وزارة التموين فاجئت الناس بقرار جديد وهي إنها اعتبرت السبايك الأقل من 100 جرام مشغولات ذهبية، والقرار هذا نشرته الجريدة الرسمية وهذا لأنه بدأ تطبيقة بالفعل.
طيب ياترى القرار ده معناه إيه؟ والمشغولات دي هتخضع لضريبة الـ14% ولا لأ؟، وإزاي أقدر أحسب الضريبة دي على السبايك اللي وزنها صغير وهل ده معناه إن الأسعار هتزيد؟
خليكوا معانا واحنا نقولكم إيه الحكاية:
الفترة اللي فاتت زاد الطلب على الدهب واتحركت أسعاره لمستويات قياسية وعشان كده لجأت شركات الدهب إنها تصنع أوزان مختلفة من السبايك وأطقم الدهب، وده عشان يسهلوا الدنيا على الناس وتكون أسعارها مناسبة لكل المواطنين
وطرحت شركات الدهب سبايك بتبدأ من وزن 2.5 جرام، واللي حصل إن وزارة التموين قررت تعتبر السبايك اللي وزنها أقل من 100 جرام مشغولات ذهبية بس ياترى ده معناه إن السبايك دي هتخضع لضريبة الـ14% ؟
عمرو المغربى عضو مجلس إدارة شعبة الدهب رد على السؤال ده وقال إن القرار الجديد لوزارة التموين هيخلي السبايك الدهب فوق وزن 31.100 جرام تخضع لضريبة القيمة المضافة واللي هتكون بنسبة 14ظ5 يعني السبايك وزن 50 و 100 جرام هتخضع لضريبة الـ14%
وفي تصريحات لـ اليوم السابع وضح وقال إن السبايك بقى اللي وزنها أقل من 31.100 جرام وهي أوزان الـ 1 جرام و5 جرام و 20 جرام كانت أصلا بتخضع لضريبة القيمة المضافة الـ14%
وعشان كده القرار الجديد مش هيضيف أي جديد على المعاملة الضريبية للأوزان دي
وقال كمان إنه حسب القرار الجديد هيكون متوسط ضريبة القيمة المضافة على السبايك أوزان 50 جرام و100 جرام حوالي 10.84 جنيه ومع اضافة الدمغة هيكون إجمالي الضريبة والدمغة حوالي 11.25 جنيه
وحسب تصريحات نادي نجيب، سكرتير شعبة الدهب السابق، الهدف من قرار وزارة التموين هو خفض الطلب على شراء السبائك وتوجيه المستهلك نحو المشغولات الذهبية، والقرار هيزود من قيمة المصنعية على السبيكة.
ولو انت معندكش فكرة أحب أقولك إن السبيكة بتبدأ من متاح بأوزان مختلفة, وبتتراوح المصنعية عليها بين 25 لـ 75 جنيه في كل جرام، وبرضو بتختلف مصنعية السبايك من شركة للتانيه
وفي قاعدة معروفة عن مصنعية السبايك، وهي إنه كل ما زاد وزن السبيكة المصعنية عليها بتقل، أما بقى لو بتسأل عن الأسعار فـ الأسعار سيطر عليها التراجع محليا خلال الأسبوع اللي فات.
وكان في انخفاض بشكل تدريجي في الأسعار وده بسبب الاستقرار اللي حصل في حركة الطلب على الدهب وده طبعا قلل الأسعار.
وده اللي خلى أسعار الدهب في مصر تبدأ تستقر وتتوافق مع الأسعار العالمية واللي شهدت تراجع كبير، ومش دي بس الأسباب الوحيدة ده كمان قرار الحكومة بإعفاء الوافدين من الجمارك على الدهب لمدة 6 شهور ساعد كتير في استقرار السوق.
وحسب اللي أعلنته مصلحة الجمارك المصرية فـ بعد القرار ده ولحد دلوقتي دخل حوالي 194 كيلو جرام من الدهب بصحة الوافدين من الخارج.
وكمان التوقعات بتأكد إن الواردات من الدهب هتزيد في شهور الصيف وده لانه معروف إنه بيزيد فيها أعداد الوافدين من الخارج خلال موسم الإجازات الصيفية وده اللي بيخلي المعروض من الدهب يزيد خلال الفترة الجاية.
دلوقتي قولنا رأيك في اللي بيحصل في سوق الدهب وتوقعاتك الفترة الجاية ؟