أسعار التموين الجديدة..نعم كما سمعت بالظبط، وزير التموين خرج خلال الساعات الأخيرة قال الكلمتين دول وعينك ماتشوف إلا النور:
الناس بتسأل ليه؟ وطالما الحمد لله الرز موجود وكفاية زي ما الوزير بيقول: ليه متصرفوش للشعب على بطاقة التموين؟
طيب لو عاوزين نشتري رز هنشتريه بكام؟ والواحد مننا كل شهر يروح يجيب إيه بالخمسين جنيه؟ وهل الموضوع هيقف عند الرز بس ولا ممكن تشوفه في سلع تانية الفترة الجاية؟
طبق الرز وجبة أساسية في كل بيت مصري كل يوم سواء كنت غني او فقير، عشان كده أي تغيير في اسعاره بيقلب الدنيا، خصوصا اننا عشنا السنة اللي فاتت أزمة السنة اللي فاتت خلت سعر الكيلو بيوصل ل 30 جنيه.
لكن في المقابل، الحكومة كانت بتنزله على بطاقة التموين بسعر 12 جنيه تقريبا للكيلو، بس واضح كده ان نظام وراح لحاله خلاص، لأنه وزير التموين الدكتور علي المصيلحي
بس ياترى هو وزير التموين قال ايه؟
شوف يا سيدي، الوزير أكد أنه مش هيكون فيه رز على التموين عشان الـ 50 جنيه يدوب بتقضي الزيت والسكر، فإزاي أنزل الرز يتبهدل في التموين عشان كده قررنا إننا نسيب الرز حر
وخد بالك ده مش معناه إننا عندنا أزمة رز في مصر، لأ خالص، كل الحكاية ان ارتفاع أسعار السلع الأساسية خلى الوزارة تعيد حساباتها عشان تشوف إيه اللي ينفع ينزل على البطاقة وإيه اللي مينفعش.
وطبعا اي حد فينا يسمع الكلمتين دول علطول لازم يفكر: لنا الحكومة تبيع الرز بالسعر الحر… التجار هيعملوا فينا إيه؟
الصراحة رد وزير التموين كان حاضر، وقال إنه مش معنى إن الرز هيكون حر أنه مش هيكون فيه ضوابط ليه لا، العمل في تجارة الرز لازم يكون ليه ضوابط وقدام عيون الدولة، يعني مينفعش دكتور يشتغل في تجارة الرز
وبالمناسبة ده قال أن تم زراعة 1.6 مليون فدان من الرز وده هيساهم في توفير إنتاج رز يغطي استهلاك مصر، وقال اننا هنستمر في منع تصدير الرز عشان كده هيفضل متوفر، وأحب أطمن المواطنين إننا كلنا شغالين في صالحهم.
وعلى فكرة كلام وزير التموبن كان على الرز بس ومحابش سيرة أي سلع تانية، بس زي ما انت عارف الرز سلعة أساسية مفيش غنى عنها، وده اللي خلى الإعلامي أحمد موسي يطلع ويرد على تصريحات وزير التموين خلال برنامجه على مسئوليتي، ويقول إن التصريح ده هيتسبب في أزمة عند المواطن، ليه أقول للمواطن اني معنديش رز على بطاقة التموين، وأنا دولة عندها اكتفاء ذاتي؟
وقال كمان الوزير قال إننا زارعين مليون و600 ألف فدان رز، يعني أكتر من احتياجاتنا اللي بتوصل ل 1.2 مليون، فدي حاجة عجيبة وعليها علامة استفهام كبيرة.
وكمل وقال أن بعض المواطنين بيكونوا عايزين يستخدموا الدعم المخصص ليهم في شرا الرز بدل من الزيت والسكر، عشان كده قال ما تسيبوا الرز للمواطن يعني لما التموين تقدم الرز بالسعر الحر بـ22 جنيه وهو على بطاقة التموين بـ12.60 فده مش بيخدمني اطلاقا.
وفي الاخر طلب من التموين إعادة النظر في المسألة دي مرة تانية، وإتاحة حرية الاختيار قدام المواطن بالنسبة للسلع التموينية زي ما كان بيحصل قبل كده.
وده يجي في الوقت اللي اسعار الرز فيه ارتفعت عالميا بعد ما الهند أعلنت عن وقف تصديره، بس ياترى هل ده ممكن يأثر على السوق المحلي؟
انا اقولك، حسب تصريحات حسين ابو صدام نقيب الفلاحين في جريدة الشروق، أن ارتفاع أسعار الرز عالميا مش هيأثر على الأسعار المحلية لأن مصر مش بحاجة لاستيراد الرز من الخارج نظرا لزيادة المعروض بالسوق المحلي.
وقال أن مش من حق الفلاح أنه يطالب ببيع المحصول بحسب السعر العالمى فى الوقت الحالى، لأنه مش بياخد الأسمدة بالسعر العالمى، ولا بياخد الرز الأبيض مرة تانية من التموين بالسعر العالمى.
ودلوقتي قولنا بتشتري كيلو الرز بكام؟