تصرف صادم من بوسي بعد حبس زوجها هشام ربيع

المطربة بوسي تفعل تصرفات غريبة من بعد حبس زوجها هشام ربيع بسبب تدخله في مشكلتها مع طليقها.بوسي كانت ترقص وتغني ولا كإن زوجها حبس ولا كأن شئ حدث.

شكلها كده هتتخلى عنه بعد ما لّبسته في الحيط أصله عمل فيها السبع رجالة وقال أنا اللي هخلص مشكلتك مع طليقك قام لهف منه 8 مليون جنيه وخانه ذكاؤه.

طيب إزاي بوسي طالعة تغني وترقص وهي في الوضع ده بدل ما تقف جنب جوزها؟.. وإيه اللي يخليها تعمل كده هل بتعمي الأنظار عنها اكمنها خرجت من الزمة دي وجوزها اتحط مكانها؟.. طيب هي ليه اتخلت عنه بالطريقة دي وياترى هشام ربيع هيعمل إيه في المشكلة اللي اتحط فيها؟.. كل ده وأكتر هقولكم عليه في التقرير التالي:

الكلام داير دلوقتي إن بوسي كان لازم تأجل شغلها دلوقتي لحد ما تشوف الدنيا فيها إيه وتقف جنب جوزها بس هي اتخلت عنه فعلًا والتصرفات دي فعلا غريبة عشان بوسي أصلًا بقالها فترة ولا بتعمل أغنية ولا بنشوفها في حفلة يعني مختفية جت في الوقت اللي جوزها محتاجلها فيه وتشوف شغلها وتطرح برومو وتجهز لأغنية هتنزل بيها اليومين الجايين.

ده مش بعيد نشوفها في حفلة كمان ولا بتغني في فرح والحياة عادي.. بس عادي اللي خلاها اتخلت عن أبوها اللي سبب وجودها في الدنيا مش هتتخلى عن جوزها.

هجوم مستمر

الجمهور من وقت ما شاف بوسي طرحت برومو أغنيتها الجديدة “مسولي وصبحوا” وهو مش ساكت وعمال بيهاجمها بشكل مستمر.

أصل إزاي جوزك ياخد 4 أيام حبس على ذمة التحقيقات في تهمة استيلاء على 8 مليون جنيه من طليقها وهي تطلع ترقص وتغني وكإنها فرحانة فيه!.

طبعًا موقف زي ده الجمهور ربطه علطول بأبوها الله يرحمه اللي كان دايمًا يشتكي منها وإنها تخلت عنه ومش بتصرف عليه لأ وكمان محضرتش جنازته ولا عزاه ومعرفتش إنه رحل من الدنيا غير بعدها بكام يوم.. متخيلين الوضع! هو قلب بوسي ده ماله كده ملوش عزيز ولا غالي ولا إيه؟.

هي اللي مرجحته

متخيلين كلمات أغنية مَسّولي وصبّحوا بتاعة بوسي تقول إنها فعلًا فرحانة وعايشة الحياة عادي دي بتقول هو دوايا وعينيا ولازم أريحه.. ده أنا ياما فسّحته وبإيدي مرجحته.. الكلمات دي طبعًا كلها اتسببت في هجوم عليها بسبب جوزها.. بس بردوا في ناس تفاعلت مع كلمات الأغنية وفرحانين إن بوسي راجعة لأ وكمان بيقولوا إنها أخيرًا سابت الأغاني الهابطة وهتركز على موهبتها.

قرار النيابة

الأزمة بتاعة هشام ربيع جوز بوسي شكلها كبيرة وطالما اخد 4 أيام حبس يبقى في دليل هيدينه أكيد.. الكاميرات اللي حوالين البنك وقت الواقعة اتحفظوا عليها.

وطبعًا طليق بوسي كان قال إن هشام ربيع كلمه إنه هيساوي موضوع الشيكات والفلوس بينهم بالود واداله معاه عشان يتقابلوا راح هشام باعتله 3 رجالة خدوا منه الشيكات بالعافية.

المهم موضوع الحبس ده فيه مشكلة كبيرة ومبلغ 8 مليون جنيه كبير والواقعة نفسها غريبة.. وبوسي لما اتحقق معاها قالت ماليش دعوة وده شغل بين جوزي وطليقي وهما أحرار في اللي بيعملوه يعني خرجت زي الشعرة من العجين.

مصير جوز بوسي غامض لحد دلوقتي وهي فعلًا شكلها مش مهتمة بالموضوع.. وربنا يسترها على الراجل اللي اتقال إنه شايل عنها الموضوع وبيرد الجميل ليها بعد ما وافقت إنه يرجع لمراته وهي تبقى زوجة تانية عادي.. بس الخوف بقى إنها تتطلق وتتخلى عنه بجد لو كان مصيره حبس نهائي ولبس في القضية فعلًا والتهمة اتثبتت عليه.