ومع بداية الأزمة، مصادر لموقع القاهرة 24، قالت إن سبب الانقطاع المستمر ييجي بسبب تزايد الأحمال على المحولات الكهربائية وده أدى لحدوث أعطال مفاجأة وتوقفها عن العمل.
وحسب موقع الفجر، انقطاع الكهربا ده اتسبب كمان في انقطاع المياه يعني لابقى فيه مياه ولا نور، وده لأن محطات الشرب وقفت ضخ المياه خصوصا في القاهرة الجديدة والعبور ومدينة بدر والسلام والنهضة، ده طبعا غير أن المياه أصلا مبقتش توصل للأماكن العالية والأدوار المرتفعة.
ودلوقتي قولنا الكهربا بتقطع عندك ولا لأ، ولو بتقطع ده بيحصل كام مرة في اليوم؟